Read Konyak Naga LAMPULAN 19 Bible Online

LAMPULAN 19 - Konyak Naga bible

LAMPULAN 19

¹Hüyange tüo ngai, Korinth me Apollos ngohwante, Paul-e ütokye kahmük lili kaiye taiphei me Ephesia te ngoi hüyange pin ütam tüo;

²hüyange imante tong, “Aope numan meng, Yaha Üjao tüoya ei?” Iman-e jan, “Yaha Üjao ngohnang she toman-e jai nehoi manjai.”

³Hüwante Iye i, “Hümma-a numan hanghe me bapti?” Hüyange iman-e i, “Johnne baptipu me.”

⁴Hüyange Paul-e i, “Johnne kahtalante I phei me peipu, hüke Jesute menglak yang she iye, monglüppe baptipuwe baptitam.”

⁵Hüyange iman-e aope tüopa jai, Youngwanpa Jesu min me iman baptitam.

⁶Paul-e I yakke imante shüngyange, iman tangte Yaha Üjao pei; hüyange iman-e ülao ngao me ngao, hüyange hi-ngao it.

⁷Iman khongkümpu penme ni nanjing ngoh.

⁸Hüyange Paul synagogue te ong, hüyange Kahwang Ahngching ngaolan jeng teilawe hüyange yoh-e lekeng lüm ngoiye wongnangpu phei Iye ngao.

⁹Hüyangpoi aope ütam üto-ülong hüyange ngao yejaipu lanne, hüyange ükhong sheshaome Youngwanpa lam jeng yemeipe ngao, I iman mepu yan, hüyange pinlan ülao ne ange Tairanas (Tyrannus) laipan me nyih jeih saki phawe nyüo.

¹⁰Hüke wangpeng ni linne tam, tüokhei Asia me ngohpu Jehudilan hüyange Greeklan üsheiye Youngwanpa ngao jai.

¹¹Kahwange Paul kaiye yashantoi ülaopa kih ling.

¹²Hüke Paul-e jonpu lümphot yejema-a nyeshoh dakpalan tangte yahteiye iman dakpu meitam-e hüyange ünu yahalan taipu okke ngoh.

¹³Hüyangpoi ünu yahalan jange wa kempu Jehudilan ütam-e ünu yaha ngohpalan tangme Youngwanpa Jesu min me nyik-e janglak jingne ngang. Iman-e ünu yaha te i, “Paul-e ngaopu Jesu min me ngailak jingne taowe nang te inang.”

¹⁴Jehudilan Ütahpa Ngengpa Seva ühalan naoshe nyitte hüke ling.

¹⁵Hüwante ünu yahawe janne imante i, “Taowe Jesu shingnang, hüyange taowe Paul jeng shing nang; hüyangpoi numan aoyinshi?”

¹⁶Hüyange ünu yaha ngohpu kahtawe iman tangme phaowe phet, iman üshei nao, hüyange imante hüke wong jonphei me iman tüopa nok mepu pümkeng me ma yahyange phette tai.

¹⁷Hatüo jeng Ephesia me ngohpu Jehudi hüyange Greeklan üsheiye shinge pei; hüyange Youngwanpa Jesu Khrista min müktishiwa ne tam.

¹⁸Iman yo me menge ngohpu sheyongpu jinge iman toi janne hüyange ponge pei.

¹⁹Hüyange hitoi lingpalan maapuwe iman laitep jamshe shaijemme kahta üshei sheshao me vünte jakküm. Iman-e hatüo pheei itte lei hüyange ngin haja denga jingne ngoh.

²⁰Tüokih-e Youngwanpa ngaowe yeonge jaalun hüyange okpu nge.

²¹Sha-a tüolan linyang phei me, aope Paul-e Macedonia hüyange Akhaia kaiye tai, Iye mongme Jerusalem te tailak tümyange i, “Tao tüoye me taiyang phei me, taowe Romete-o leilak wongpong.”

