Read Konyak Naga LAMPULAN 14 Bible Online

LAMPULAN 14 - Konyak Naga bible

LAMPULAN 14

¹Ikonium me hatüo ngai, aope Paul hei Barnabas jamme Jehudilan synagogue te ong, hüyange iman-e ngaowante, ükhong üyong ja Jehudi hüyange Greeklan moiniye ütinglak.

²Hüyangpoi üting yelakpu Jehudilanne yinhulan mongte powe tam, hüyange jeiheinaolan phei woilak mepu büang.

³Tüokhei nyih yeonge iman-e nyoiye Youngwanpa min me wongnange ngao; hüyange iman yakke kahnyingwüngha füo lingne tamme, Iye yoi shüpshe ngaojeng saki pha.

⁴Hüyangpoi chingnyu kahtalan ükhong tamyange, ütam Jehudilan phei hüyange ütam lampulan phei om.

⁵Hüyange aope yinhulan hüyange Jehudilanne iman ching woipalan phei imante wüotüowe jonlak hüyange longe shüplak jingne taisho,

⁶hatüo iman-e shinge pei, hüyange Laikaonia mepu chingnyulan Listra hei Derbe, hüyange shüpneipu kahtok üshei yete yanne tai.

⁷Hüyange tüoyin me-o iman-e Pungao ümei yelakpe konnyüo.

⁸Listra me puhnap memuh yashok teiye puhpu hüyange aope-o yekempu kahta ja ngoh.

⁹Paul-e ngaopu Iye jai, hüyange Paul-e Ite tingkhakke lei, hüyange I meilak ütinglakpu ngohpu Iye shing:

¹⁰ngao üyong ngaiye i, “Nang ya tingkhakke yongtüoh.” Hüyange I homme yonge kem.

¹¹Aope ükhonge Paul lingpu toi nge, iman-e Laikaonialan ngaome üngwünne i, “Teman tangte kahwanglan kahta kih menge yuwe ngohnangki!”

¹²Hüyange iman-e Barnabas te Zeas (Jupiter) she nyik, hüyange Paul te Hermes (Merkuri) she nyik, hangjingne I ngao ipu me ütahpa ne ngoh.

¹³Hüyange chingnyu sheshaome ngohpu Zeas khümjing ngengpawe pejong yin ü-o me mahu üpong ühalan hüyange jupeng yük yah peiye, hüyange ükhong phei jamme lampulante toidopu phane she ngoh.

¹⁴Hüyangpoi aope lampu Barnabas hei Paul-e hatüo jai, iman-e yoi inkhek hit, hüyange ükhong yo me phette onge üngwünne i:

¹⁵“Üyih üyonglan, hangne numan-e tüolan jonpu shi? Numan hangkihpu hükih-e toman-o kahta muh! Wangdang, kahtoknyu, yengching hüyange tüome ngohpu üshei lingpupa üyin Kahwang tangte, tüolan jajang japu toi mepu leppe yelak jingne toman-e pungao ümei numan tangte yahpei.

¹⁶Lintepu jinme Iye jat üsheite yoi lam me kemne tam.

¹⁷Hüke jeyapoi Iye ümei jonne wangdang mepu wai hüyange deihaliha ümei numante phawante, hüyange Iye hahying hüyange mongmei me numan mongmaawe tümwante, tüoyangpoi Iye yoi jeng saki yephape yetüoh.”

¹⁸Hüyange tüolan ngao iye, imante toidopu yephalak jingne ngange ükhongte iman-e tien.

¹⁹Hüyangpoi tüokente Antiok hüyange Ikonium mepu Jehudilan pei, hüyange ükhong yohyang pheime Paulte longe shüp, hüyange I liteki she teih-e chingnyu mepu shuiye tei.

²⁰Hüyangpoi aope pinlan jemme I neikonne yong, hüwante I lüo, hüyange chingnyute ong; hüyange üne nyih I Barnabas phei Derbe te tai.

²¹Aope Paul hüyange Barnabas niye Derbe me pungao ümei konnyüo, hüyange pinlan maawe om, iman Listra hüyange Ikonium hüyange Pesidia mepu Antiok te leihye;

²²iman-e pinlan yaha me wongnangne tam, hüyange ütinglakpu me yelaklak jingne heng; “Shaoshi yalipu maapu kaiye teman-e Kahwang ahngching te onglak wongpong she nyüo.”

²³Hüyange iman-e iman jingne bumeinok phe phe me jeiyonglan leyange nyaoweleye yopyang pheime, iman-e mengpu Youngwanpa te iman lanshe phawe tüoh.

²⁴Hüyange iman Pisidia kaiye tai, hüyange Pamphylia te pei.

²⁵Hüyange Perga me konnyüo yang pheime, iman Attalia te pei.

²⁶Tüomepu iman-e Antiok, ümeken me Kahwang shüpshe tangte toi jingne iman phünne phayangki, hüyange iman-e hanghe toi tüm, tüopa Antiok te yeng me pah tai.

²⁷Iman ngoiphei me bumeinoklan jamshe jemne tamyange, iman phei Kahwange lingpu üshei hüyange yinhulan jingne Iye hangke ütinglakpu taten ja eppe tam, tüolan üshei iman-e i.

²⁸Hüyange iman pinlan phei tüome hipak laowe nyoingoh.