Read Konyak Naga LAMPULAN 2 Bible Online

LAMPULAN 2 - Konyak Naga bible

LAMPULAN 2

¹Aope denga nyih mo ngoi, mengpalan üshei üken ja me jemme ngoh.

²Moksha me wangdang mepu wangyei wangyi leipu wüngke pei, hüyange iman shotte ngohjing noksa maa.

³Hüwante iman tangte vünkih yee shemme ngai, hüyange iman lili te pah.

⁴Hüyange iman üshei Yaha Üjaowe maa, hüyange Yahawe ngaitampuke mih ngao me ngao ne wang.

⁵Sha-a wangphang me ngohpu jat lili mepu peipu, wanglamte shangnyakpu Jehudilan Jerusalem me ngoiye ngoh.

⁶Aope iman-e tüopa wüng jai ükhong üyong jem; hüyange iman üshei yashan; hangjingne, kahta liliye yoi yoi ngao me iman-e ngaowe jai.

⁷Iman üshei nyam hüyange yashanne i, “Hatüo ngaopulan-a moilan Galilee lanne yeje a?

⁸Hümma-a hangke teman liliye yoi nyupuh ngao me jaipu shi?

⁹Teman-a Parthia, Media, hüyange Elam; Mesopotamia, Judea, hüyange Kapadosia mepu; Pontus hei Asia mepu,

¹⁰Phrygia hei Pamphylia mepu, Egypt hei Sairin ü-o mepu Libya kahtok nyoi mepu; teman ütam-a Rome mepu,

¹¹Jehudilan hei Jehudi ne mengpu yinhulan moini; hüyange teman ütam Krit hei Arabia mepu hüyangpoi Kahwange lingpu toi üyong teman liliye yoi ngao me iman-e ngaopu jainang!”

¹²Hüyange iman üshei yashan, hüyange üpong yetüope hüke teingao, “Hatüo hanghe te leppu?”

¹³Hüyangpoi ülaolanne yaowe i, “Iman wuwüngti üla-e jokyangpu yang.”

¹⁴Hüyangpoi Peter, penme ja phei yongyange, üngwünne imante ngaowe i, “Jehudilan hüyange Jerusalem me ngohpu üshei, hatüo numan-e shingyah, hüyange na epyange ü-ngao jaiyah.

¹⁵Hangjingne numan-e teihpukih hatüolan wuwüngti-e jokpu ne yeje, hangjingne sha-a napning tupaji nanjing hei ngohnang;

¹⁶Hüyangpoi hatüo jeng Joel hipawe ngaoyangki:

¹⁷“Kahwange i, üküm nyih me hatüo ngailak, kahtanyuha üsheite ü-Yaha shoktamlak; Numan hala yhala lanne ü-ngao pongtamlak, hüyange numan naoshe lanne himang ngelak, hüyange numan wupalanne mang manglak;

¹⁸Üting, hatüo nyih hei hipak me ü-shaoshanpu sheko hei netanlan tangme, Ü-yaha shokke tamlak, hüyange iman-e itlak.

¹⁹Hüyange ütangye wangme yashanpu, hüyange üphangye kahtok me kahnyingwüngha füo, iy, vün, hüyange vünkhuh ünyak Taowe hüolak.

²⁰Youngwanpa nyih üyong hüyange müktishiwa peishao me, wanghe nyakke mahlak, hüyange linnyu iy ne menglak.

²¹Hüyange hüke ngohlak, aoyinne Youngwanpa min me nyiklakei iman yinlak.”

²²“Israel kahtalan, hatüolan ngao jaiyah! Nazareth mepu Jesu kahta ja, aowe ütahpa üngan toishao, kahnyingwüngha, füo, hüyange üngan hanghepa Kahwange I kaiye ling, numante meimeiye hüoyangki; hatüo numan-e yoi nying nyingke shingnang, hangjingne hatüo numan yo me tüome lingyangki.

²³Hatüo Jesu, Kahwange wangngoipu juteih phei tümyangpu kih, numan-e tangpem me tak hüyange ünu kahtalan yakme toi ne tam.

²⁴Hüyangpoi Kahwange lipu lungsa lan, yange yene tam, hangjingne lipuwe I tükke anglak ye-oklak ne ngoh.

