Read Konyak Naga LAMPULAN 16 Bible Online

LAMPULAN 16 - Konyak Naga bible

LAMPULAN 16

¹Paul Derbe hüyange Listra te kemme pei, hüyange leihu; mengpu Jehudi sheko üha Timothy ütinglakpu ja ne ngoh; hüyangpoi Ipa-a Greek ne ngoh.

²Listra hei Ikonium me ngohpu jeiheinao lanne Timothy minyonge ngao.

³Paul-e Iphei taine I yahhu, tüokhei Iye I shokhüppe tam, hangjingne tüoye me ngohpu Jehudilanne Timothy üpa-a Greek she shing.

⁴Hüyange iman chingnyulan linne taiwante, Jerusalem me ngohpu lampulan hei jeiyonglanne tümpu ngao nyüolak jingne imante wünne tam.

⁵Tüo kaiye bumeinoklan ütinglakpu me wongnang; hüyange nyihjeih she shangtoi me jaalun.

⁶Iman Phrygia hei Galatia neikonne kemme tai, hüyange Asia me ngao yengaolak jingne Yaha Üjaowe büang.

⁷Aope iman-a Mysia yikeng ngoi, Bithinia kahtokte tailak jingne iman ngang, hüyangpoi Jesu Yahawe imante taine yetam.

⁸Tüokhei iman Mysia kaiye tai, hüyange Troas te lai.

⁹Hüyange yaning Paul tangte himang ja ngai; Macedonia lan kahta ja yongyange Ite tonge i; “Macedoniate peikei hüyange tomante jampha.”

¹⁰Tüokhei Iye himang ngeyang phei me, hüwantemuh Kahwange Ite Pungao Ümei konnyüolak toman nyiknang she teih-e taine tüm.

¹¹Tüokhei Troas mepu yenglin me taiye, toman-e shetingpupa lamme Samothrace te pei, hüyange üne nyih Neapolis ngoi.

¹²Hüyange tüomepu Rome me ngohpu üwangpa Macedonia kahwankam Philippi chingnyu te yalam me toman tai. Tüopa chingnyu me toman nyih nangjange ngoh.

¹³Sabbath me toman-e yengnah ye me yoplak ken ngohlak she teih-e, chingnyu peten kaiye tai, hüyange toman-e shotyange, jamshe jemme ngohpu shekolan te ngao.

¹⁴Hüyange Thyatira chingnyu mepu nye-ümang yaonyu Kahwang khümpu sheko ja min Lidiawe tomante jai, hangjingne Paul-e ngaopu ngao jaitamlak jingne Youngwanpawe yha mong eppe tam.

¹⁵Aope yha hüyange yha noklan baptitam, tomante yoppe towe i, “Numan-e tao Youngwanpa te monghüm nangshe lei okma-a, tenok me onge ngohtüoh.” Hüyange yhawe tomante yeonge kang.

¹⁶Hüyange hatüo ngai, toman-e yoplak nyoite taiwante, hi yaha ngohpu rhanyu ja aowe hi toi lingpu kaiye yha nokpulante küw maawe peitam, yhawe toman hüo.

¹⁷Yhawe Paul hei toman pheite woiye üngwünne i, “Numante yinyepu lam hüopu kahta tüolan-a, Ütahpa Kahwang shaoshanpalan ngohnang.”

¹⁸Hüyange yhawe hüke nyih nangjange üngwün. Tüojingne Paul-e eange mahpu jingne lüppeye, hüyange yha te i, “Jesu Khrista minme yha mepu ngailak jingne taowe ngaokeng phanang!” Hüyange hüwante muh hatüowa yha mepu ngaitai.

¹⁹Hüyangpoi aope yha nokpulanne iman küw tüolak shaaji yenang she shinge ok, iman-e Paul hei Silas pho; hüyange pheeileih jingme wanglamlampalan tangte iman shuiye yahpei.

