Read Konyak Naga LAMPULAN 18 Bible Online

LAMPULAN 18 - Konyak Naga bible

LAMPULAN 18

¹Tüophei me, Athen mepu Paul yayong hüyange Korinth ngoi.

²Tüome Pontus me puhpu, Aquila she minpu Jehudi ja hüo, ao Italy mepu I sheko Priscilla phei ü-o-we pei ngoi, hangjingne Ahngpa Klaudias kaiye Rome me ngohpu Jehudilan khongküm tailak jingne ngaokeng pha. Iman phei hüone Paul wen,

³hüyange iman phei I toishao ja ne menge, I iman phei ngoh, hüyange iman-e toiling; hangjingne iman-e nyenok weye nanhah ngoh.

⁴Sabbath lep iye synagogue me Iye saki phawe nyüo, hüyange Jehudi hüyange Greeklan yohlak jingne ngang.

⁵Aope Silas hei Timothy Macedonia mepu pei ngoi. Jehudilante Jesuwa Messiah üja she saki phawe konnyüolak jingne Paul-e hipak lanshe pha.

⁶Hüpoi aope iman-e iman nying nyingke I phei laawe yong hüyange Kahwang phoiwüm, Iye yoi inkhek mak konge imante i, “Numan iy numan yoi shangtang me ngohtüoh; tao jaowe ngohnang. Sha-a me peiye tao yinhulan tangte tailak.”

⁷Hüwante I tüomepu yayonge tai, hüyange Kahwangte khümpu yinhulan ja min Titas Justus nok, hanghe synagogue phei yupi ne muh ngoh, tüote I ong.

⁸Hüyange synagogue woipa Krispaswe Inok me ngohpu üshei phei Youngwanpate meng, hüyange Korinthlan maapuwe jaiye meng, hüyange baptitam.

⁹Yaja himang me Youngwanpawe Paulte i, “Tahnyam, hüyangpoi yelakpe ngaotüoh hüyange jünge tahngoh;

¹⁰hangjingne Tao nang phei ngohnang. Nangte üko shalak ne aowe-o yejanglak; hangjingne hatüo chingnyu me ü-kahtalan maangoh nang.”

¹¹Hüyange tüome I wangpeng ja lekeng wok iman yo me Kahwang ngao nyüowe nyoi.

¹²Hüyangpoi aope Akhaia me Gallio Governor ne ngoh, Jehudilanne mong ja ne sheiyange Paul phei tüi-e yong. Hüyange ngaophün jing shaome I woi peiye i,

¹³“Iman-e Ngaokeng phei tüi-e Kahwang khümlak kahta hatüowe kahtalan yohnangki.”

¹⁴Hüyangpoi aope Paul-e I juka ne she ngohwante, Galliowe Jehudilante i, “O Jehudilan, hatüo ütingme toimeng ja yejeküma-a lowelampu ja jengne jema-a, taowe numante jaihah shepu.

¹⁵Hüyangpoi hatüowe ngaoyin hüyange minlan hüyange numan yoi ngaokeng jeng teitongpune mengma-a, hatüopa-a numan-e numan nying nyingke leiyah. Hatüolan jeng ngao taowe yephünlak!”

¹⁶Hüyange ngaophün jing mepu Iye iman jangtei.

¹⁷Tüophei me iman üsheiye synagogue nokpu Sosthenes pho, hüyange ngaophün jing nokshao me Ite shet. Hüpoi tüolan jeng Galliowe hangko yeteih.

¹⁸Paul tüome nyoi yangphei me jeiheinaolan mepu yan, hüyange tüomepu Priscilla hei Aquila ni phei I Syriate yenglin me tai. Hüyange Iye Cenkhrea me I shanglin ne wen, hangjingne Iye jiengpu ja ngoh.

¹⁹Aope iman Ephesia ngoi, hüyange tüome Iye iman tüo; hüyangpoi I shaha synagogue te onge Jehudilante saki phawe nyüo.

²⁰Aope iman-e Ite iman phei nyih nyeiye nyoilak jingne tong, Iye yemong;

²¹hüpoi imante hüke iyange yayong, “Kahwange mongma-a, tao numan tangte nishe peiküpeih.” Hüyange yeng me I Ephesia te tai.

²²Hüyange Kaisarea me ngaiyange I Jerusalemte ong hüyange bumeinoklante salam pha, hüyange Antiok te lai.

²³Tüome hipak üjingha winyange I yan hüyange japhei me ja she Galatia hüyange Phrygia kahtok kaiye, pinlan üshei wongnang tamme tai.

²⁴Sha-a Alexandria me puhpu, ngaome yeonge wangngoipu, hüyange ngaolai yeonge shingpu, Jehudilan ja min Apollos Ephesia te pei.

²⁵Hatüo kahtawe Youngwanpa lam jeng me nyüowe okpu ngoh, hüyange yaha me lahnyikke Johnne baptitampu jeng shaha shingyapoi, Iye Jesu jeng khakshuwe ngaowe nyüo.

²⁶Hüyange Iye synagogue me wongnange ngaone wang. Aope Priscilla hei Aquila niye Iye ngaopu jai, iman-e I iman nokte woiye, hüyange Kahwang lam ünyei shuwe Ite khoih-e iye hüo.

²⁷Hüyange aope Iye Akhaiate taine tei, jeiheinao lanne I wongnangne tam, hüyange pinlan tangte I yahlak jingne lai nyanne tam, hüyange I ngoiyange, shüpshe kaiye mengpalante Iye yeonge jam.

²⁸Hangjingne Jesuwa Messiah ne ngoh she nyüowe, Iye Jehudilan-a chingyang ko me yeonge yeine tam.