Read Konyak Naga LAMPULAN 17 Bible Online

LAMPULAN 17 - Konyak Naga bible

LAMPULAN 17

¹Sha-a iman Amphipolis hei Apollonia kaiye taiphei me, Thessalonica, ümeken me Jehudilan synagogue ja ngoh, tüome pei.

²Hüyange Paul-e I wanglamke, synagogue te ong, hüyange hatmong lüm ngoiye Iye iman phei ngaolai mepu saki phawe nyüo.

³Hüyange ngaolai mepu yah-e, Khrista-a, shangeponglak wongpong hüyange lipu mepu nishe yange yelak wongpong ne ngohyangki she, hüyange taowe numante ngaowe tampu Jesuwa “Messiah ngohnang she,” Iye khoihngao.

⁴Iman ütam mengne tamme, wanglamte kenpa Greeklan ükhong üyong ja hüyange üyonglan sheko maapuwe Paul hei Silas phei om.

⁵Hüyangpoi Jehudilanne müktakke jokpa ümenglan ütam shai jemme, ükhong ja ne mengyange chingnyu mop ngaine tam, hüyange Jason nok shümme kahtalan tangte iman woipeilak jingne yam.

⁶Hüyangpoi aope iman-e iman yetüo, iman-e Jason hüyange jeiheinaolan ütam chingnyu wanglam lampalan tangte shui peiye üngwünne i, “Aoyinne kahtoknyu leihkeihne tam, iman-a tüome-o peiye ngohnang!

⁷Jason-e iman ngoine tam, hüyange tüolan üsheiye, Jesu she nyikpu ülao Ahngpa ja ngohnang she, ngaowe Kaisar ngaokeng nushakke jonnang.”

⁸Aope ükhong meinyuwe hüyange wanglam lampalanne tüolan ngao jai, iman jünge yengoh ok.

⁹Hüyangpoi iman-e Jason hüyange ülao mepu janpu ngin yahyang phei me, iman lantam.

¹⁰Hüwante muh jeiheinaolanne Paul hei Silas wangnyak me Berea te shonne tei, hüyange aope iman tüote pei, Jehudilan synagogue te ong.

¹¹Sha-a Thessalonica me ngohpulan phei tüome ngohpu Jewlan shemei she ngoh, hangjingne iman-e yeonge hoonglipu phei ngao yah, hüyange tüolan-a ütingne jeya she nyihjeih ngaolai me yam.

¹²Tüokhei iman maawe hüyange Greek üyonglan sheko maapuwe hüyange netanlan maapuwe meng.

¹³Hüyangpoi aope Paul-e Berea me-o Kahwang ngao konnyüo nangki she, Thessalonica me Jehudilanne shinge pei, iman-e tüoye me-o hüke muh peiye ükhong hengne tamme mop ngaine tam.

¹⁴Hüwante sha-a jeiheinaolanne Paul yengching nah ngoiye hüwante muh teine tam, hüyangpoi Silas hei Timothy ni Berea me muh ngoh.

¹⁵Hüyangpoi Paul lünge teipalanne I Athen ngoiye woipei, hüyange Silas hei Timothy nite I tangte okpu shinne mamshe peikei she ipu ngao yahyange iman yan.

¹⁶Sha-a Paul-e iman tanne Athen me ngohwante, chingnyuwa moung khümpuwe maawe ngeye, I yoi yaha yoi nying nyingke yeonge mongshih.

¹⁷Tüokhei synagogue me Jehudilan hei wanglamte ütinglakke mengpalan phei, hüyange nyih jeih she hatleih nyoi me I phei hüopalan phei Iye ngao saki phawe nyüo.

¹⁸Epikurean hei Stoic konnyüopalan ütam me-o I phei hüo. Ütamme i, “Hatüo jupang pawe hang ihupu?” Ülaolanne i, “I-a eihajat kahwanglan konnyüopa ja ne menghuwe.” Hangjingne Iye Jesu hüyange yange yepu jeng konnyüo.

¹⁹Tüokhei iman-e Areopagas sheshao me Paul woiteiye i, “Nange nyüopu ngaola hanghe tomane-o shinghu nangki.

²⁰Hangjingne yashan yalilak ngao ütam nange toman tangte yah pei. Tüokhei tüoyin hanghete leppu toman-e shinghu nangki.”

²¹Sha-a Athenlan hüyange tüome nyoi ngohpu yinpalan üshei nyihlao hipak toi hango yeling, hüyangpoi ngao üla ja ngaolak yejema-a jailak jingne hei nyoi.

²²Hüwante Paul-e Areopagas jempu yo me yongyange i: “Athenlan numan-a shemin lamphe me wanglam me yeonge wongnang she taowe nge ok nangki.

²³Hangjingne tao numan khümpu nyoijing leiye kemwante, ‘Yeshingpu kahwang ja jingne’ she nyanyange hüyange wümjong taowe nge. Tüokhei numan-e hanghe yeshingpe khümnang, numante taowe nyüowe tamnang.

²⁴Kahtoknyu hüyange tüome ngohpu khongküm lingpupa Kahwangne menge, yakke lingpu yopnoklan me I yengoh ja.

²⁵Yejema-a I ülamja wongpong ngohnang pukih, kahtalan yakke I shaoyeshan, hangjingne, Iye hei üsheite üyin lüo, hüyange toi üshei phanang.

²⁶Hüyange kahtoknyu tangme ngohlak jingne Iye kahta ja mepu jatlan linge ngai; nyih hei hipak hüyange iman kahmük yikeng ityange ngaitam;

²⁷tüokaiye iman-e Kahwang yamlak, hüyange iman-e I tüolak hüyange I phei iman ngohnang she, teihtamlak. Tüoyangpoi teman kahta lili mepu I jaiye yenang.

²⁸Hangjingne, “ ‘I me teman ngohnang, hüyange ponang, hüyange üyin ngohnang.’ Numan lokngaopa ütam-e ipuke, ‘Hangjingne teman-o Ime lickpu.’

²⁹Tüokhei Kahwang me lickpune menge Kahwange hon, khüm, long, yejema-a juteih meipu kahta kaiye lingpu kih teman-e yeteihlak yang.

³⁰Tüokhei yeshingpu hipak-a Kahwange hüke ang, hüyangpoi, shaapa-a üshei yeme kahta üsheiye monglüplak yang she Iye ngaokeng phanang.

³¹Hangjingne Iye lepu kahta jawe khakshupu me kahtoknyu ngao phünlak jingne Iye nyih ja leyangki, hüyange tüopa jengme, I lipu mepu yange ye tampu kai-e, kahta üsheite saki phayangki!”

³²Sha-a lipu mepu yangeyepu jeng aope iman-e jai, ütam-e phoiwüm, hüyangpoi ülaolanne i, “Hatüo jeng-a nang mepu toman-e üne-o ja me jailakei.”

³³Tüokhei Paul iman mepu yayonge tai.

³⁴Hüyangpoi kahta ütam-e I phei jam, hüyange meng. Iman yo me Areopagas yomepu Dionysius; hüyange sheko ja min Damaris, hüyange iman phei ülao lanno ngoh.