²⁰Hüyange iman Roman ngaophünpa lan tangte woipeiye, iman-e i, “Kahta tüolan-a Jehudilan, hüyange teman chingnyu me yeonge mop ngaine tamnang.

²¹Hanghe wanglamlan teman Rome lanne yahlak yejema-a jonlak wongpongne yeje, tüolan iman-e nyüonang!”

²²Hüyange ükhonge jamshe iman phei tüi-e yong, hüyange ngaophünpalan-e iman inkhek hitne tam-e imante shengshaohwe shetlak jingne ngaokeng pha.

²³Hüyange iman-e yeonge shetyang phei me, iman küpnok me ange, phopalante iman yeonge meiye anglak ngaokeng pha.

²⁴Iman-e ngaokeng yahyange, küpnok ümongpa me iman ang, hüyange iman ya me khüp.

²⁵Hüyangpoi phawo me Paul hei Silas niye Kahwangte yoppe hüyange hem lokke ngoh, hüyange küpnok me ngohpalanne iman ngao jaiye ngoh.

²⁶Hüwante mokhshe minwe üyong leiye küpnok nokjing khongkümpute shui. Hüwante taküp khongkümpu ep, hüyange kahta lilite sha pu lanne tai.

²⁷Aope küpnok üjengpa lüoyapeih hüyange phowe angpalan shi ngohpu loine tamme, küpnok taküp epyange ngeye küpnok me ngohpu üshei tai mahtepu she teih, hüyange Iye yoi yang teakke ngaiye yoi nying nyingke li ne she ngoh:

²⁸Hüyangpoi Paul-e ngao üyong ngaiye üngwünne i, “Nang yoite hang ümengo tahling, hangjingne toman üshei tüome ngohnang.”

²⁹Hüwante phopawe vüntonlak jingne nyik hüyange phette ong. Hüyange I nyampuwe yeonge nin, Paul hei Silas shao me ümmekhüm.

³⁰Iye iman nokshaote yüone tamyange Iye i, “Üyonglan, yinlak jingne taowe hanghe linglak wongpong shi?”

³¹Hüyange iman-e i, “Youngwanpa Jesute mengtüoh, hüyange nang hei nenok yinlak.”

³²Hüyange iman-e I hei Inok me ngohpu üshei te Youngwanpa ngao i;

³³Phopawe tüoya tüopa hipak memuh iman woiye ye shetpu üko poitam, hüyange hüwante muh I hei Inok khongkümpu baptitam.

³⁴Iye Inokte Paul hei Silas woiye inne iman sheshao me hahying tümme pha, hüyange I hei Inok mongmei phei ngoh, hangjingne sha-a iman Kahwangte meng.

³⁵Hüyangpoi aope wangngai, ngaophünpalan-e phopa üyong shonne i, “Kahta tüolan-a taine tamtüoh.”

³⁶Hüyange phopawe Paulte tüolan ngao ponge i, “Ngaophünpalan-e numan lantam ne shon, tüokhei sha-a ngaiye jünge taitüoh.”

³⁷Hüyangpoi Paul-e imante i, “Toman aoyin Rome nyupuh ngohnang, tomante chingyang ko me ümeng yephape iman-e shetyangki, hüyange toman küpnok me angyangki. Hüyange sha-a iman-e lowe toman janglak a? Aope-o yejelak: iman-e iman peiye toman ngaine tamtüoh.”

³⁸Hüwante tüolan ngao phapa üyonglan ne ngaophünpalante ngaolan pha, hüyange aope Paul hei Silas Rome nyupuh she jai, iman nyam.

³⁹Tüokhei iman-e peiye imante yoh, hüyange iman-e iman ngaiyangphei me, chingnyu mepu tailak jingne tong.

⁴⁰Hüwante iman-e küpnok mepu ngaiye Lidia nokte ong hüyange jeiheinaolan ngephei me, iman-e iman toloimei ne tam hüyange yan.