²²Tüokhei Ite paopalan yo mepu kahta ni, Timothy hei Erastus Macedoniate shon yangphei me, I yoi nying nyingke Asia me kenja ngoh.

²³Hüyange hatüo hipak ü-o me Youngwanpa lam jingne yeonge mop ngai:

²⁴Hangjingne khüm ai jonpa ja Demetrius she minyange Artemi kahwang khümjing me khüm yaowe, Iye toijonpalan jingne küw yeonge yenetam.

²⁵Iman tüopa toi jamuh jonpalan jamme jem ne tamyange Iye i, “Üyonglan, hatüo toishao kaiye teman moth tüonang she numan-e shing.

²⁶Hüyangpoi hatüo Paul-e, Ephesia me shaha yeje, hüyangpoi Asia kahtok üshei ye me, yakke lingpulan-a kahwanglan yeje she iye yohnang, kahta maawe lüppe yene tamteki, she numan-e ngenang, hüyange jainang.

²⁷Teman toishao hatüo jajang japune menglak ütuh shaha ne yeje, hüyangpoi kahwang üyongpa Artemis yopnok ye-ilak, hüyange Asia kahtok khongkümpu hüyange kahtoknyuwe khümpu I müktishiwa hei shemeipu mahne tamkülak.”

²⁸Hüyange aope ükhonge tüopa jai, hüyange üngwünne i, “Ephesialan Artemis üyongpa!”

²⁹Hüwante chingnyuwa moppuwe maa. Paul phei yinte kempu eihalan Macedonialan Gaius Aristarkhas iman-e phoyange, mong ja ne sheiyange wonjing kente shuwe phette jem.

³⁰Paul-e ükhong yo me I onghuwe teih, hüyangpoi pinlanne Ite tük.

³¹I shümpa Asia me nokpulan ütamme I wonpu yo me yulak jingne tahngang she tongpu ngaolan I tangte shon.

³²Tüokhei ütamme ngaoja, ütamme ülao ja she üngwün, hangjingne jempu nyoi moppuwe maa ngoh, hüyange sheyongpu jinge iman-a hangne jemme mop, yeshing,

³³Jehudilanne Alexander sheshao yete shunge yüowe, ükhong yo mepu I ngaine tam. Hüyange Alexanderwe yak honge kahtalan lakne tamme, kahtalante shupu ngao ne she ngoh.

³⁴Hüyangpoi aope iman-e I Jehudilan she shinge ok, üsheiye ja ne shüppe shayange ghonda ni nanjing üngwün, “Ephesialan Artemis üyongpa!”

³⁵Hüyange aope chingnyu yaknyanpawe ükhong moppu lakne tam, Iye i, “O Ephesialan! Ephesialan chingnyuwa Artemis üyongpa khümjing hüyange mounga wangdang mepu yüt she yeshingpu kahta ao ngohnangki?

³⁶Tüokhei tüolan jeng hango yejan oklak she shinge numan yemoppe ngohlak wongpong, hüyange hango mamme yelinglak yang.

³⁷Hangjingne khümjing lan mepu toi kuhleihpu yejepulan yejema-a teman kahwangte yephoipalan kahta tüolan numan-e tüome woipei yangki.

³⁸Tüokhei Demetrius hüyange I phei toilingpalan-e kahta ütam kaiye ngao ngaipune mengma-a ngaophün jingme epyange ngohnang, hüyange ngaophünpalan-o ngohnang: iman hei imanpa me teijanne tamtüoh.

³⁹Hüyangpoi numan-e ngao ülao jeng yamm-a, hatüopa-a jinte ngao ine jempu nyoime phünlak.

⁴⁰Hangjingne tenyih moppu jeng ngao ükong wangpu hango yenangpute, ütingme tomante-o ümeng phakülak wengtuh ngohnang; hüyange hatüo moppe jempu jeng toman-e hango üting ye-i-oklak.”

⁴¹Hüke Iye ngaoyang phei me, Iye jempuwa yanne tam.