Read Konyak Naga LAMPULAN 13 Bible Online

LAMPULAN 13 - Konyak Naga bible

LAMPULAN 13

¹Sha-a Antiok me ngohpu bumeinok me hipalan hüyange konnyüopalan ütam ngoh: Barnabas hüyange Niger she nyikpu Simeon, Sairinlan Lucius, Herod tetrarch phei jongne tampu Inao Manaen hüyange Saul.

²Aope iman-e Youngwanpa te yoppe khümme hüyange nyaoleye ngoh, Üjao Yahawe i, “Barnabas hüyange Saul ni taowe nyikpu toi linglak jingne; iman üjingne yoi yoine angtüoh.”

³Tüokhei iman-e nyaoleye hüyange yopyang pheime iman yakke imnite shüngne tamyang phei me iman-e imni shonne tei.

⁴Tüokhei Yaha Üjaowe Barnabas hei Saul ni shonne, iman Seleucia te lai. Tüo mepu imni yenglin me ongyange Saipras te tai.

⁵Hüyange aope imni Salamis me ngoi, Jehudilan synagoguelan me Kahwang ngao ponge tam; hüyange John iman phei jampu ja ne ngoh.

⁶Hüyange aope dikhot üshei linne iman-e Paphos ngoiye tai, Jehudilan yepahipa, tahleih hipa ja, Bar-Jesu, she minpu iman-e hüo.

⁷Governor Sergius Paulus, ao yeonge jelo wangpu kahta ne ngoh, I phei Bar-Jesu ngoh. Iye Barnabas hei Saul I tangte nyik-e Kahwang ngao jailak jingne ngang.

⁸Hüyangpoi yepahipa Elaimaswe (Greek me I min tüone ngoh) imante büange Governorpa mengne yetamlak jingne ngang.

⁹Hüyangpoi, Saul, ao te üne-o Paul she nyik, I Yaha Üjaowe maawe, Iye Ite tingkhakke lei,

¹⁰hüyange i, “Nang Kahshih Üha! Khakshupu lili jingne nanga wepa ngohnang; nangme ünu ümeng konne maawe ngoh nang, hüyange nange jinte Youngwanpa ütingpa-a ngaoleih ne menge tamlak jingne ngangnang!

¹¹Youngwanpa yak nang tangme sha-a yulak; hüyange nang mük pomlak, hüyange hipak ütenjapu jingne nange nyihning wangngai ye-ngelak.” Mokhshe phomshao hüyange wangnyakke Ite ngoi, hüyange I yak me jonyange woilak jingne Iye ütam yam.

¹²Aope Governorwe hanghe ngai hatüo nge, hüwante Iye Youngwanpa konnyüopu me yashan hüyange ütinglakke meng.

¹³Sha-a Paul hüyange I shümpalanne Paphos mepu yeng me tai, hüyange Pamphylia me Perga te pei. Hüyange John iman mepu yanne Jerusalem te ye.

¹⁴Hüyangpoi iman-e Perga mepu taiye Pisidia me ngohpu Antiok te pei. Hüyange Sabbath synagogue te onge shot.

¹⁵Hüyange ngaokeng hüyange hipalan laitep iyang phei me, synagogue me wanglam lampalanne iman tangte shonne i, “Jeiheinaolan, numan-e kahtalan jingne hengpu ngao ilak ngohma-a, ngaotamtüoh!”

¹⁶Tüokhei Paul yong, hüyange yak honge i: “Numan Israellan, hüyange Kahwangte nyamhei lepalan, jaiyah!

¹⁷Hatüo Israel jat Kahwange teman puyimlan le, hüyange Egypt kahtok me ngohwante, hatüo Israel jat yongne tam. Hüyange wong üyongpuwe Iye iman tüomepu woitei;

¹⁸hüyange wangpeng deli mongme wanwüng jengme Iye iman paotong.

¹⁹Hüyange Iye Kanan kahtok me jatli nyit mahne tam, hüyange tüopa kahtok me I kahtalan nokpu ne menge,

²⁰wangpeng gho peli pheime wang denga nanjing ngohne tam. Hüyange tüolan lin phei me Samuel hipa ngoiye Iye imante ngaophünpalan pha.

²¹Tüophei me iman-e ahngpaja yu, hüyange Benjamin nokphong mepu Kish üha Saul wangpeng deli ngoiye wanglamlamlak jingne Kahwange imante pha.

²²Hüyange Iye I yahteiyang phei me, iman Ahngpane menglak jingne Iye David le. Iye David jingne saki phawe i, ‘Ümong hahpu, hüyange Taowe mongpu üshei linglakpa, Jesse üha David, taowe tüoyangki.’

²³Janyangpu kih I mepu jaalunpu lan mepu Kahwange Israel lante Yinyepa ja, Jesu woipei.

²⁴I manpeiwante, Johnne monglüppe baptitampu Israellan üsheite üwangne konnyüo.

²⁵Hüyange Johnne I toi tümme peiwante i, ‘Numan-e tao ao she teihnangki? Tao numan-e tanpupa Ine yeje. Hüyangpoi leiyah, ü-pheite ja, ao ya mepu yashom lanlakne tao yewang, I peiküki.’

