Read Konyak Naga LAMPULAN 12 Bible Online

LAMPULAN 12 - Konyak Naga bible

LAMPULAN 12

¹Tüopa hipak nanjing me Herod ahngpawe bumeinoklan shangne tamlak jingne I yak lan.

²Hüyange Iye John Ijei Jeams yanglow-e toi.

³Aope Iye Jehudilan tüokaiye mongmei ne tamnang she shing. Peter-o pholak jingne yong. Hatüowa do yenyütpu an mo hipak ne ngoh.

⁴Hüyange Iye Peter phoyange, I yomlak jingne kengphet peli li ünuk peli me ja kihkih yomne phünne phayange küpnok me ang; hüyange Yinyepu mo linyang phei me I kahtalan sheshao me woi yüolak she teih.

⁵Tüokhei Peter küpnok me ang; hüyangpoi I jingne bumeinok lanne Kahwangte yeonge monge yop.

⁶Aope Herod-e I-a yahngai yange kahtalan te phalak she teih ngohpu ya, tüoya Peter kengphet nipa me yanwu niye shayange shi ngoh; hüyange yompalanne küpnok tafün shongme yom;

⁷hüwante leihu, Youngwanpa wangdang shongmokpa ja I shongme yong, hüyange wangngai ja küpnok nyoime tee. Hüyange Iye Peter hempate yakke shung hüyange i, “Mamshe lüotüoh.” Hüwante I yanwu I yak mepu lan.

⁸Hüyange wangdang shongmokpawe Ite i, “Nange shienghit hityah, hüyange nang yashom shomyah.” Hüyange Iye hüke ling; hüyange Iye Ite i, “Nang inkhek inyange ü-pheite woikei.”

⁹Hüyange I yayong hüyange I pheite woi. Hüyangpoi wangdang shongmokpawe lingpuwa bumei she yeteih, hüyangpoi himang ja ngenang she Iye teih.

¹⁰Hüyange aope üwangpa hüyange nishepupa yompalan kaiye iman tai, hüyange chingnyute inpu yan peten ngoi, hatüo i nying nyingke iman jingne ep. Hüyange iman onge chingyang ja kaiye tai. Hüyange hüwante muh wangdang shongmokpawe I mepu yan.

¹¹Hüyange aope Peter kahta ne mengha-e ye, Iye i, “Youngwanpawe I wangdang shongmokpa shonne, tao Herod yak mepu hüyange Jehudilanne teihpu mepu yinyangki she sha-a taowe ütingme shingteki.”

¹²Hüyange Iye hatüo teihyang pheime, John, ao te Mark she nyik, Inyu Mary nokte pei. Tüome maawe jamshe jemme yoppe ngohyangki.

¹³Hüyange aope Iye nokshao yeme taküpte kong, shaoshannyu ja Rhoda she minyange janlak jingne yu;

¹⁴yhawe aope Peter ngaowüng shing, yhawe mongmeipuwe taküp ye ep, hüyangpoi phette ye, Peter nokshao me tafün shongme ngohnangki she yhawe i.

¹⁵Hüyange iman-e yhate i, “Nang nganang.” Hüyangpoi, hatüo üting she yhawe meimeiye i. “Hüpoi hatüowa I wangdang shongmokpa” she, iman-e i!

¹⁶Hüyangpoi Peter yelakpe kong, hüyange aope iman-e taküp ep, I ngeye yashan.

¹⁷Hüyangpoi Iye yak hongyange yelangmanpe ngohlak jingne i; hüyange hangke Youngwanpawe I küpnok mepu woiteiye ngaine tam hatüo Iye imante khoih-e i. Hüyange Iye i, “Tüolan ngao Jeams hüyange jeiheinaolan te itüoh.” Tüophei me I yanne ülao kente tai.

¹⁸Aope wangngai, Peter hangke mengpu shi she, kengphetlan yo me yeonge mop.

¹⁹Hüyange Herod-e I yampute yetüopu jingne, Iye yompalante ngaotong, hüyange iman li ne tamlak jingne ngaopha. Tüophei me Herod Judea mepu Kaisarea ngoiye lai, hüyange tüome nyoi.

²⁰Sha-a Herod-e Tyre hüyange Sidon lante yeonge mongmeng. Hüyange iman ja ne sheiyange I tangte pei, hüyange Blastas she minpu Ahngpa nok nokpu phei iman-e shümpa tamyange, chingmei yu, hangjingne ahngpa kahtok mepu iman kahtokke hahying yah ngoh.

²¹Hüyange leyangpu nyih ja me Herod-e yoi ahng o tüm, hüyange ngaophün shotjing me shotyange, imante ngao ngaiye i.

²²Hüyange kahtalanne üngwünne i, “Hatüowa kahta ngao yeje, hüyangpoi Kahwang ja ngao!”

²³Mokhshe Youngwanpa wangdang shongmokpawe Ite shet, hangjingne Iye Kahwangte müktishiwapu yepha. Hüyange I yonge hah li.

²⁴Hüyangpoi Kahwang ngao jonge jaalun.

²⁵Hüyange iman toi shoyang phei me, Barnabas hüyange Saul iman phei, John, ao te Mark she nyik, I woiyange Jerusalem mepu (te) ye.