Read Konyak Naga LAMPULAN 11 Bible Online

LAMPULAN 11 - Konyak Naga bible

LAMPULAN 11

¹Sha-a yinhulanne-o Kahwang ngao yahteki she, lampulan hüyange Judea me ngohpu jeihei naolanne jai.

²Tüokhei aope Peter Jerusalemte ong, shokhüppalanne I phei tokteiye ngaowe i.

³“Hangne nang shoyekhüppalan tangte tai hüyange iman phei hahpu?”

⁴Hüyangpoi Peter yonge ükong wang memuh ngaowe üjing hinne imante i:

⁵“Tao Joppa chingnyu me yoppe ngoh, hüyange mükngoih shonge tawante taowe himang ja nge. Tüome khao ja lepu nye üyong ja ünuk peli me jonyange wangdang mepu yeitampu taowe nge. Hüyange hatüo ü-tangte yu.

⁶Hüyange hatüote ü-mük-e tinge mong phawe lei, hüyange üya peli nyimpu kahtoknyu yinmok, phao yinmok, toshitolao hei shomme kempulan hüyange wang awhalan taowe nge.

⁷Hüyange üne-o ngaowüng jawe ngaowe taowe jai, ‘Lüotüoh, Peter, toitüoh hüyange hahtüoh.’

⁸Hüyangpoi taowe i, ‘Youngwanpa, hüke yeje; hangjingne nuwinpu yejema-a yejaopu toi hanghe-o ü-jute inpu ye-ok lakyang.’

⁹Hüyangpoi wangdang mepu wüngjawe nishe jan, ‘Hanghe Kahwange jaowe tamyangki hatüo nange ünu she tah nyik.’

¹⁰Hüyange hatüo lüm me ngoiye ngai, hüyange üshei nishe wangdang te shui in.

¹¹Hüwante muh Kaisarea mepu ü-tangte shonpu kahta lüm toman ngohpu nokshao me yong.

¹²Hüyange mong yening neipe tailak jingne Yahawe üte ngao; hüyange Joppa mepu jeiheinaolan wok-o ü-phei woi, hüyange tomante nyikpu kahta nokte ong.

¹³Hüyange hangke I nok me wangdang shongmokpa yongyange Iye nge hatüo tomante i; hüyange wangdang shongmokpawe i, ‘Joppa te shontüoh, hüyange Simon, ao te Peter she nyik, I woi peitüoh;

¹⁴hüyange hanghe ngaowe nang hüyange nenok üshei yinlak hatüo Iye nangte iphalak.’

¹⁵Hüyange taowe ngaone ükong wangwante, üwang yeme temante peipukih iman tangte Yaha Üjao yu.

¹⁶Hüyange, ‘Johnne ütingme yengme baptitam, hüyangpoi numan Yaha Üjaome baptitamlak’ she hanghe ngao Youngwanpawe i hatüo ngao taowe teihtüo.

¹⁷Tüokhei aope toman-e Youngwanpa Jesu Khrista te ütinglak tomante hünghao phapuke Kahwange imante-o jakih phama-a, Kahwangte tientamlakpa tao ao?”

¹⁸Hüyange aope iman-e tüolan jai, iman yelangmanpe ngoh, hüyange Kahwangte müktishiwa tamme i, “Hümma-a yinhulanne-o üyin tüolak jingne monglüplak Kahwange phayangki!”

¹⁹Aope Stephen toi hüyange mengpalan jingne shangne tampu ngaiwante aoyinne üngwünne yanne tai, iman Phoenicia, Saipras hüyange Antiok ngoiye kem, hüpoi Jehudilan tokte kaiye iman-e ao to ngaowa konyenyüo.

²⁰Hüyangpoi aope iman yo mepu ütam, Saipras hüyange Sairinlan Antiok te pei, iman-e Greeklan te-o Youngwanpa Jesu pungao ümei konnyüowe ngao.

²¹Hüyange Kahwang yak iman phei ngoh, hüyange maawe ütinglakke Youngwanpa tangte ye.

²²Hüyange imanjeng ngaolan Jerusalem me ngohpu bumeinok na ngoiye pei, hüyange iman-e Antiok ngoiye Barnabas shon.

²³I aope ngoi hüyange Kahwang shüpshe nge, I mongmei. Hüyange monghahpu phei iman-e Youngwanpate tükyange ngohlak Iye iman üsheite heng;

²⁴hangjingne Barnabas-a kahta ümei, hüyange Yaha Üjao hüyange ütinglakpuwe maawe ngoh. Hüyange kahta maawe Youngwanpa jingne woi pei.

²⁵Tüokhei Saul yamlak jingne Barnabas Tarsas te tai;

²⁶hüyange aope I tüo, Iye I Antiok te woipei. Hüyange hatüo ngao, iman-e wangpeng ja kümme bumeinok phei jemme ngoh, hüyange kahta maapute nyüo, hüyange Antiok me üwangpane pinlante khristan she nyik.

²⁷Sha-a hatüo nyih hei hipak me hipalan ütam Jerusalem mepu Antiok ngoiye lai.

²⁸Hüyange iman yo me kahta ja min Agabas yongyange, kahtoknyu üshei me seanyao yenglepu üyong peikülak she Yaha kaiye itte i. Hatüo Klaudias ahngne mengwante ngai.

²⁹Hüyange pinlanne kahta liliye yoi okpu shinne, Judea kahtok me ngohpu jeiheinaolan tangte jampu shonlak mong;

³⁰hatüo iman-e ling, hüyange Barnabas hüyange Saul yakme hatüowa jeiyonglan tangte shon.