Read Konyak Naga LAMPULAN 20 Bible Online

LAMPULAN 20 - Konyak Naga bible

LAMPULAN 20

¹Hüyange moppu lakphei me Paul-e pinlan nyikne shonne imante hengyang phei me, Iye imante salam pha hüyange Macedoniate taine yan.

²Hüyange Iye tüoye kahmüklan kaiye taiye imante hengpu ngao yeonge phayang phei me, I Greece kahtok Akhaia te pei.

³Aope I tüome lekeng lüm ngoh, hüyange Jehudilanne I phei tüi-e konmeng ja kon, Iye Syria yete yenglam me taine she ngohwante, Macedonia kaiye leih yelak mong.

⁴Hüyange Berealan, Pyrrhus üha Sopater, hüyange Thessalonicalan Aristarkhas hei Sekundus; Derbe mepu Gaius; Timothy; hüyange Asia kahtok mepu Tychius hei Trophimus I pheite woi.

⁵Hüyangpoi tüolan-a shaoyete tai, hüyange Troas me toman tanne ngoh.

⁶Hüyange do yelangpu an mo nyih hei hipak linphei me, toman Philippi mepu yenglam me tai, hüyange nyih nga mongme iman tangte Troas, ümeken me toman-e nyih nyit nyoi, tüote pei.

⁷Hüyange hatwok ya aope an tümme hahne toman jamshe jemme ngoh, Paul-e ngainyih yantailak she teih-e, imante konnyüo, hüyange I ngao phawo ngoiye yelakpe ngao.

⁸Toman jamshe jempu ütangpa tüpme vüntük üngang pah ngoh.

⁹Hüyange Eutykhas she minpu naoshe ja tawo phei tinge shotyange yeonge shihu. Hüyange Paul-e üne-o shelao she konnyüopuwe, üküm yeme shimah; nok shinpa tüp lüm shepupa mepu I yeita, hüyange ümang me yah in.

¹⁰Hüwante Paul-e yuwe I me neang, hüyange I me künne i, “Numan mongtahpong, hangjingne Ime üne-o üyin ngohnang!”

¹¹Hüyange Paul tüpte ongphei me, an tümme hah, hüyange üne-o laowe, wang manngai manngai she iman phei ngao yang pheime, I yayong.

¹²Hüyange iman-e naosheha-a üyinme yah taiye, iman mong yeonge toloimei.

¹³Toman shaoyete yenglin me tai hüyange Asos te ngoi, tüomepu Paul üjaite woihuwe teih-e, hangjingne ya me kemlak teih-e, Iye hüke tüm.

¹⁴Hüyange aope Iye toman Asos me hüo, toman-e I woi hüyange Mitylene te pei.

¹⁵Tüomepu yenglin me taiye, üne nyih Chios ü-o me ngoi. Hüyange üne nyih Samos ngoi-e tüopa nyih linyang phei me toman Miletus ngoi.

¹⁶Hangjingne Paul-e Asia me hipak yewinlak ne, Ephesia me konne yenglin me tailak Iye mongyange ngoh. Hangjingne okma-a denga nyih mowa I Jerusalem me ngohlak mamme teih ngoh.

¹⁷Paul-e Miletus mepu kahta ütam shonne Ephesia mepu bumeinok jeiyonglan I phei hüokei she i.

¹⁸Hüyange aope iman I tangte peingoi, Iye imante i, “Tao Asia me üyalokpu üwangpa nyih mepu, numan phei hipak üshei me hangke ngoh, numan-e shing;

¹⁹hüyange yeonge innyaipu phei, mükphi yinpu phei hüyange Jehudilan kon kaiye ü-tangte shange pongpu peipu phei, hangke taowe Youngwanpa shaoshan numan-e numan nying nyingke shing.

²⁰Numan jingne hanghepa küw ngoh hatüo numante shingne tamlak jingne hangke tao yenyam, hüyange chingyangko me hüyange nok ja mepu nok ja te taiye taowe numante nyüo.

²¹Hüyange Kahwang yete monglüplak hüyange teman Youngwanpa Jesu Khrista yete menglak jingne Jehudi hei Greeklan moilan te taowe saki pha, hatüo-o numan-e shing.

²²Hüyange sha-a, tüoken me üte hanghe ngailakei yeshingpe, Yaha Üjao nyingme yah-e tao Jerusalemte tainang.

²³Hüyangpoi shapu hüyange shangne tampuwe tao tannang she Yaha Üjaowe chingnyu phe phe me saki phanang she taowe shing.

²⁴Hüyangpoi taowe yengoilak ken ngoi oklak jingne, hüyange Kahwang shüpshe pungao ümei jeng saki phalak taowe Youngwanpa Jesu mepu shaoshanlak jingne yahpu sholak jingne ling; tüokhei taowe Ü-üyin-a ü-nying nyingke toinyu she hango teih-e yenang.

²⁵“Sha-a leiyah, numan aoyin yo me taowe Ahngching jeng konnyüowe kem; numan üsheiye shaaji ü-sheta nishe ye-ngelak she taowe shing.

²⁶Tüokhei kahta üshei iy mepu tao jaowe ngohnang she numante tenyih taowe saki phanang.

²⁷Hangjingne Kahwang konngao khongküm numante taowe yengaope yengoh.

²⁸Youngwanpawe yoi iy kaiye shakpu bumeinok paolak jingne, hanghe me Yaha Üjaowe numan nyeeyompalan ne menglak jingne le, hatüo nyee ükhong hüyange numan jingne kentingyah.

²⁹Tao yanphei me, mengshipu sholan, nyee ükhongte yeshüpshepe numan yo me ongkülak she taowe shingnang.

³⁰Hüyange komküyakpu ngao ngaowe iman yo me pinlan woiye teilak jingne numan yoi ükhong yo mepu kahtalanne yonglak.

³¹Tüokhei wangpeng lüm ngoiye kahta lilite mükphi yinne wangnyak wangngai yeshingpe taowe yelakpe nyüo she teihtüowe numan-e yomme ngohyah.”

³²“Hüyange sha-a Kahwang hüyange I shüpshe ngao hanghepawe numan jongne tampu ok hüyange numan yo me aoyinne phünne phanang, tüolan üsheiye mothleilak jingne taowe nying tüoh nang.

³³Taowe kahta ao jing khüm hei hon yejema-a o ümei yewao.

³⁴Taowe ü-yakke ü-phei ngohpalan jingne hüyange ü-wongpong jingne lingshe numan-e numan nying nyingke shing.

³⁵Hüke linge numan-e wong yenangpalante paolak wongpong she, hüyange Youngwanpa Jesuwe, ‘Yahpu pheiya phapupa ünyei moimanpu’ she yoi nying nyingke ngaopu ngaolan teihtüolak jingne, taowe numante üshei me leppu ja pha nang.”

³⁶Hüyange hüke ngaoyang phei me, I yatuhshing hüyange iman üshei phei yop.

³⁷Hüyange iman üshei shap hüyange Paul üngme ken hüyange Ite omhüp;

³⁸Iman-e shaaji I sheta ye-ngelak she Iye ipu ngao jingne ünyei iman sheyongpu jing mongmenge shap. Hüyange iman-e I yenglin ngoiye lüngetei.