Read Konyak Naga LAMPULAN 22 Bible Online

LAMPULAN 22 - Konyak Naga bible

LAMPULAN 22

¹“Jeiheinaolan hüyange üpa yiman, taowe sha-a numan shaome tao shuwe ngohpu ngao ipha ning jaitüoh!”

²Aope Iye Hebrew me imante ngaowe jai, iman-e ünyei yemoppe wünge lak. Hüyange Iye i:

³“Tao Jehudi kahta ja, Cilicia me Tarsas chingnyu me tao puh, hüyangpoi Gamaliel konnyüopa phangme naha ja ne tüopa Jerusalem me shingmanne jong. Teman puyimlan mepu ngaokeng wanpu jeng taowe tüo, hüyange tenyih numan üshei yongpu kih tao Kahwang jingne yeonge lahnyikke ngohyangki.

⁴Hüyange hatüo lam me aoyin woi taowe lilakne netan hei sheko moilan shayange küpnok me ange shaoshine tam.

⁵Hatüo jeng Ütahpa Ngengpa hüyange jeiyonglan-o üshei ü-saki ngohnang. Iman mepu taowe jeiheinaolan jingne nyanpu lai yah, hüyange tüome ngohpalan shangne tamlak jingne Jerusalem te shayange woipeilak jingne tao Damascus te tai.”

⁶“Hüyange hatüo ngai, tao aope Damascus ü-o ngoi, nyihning hipak me, mokh she ü-neikon-e wangdang mepu, wangngai üyong ja teetam.

⁷Hüwante tao kahtokte yei, hüyange ngao jawe üte ngaowe jai, ‘Saul Saul! Hangjingne nange tao shangne tampu?’

⁸Hüyange taowe jan, ‘Youngwanpa, nang ao shi?’ Hüyange Iye üte i, ‘Nange shangne tampu Nazarethlan Jesu tao.’

⁹Hüyange ü-phei ngohpalanne wangngai ütingme nge, hüyangpoi aowe üte ngao I ngaowüng iman-e yejai.

¹⁰Hüyange taowe i, ‘Youngwanpa, taowe hang linglak shi?’ Youngwanpawe üte i, ‘Yayong tüoh, hüyange Damascuste ongtüoh, nang jingne hanghe linglak tümyange ngohnang, tüoyin khongkümpu jeng tüome nangte ilak.’

¹¹Aope wangngai ütee kaiye taowe hango ye-ngepe ngai, ü-phei jamme ngohpalanne, yak me shuiyange Damascus te inne tam.

¹²“Hüyange ngaokeng me ngohpukih wanglam te kenpu, tüome ngohpu Jehudilan üsheiye minyonge ngaohümpu kahta ja Ananias ü-tangte pei;

¹³hüyange ü-shongme yongyange üte i, ‘Jeiheinao Saul, nange nishe ngetüoh.’ Hüwante muh taowe I nge.

¹⁴Hüyange Iye i, ‘Teman puyimlan Kahwange Iye mongpu shinglak, hüyange ütingpa ngelak, hüyange I jumepu ngaowüng ja jailak, nang leyangki.’

¹⁵Hangjingne nange hangyin ngeyangki hüyange jaiteki hatüo jeng kahta üshei tangte I jingne nang saki ne menglak.

¹⁶Sha-a nang hangne tanne ngohlak? ‘Yayong tüoh, hüyange I min me nyik-e baptitüoh, hüyange nang ünu poitüoh.’

¹⁷“Aope tao Jerusalem te leihye hüyange khümjing me yoppe ngoh, tao mükngoih shonge tawante himang ja nge,

¹⁸hüyange üte i, ‘Mamyah hüyange Jerusalem mepu mamshe taitüoh, hangjingne iman-e nang mepu üjing saki yeyahkülak.’

¹⁹Hüyange taowe i, ‘Youngwanpa, synagogue lili me nangte mengpalan taowe küpnok me küo hüyange shet she iman-e iman nying nyingke shing.

²⁰Hüyange aope nang saki phapu Stephen toi, tao-o ü-o me yongyange ümonghah-e ngoh, hüyange I toipalan nyemo taowe jonne ngoh.’

²¹Hüwante Iye üte i, ‘Taitüoh, hangjingne Yinhulan tangte üjaite taowe nang shonlak.’ ”

²²Tüopa ngao ngoiye hei iman-e jai, hüyange iman-e ngao üyong ngaiye üngwünne i, “Tüokihpu kahta kahtoknyu mepu yanne tamtüoh! Hangjingne I üyin ngohlak yewang.”

²³Hüyange iman-e üngwün, hüyange iman inkhek khokke yüp, hüyange wangyete kahmak puishüp.

²⁴Haja woipawe hanghe jingne iman-e I phei tüi-e üngwün tüo shinglak jingne, hüyange Ite shette ngao tonglak jingne, I yomtep te woi inlak ngao pha.

²⁵Hüyangpoi aope iman-e Ite shetlak jingne sha, I shongme yongpu ghoja woipate Paul-e i, “Nange Rome nyupuh kahta ja, ao te ümeng yepha, Ite shetlak shupu heiya yeshupu shi?”

²⁶Aope ghoja woipawe tüo ngao jai, haja woipa tangte wenne i, “Nange hang linglak she ngohnangki? Hangjingne tüopa kahta-a Rome nyupuh yang”!

²⁷Hüyange haja woipa wenne Ite i, “Üte ipha, nang Rome nyupuh a?” Iye jan, “Üm.”

²⁸Hüwante haja woipawe jan, “Ngin yeonge phayange taowe tüopa nyupuh kahta ne meng.” Hüwante Paul-e i, “Hüyangpoi taowa puhnap memuh Rome nyupuh.”

²⁹Hüwante aoyinne Ite ngao tongne she ngoh, iman hüwante muh I mepu yan. Hüyange aope haja woipawe I Rome kahta she shing, I nyam, hangjingne Iye Paul te shayangki.

³⁰Hüyangpoi üne nyih, hangne Jehudilanne Ite ümeng pha, hatüo meimeiye shinghuwe haja woipawe I lan. Hüyange ngengpa üjenglan hei Pangshanlan üshei jam-e jemne Iye ngaopha, hüyange Paul woipeiye iman shaome angne tam.