²⁵Hangjingne I jingne Davidte hüke i: “Youngwanpa-a Ü-sheshao me taowe jinte nge, hangjingne tao powe yetamlak jingne I ü yakjah yeme ngohnang.

²⁶Tüokheima ü-mongjang mongmeiye ngoh, hüyange ü yee mongong. Üne-o ü püm-o monghüm puphei ngohlak.

²⁷Hangjingne nange ü yaha yimchingme ye-anglak, yejema-a nange nang Üjaopa namme yeteilak.

²⁸Üyin lamnyulan nange üte hüo; Nang shongme nange tao mongmeiye maatamlak.”

²⁹“Jeiheinaolan, pajeiyong David jeng, I li hüyange mu, hüyange I mangjong tenyih ngoiye teman phei ngohnang she taowe numante ütingme ine ok.

³⁰Tüokhei hipa ja ne mengpu khei, hüyange I mepu ja I ahngpa shotjing me shotne tamlak she Kahwange Ite jiengpu shinge,

³¹Iye hatüo teihtüowe Khrista yange yepu jeng ngao; ‘hüke I yimching me ye-ang, yejema-a püm-o namne yetam.’

³²“Hatüo Jesu Kahwange yange yene tamyangki; hatüo jingne toman khongkümpu saki ngohnang.

³³I Kahwang yakjah yeme yange ye hüyange Ipawe janyangpu kih, Imepu Yaha Üjao, hüyange numan-e sha-a hanghe jai hüyange nge hatüowa Iye tomante shokke tampu hünghao.

³⁴Hangjingne David wangte woi ye-in, hüyangpoi Iye yoi nying nyingke i: “ ‘Youngwanpawe Ü-Youngwanpate i, Ü yakjah yeme shottüoh,

³⁵Taowe nang wepalan nang yalok jingne man-ang man-ang she.’

³⁶“Tüokhei tüopa Jesu ao numan-e tangpem me toi, Kahwange I Youngwanpane-o hüyange Khrista ne-o menge tam she Israel nokphong üsheiye ütingme shingyah.”

³⁷Aope iman-e tüopa jai, iman mongjang te shahpei, hüyange Peter hüyange ülao lampulan te i, “Jeiheinaolan, toman-e hang linglak shi?”

³⁸Peterwe imante i, “Numan ünu winlak jingne numan monglüptüoh, hüyange numan kahta liliye Jesu Khrista min me bapti tüoh, hüyange Yaha Üjao hünghao numan-e yahlak.

³⁹Hangjingne numan hüyange numan hayim, hüyange üjai me ngohpu üshei, hüyange Youngwanpa teman Kahwange hangshin I tangte nyiklakei tüolan jingne janpu ngohnang.”

⁴⁰Hüyange ülao ngao maapuwe Peterwe saki pha, hüyange imante henge i: “Hatüo ümengpa jin mepu numan-e numan nying nyingke yinyah!”

⁴¹Tüokhei aoyinne I ngao yah imante baptiye tam, hüyange tüonyih kahta haja lüm nanjing iman phei om.

⁴²Hüyange iman-e iman nying nyingke lampulanne nyüopu jaiye, hüyange shüppe shapu me, hahyingpu me hüyange yoppu me hipak phünne pha.

⁴³Hüyange kahta lili tangte nyampu pei; hüyange lampulan kaiye yashanyali hüyange kahnyingwüngha füo maawe ling.

⁴⁴Hüyange mengpalan üshei jamme ngoh, hüyange toiheinan lili eimon jingne meng;

⁴⁵hüyange iman-e iman me nangpu hüyange toinan yao, hüyange kahta lilite wongpong ne mengpu ityange iman-e üsheite tamme pha.

⁴⁶Hüyange nyih jeihshe mongjang ja phei iman-e yopnok me jem hüyange iman nokme an linge hah, iman-e mongongpu hüyange hoonglipu mongjang phei nük hah.

⁴⁷Kahwang te yihlupu phawe hüyange kahta üsheiye imante meiye teih. Hüyange nyih jeihshe yinyangpulan shangtoi Youngwanpawe iman phei paowetam.