²⁶“Jeiheinaolan, Abraham mepu ngaipu hayim, hüyange numan yo me Kahwang nyamlepalan teman tangte hatüo yinyepu ngao shonteki.

²⁷Hangjingne Jerusalem me ngohpalan hüyange iman wanglam lampalanne I yeshing, yejema-a Sabbath lep iye ipu hipalan ngao yeshing okpu jingne, Ite ümeng phawe hatüo ngao iman-e ütahte ngaine tam.

²⁸Hüyange I litamlak ne I me ümeng yetüoyapoi, iman-e Pilate te I toilak jingne tong.

²⁹Hüyange iman-e I jeng nyanne ngohpu üshei ngaine tamyang phei me, iman-e I pee mepu yah-e mangkoksa me ang.

³⁰Hüyangpoi Kahwange I lipu mepu yange yetam.

³¹Hüyange Galilee mepu Jerusalem ngoiye I phei peipulan-e I nyih nangjange nge; hüyange sha-a kahtalante iman-a I saki ngohnang.

³²Hüyange teman puyimlante janpu pungao ümei toman-e yahpei nang.

³³Hatüo teman hayimlante Jesu yange tampuwe ütahte ngaitam yangki; Tüowelaihem nishepupa me nyanpu ke: “ ‘Nang ü-ha, tenyih taowe nang puhnang.’ ”

³⁴“Hüyange hatüowa lipu mepu yange yelak jeng Kahwange iyangki, üne-o nishe aope-o yeshilak: ‘Taowe David te janyangpu lowe angpu hüyange moiman Taowe nangte phalak.’ ”

³⁵“Hüyange Iye üne-o Tüowelaihem ülao ja me inang: ‘Nange Ü-üjaopa namme yeteilak.’ ”

³⁶“Hangjingne David-e yoi jinme Kahwange itpu shaoshan yang pheime, I shiye ta, hüyange I puyimlan phei jamme ang, hüyange seaye-namme tai.

³⁷Hüyangpoi Kahwange ao yange yene tam, I seaye yetai.

³⁸Tüokhei jeiheinaolan, numan-e tüo shingyah hatüo kahta kaiye ünu winpu numante pongtam nang;

³⁹hüyange hanghe mepu Mosa ngaokenge numan tingne yetam, Iye tüolan khongküm mepu mengpalan lili tingne tamnang.”

⁴⁰“Tüokhei hipalan laitep me ngaopu ngao numan me yengailak, numan kentingyah:

⁴¹‘Leiyah, numan yaowelepalan: Yashantüoh hüyange mahtüoh! Hangjingne taowe numan jinme toi ja lingnang. Hatüo toijeng kahta ütamme numante iyapoi, numan-e hangke tingme-o üting yelaklak!’ ”

⁴²Hüyange aope Paul hei Barnabas ni tüolan ngaoyang phei me yayong, ngoikülak Sabbath imante tüopa ngao üne-o ngaolak jingne kahtalanne tonge i.

⁴³Sha-a synagogue mepu aope yan, Jehudilan hüyange yinhulan Jehudilan wanglam me mongjüonge mengpalanne Paul hei Barnabas pheite woi. Iman-e imante Kahwang shüpshe me yelakpe ngohlak jingne hengpu pha.

⁴⁴Ünepu Sabbath me chingnyu mepu kahta sheyongpu jing Kahwang ngao jailak jingne jamshe jemme ngoh.

⁴⁵Hüyangpoi aope Jehudilanne ükhong jempu nge, iman-e yeonge müktak, hüyange Paul-e ngaopu ngaote yaoweleye phoi.

⁴⁶Hüyangpoi Paul hei Barnabas niye ünyei wongnange ngaowe i: “Kahwang ngao numante üwangne ngaolak wongpong ne ngohyang ki; hüyangpoi numan-e hatüo winpu, hüyange jinte üyin tüolak jingne wangpu yeje she numan-e numan nying nyingke shopu ngeye, leiyah, toman-e yinhulan tangte tainang.

⁴⁷Hangjingne hüke Youngwanpawe tomante tamyangki: “ ‘Taowe numan yinhulan jingne wangngai ja ne angnang, numan-e kahtoknyu üküm ngoiye yinyepu yah peilak.’ ”

⁴⁸Yinhulanne tüopa ngao jaiye mongmei hüyange Kahwang ngao müktishiwa. Hüyange jintepu üyin jingne hangshin leyange ngoh iman-e ütinglak.

⁴⁹Hüyange hüke Youngwanpa ngao üshei yete jaalun tai.

⁵⁰Hüyangpoi Jehudilanne, wanglamte lahnyikpu üyonglan sheko hüyange chingnyu woipalan hengne tamme, Paul hei Barnabas ni phei tüi-e shaoshi tamlak jingne mopngai, hüyange iman kahtok yikeng kaiye jang tei.

⁵¹Tüokhei iman-e iman phei tüi-e iman ya mepu kahmak konge tüoh, hüyange Ikonium ngoine tai.

⁵²Hüyange Antiok me pinlan-a mongmei hüyange Yaha Üjaowe maa.