Read Konyak Naga LAMPULAN 23 Bible Online

LAMPULAN 23 - Konyak Naga bible

LAMPULAN 23

¹Paul-e Ngengtüp te tingkhakke leiyange i, “Jeiheinaolan, tenyih ngoiye Kahwang shongme juteih mongjang ümei me hei tao ngoh wenyangki.”

²Hüwante Ütahpa Ngengpa Ananiaswe I shongme yonge ngohpalante Paul jute eptüoh she ngaokeng pha.

³Hüwante Paul-e Ite i, “Nang jan ühengpa, Kahwange nangte shetlak! Ngaokenge ü-ngao phünne nang shotyange, hüyange ngaokeng püoh-e üte eppe tamlak nange ngaokeng phanangkü a?”

⁴Hüwante Paul shongme yonge ngohpu lanne i, “Nange Kahwang Ütahpa Ngengpa te teetam nang!”

⁵Hüyange Paul-e i, “Jeiheinaolan, I Ütahpa Ngengpa she taowe yeshingpe ngoh, hangjingne hatüo nyanne ngohnang, ‘Numan kahtalan tangme wanglam lampa ja te nange ümeng tahngao.’ ”

⁶Hüyangpoi aope Paul-e iman ütam Sadduceelan hüyange ütam Phariseelan she nge ok, Iye Ngengtüp te üngwünne i, “Jeiheinaolan, tao-o Pharisee ja hüyange Pharisee üha ja. Lipalan monghümlak hüyange yange yepu jeng me ü-ngao phünnang.”

⁷Iye hüke ngaoyang phei me, Phariseelan hei Sadduceelan pa me teepu ngai, hüyange jempuwa tamme ngai.

⁸Hangjingne Sadduceelanne yange yepu, yejema-a wangdang shongmokpa jeya, Yaha jeya yenang she inang; hüyangpoi Phariseelanne tüolan moilante üting laknang.

⁹Tüokhei moppu üyongne ngai, hüyange Phariseelan ükhong yo mepu ngaokeng nyüopalan ütam yonge yeonge wanne i, “Hatüo kahta me toman-e hang ümengo ye-nge, hüyange yaha jawe yejema-a wangdang shongmokpa jawe Ite ngaoyangki she ima-a hang ngoh nangki?”

¹⁰Aope teepuwa yeonge yemeipe ngai, iman-e Paul khoihnyaiye hittamlak she nyamme, haja woipawe kengphetlan yu ne tam hüyange iman yomepu I nyieye yomtep te woi inlak jingne ngaopha.

¹¹Hüyange tüoya Youngwanpa I shongme yongyange i, “Wongnang yah, hangjingne Jerusalem me nange ü-jeng saki phapukih, Rome me-o hüke nange saki phalak yang.”

¹²Aope wangngai, Jehudilan ja ne meng, hüyange iman-e Paul mantoi mantoi hah-o yehahlak, ying-o yeyinglak she iye, iman yo me teijiengpu yah.

¹³Tüopa konmeng konpulan-a iman deli phei nyeiye ngoh.

¹⁴Hüyange iman-e ngengpa üjenglan hüyange jeiyonglan tangte peiye i, “Toman-e Paul mantoi mantoi hango yehahlak jingne, toman-e ngao üyongne teijieng yangki.

¹⁵Tüokhei numan-e sha-a Ngengtüp phei haja woipa omme I ngao ünyei shopu phünne ngaolakei she iye, Iye I numan tangte woipeikei she tongtüoh. Hüyange Iye numan shongte manpeipe, toman-e I toine tümyange ngohnang.”

¹⁶Hüyangpoi Paul ülishepawe iman-e doyu ne ipu jeng jai, hüyange yomtep te onge Paulte i.

¹⁷Hüwante Paul-e ghoja woipa ja nyik-e peiye i, “Tüopa naoshe haja woipa tangte woitei tüoh, hangjingne Iye Ite ülam ja ilak ngohnang.”

¹⁸Tüokhei Iye yoi haja woipa tangte woiteiye i, “Küpnok me ngohpu Paul-e I tangte tao nyik, hüyange hatüo naoshe, aowe nangte ülam ja ilak ngohnang, I nang te woipeilak jingne tong.”

¹⁹Hüyange haja woipawe Ite yakme jonyange woiyah hüyange lowe tong, “Nange üte hanghe ilak ngohnang ki?”

²⁰Iye i, “Ngainyih ngengtüp shaome Paul yah laine tamkei she, hüyange hüke ngohyahpoi I jeng ünyei üpong tüowe yamhu nangki she nangte lowelamme tam-e tonglak jingne Jehudilanne mongtepu.

²¹Tüokhei iman-e nang yohne tahtam, hangjingne iman deli phei nyeiye Ite doyulak jingne shotte ngohnang. Iman-e I mantoi mantoi hah-o yehahlak, ying-o yeyinglak ngao jiengyange ngoh nang. Shaa-o iman-e nangmepu janpu tanne tümme ngohnang.”

²²Haja woipa i, “Nange üte tüolan ngao shingne tam she aote-o tah i.” Hüyange Iye naoshepa taine tam.

²³Hüyange Iye ghoja woipa ni I tangte nyik-e peiye i, “Teya tupaji hipak nanjing me yayonglak hüyange Kaisarea ngoilak jingne, kengphet gho ni, koipong me shotpu denyit, hüyange ngou jonpu kahta ghoni tümne tamtüoh.

²⁴Hüyange Paul shotlak jingne koipong tümtüoh, hüyange Governor Felix tangte yeonge meiye woiteilak jingne Iye i.”

²⁵Hüyange Iye laija hüke nyan:

²⁶“Üshei tangte üyongpa Governor Felix tangte Laudius Lysiawe salam shonnang.

²⁷Hatüo kahta Jehudilanne pho hüyange patoi she ngoh. Taowe Iya Rome nyupuh she jai, tüokhei Ü-kengphetlan phei tao tai hüyange I yin.

²⁸Hüyange iman-e I hangke ngohtüoh-e ümeng ne i, hatüo shinghuwe, iman ngengtüp shaote taowe I woipei.

²⁹Hatüome iman ngaokeng teitongpu jengme I ümengne i, hüyangpoi I lilakne yejema-a küpnok me anglak ne I me ümeng hango yenang she taowe yam ok.

³⁰Hüyange aope Jehudilanne I phei tüi-e ümeng lingne tümnang she üte shingne tam, taowe I nang tangte shonlak jingne mongyangki. I phei tüi-e yongpalan te-o nang sheshao me I jeng itüoh she taowe iyangpu.”

³¹Tüokhei imante ngaokeng phapuke, kengphetlanne Paul yah hüyange wangnyak me Antipatris tangte I woitai.

³²Hüyangpoi üne nyih iman-e koipong me shotpalan I phei taine tüoh, hüyange iman yomtep te leih ye.

³³Aope iman-e Kaisareate pei hüyange nyanpulai Governor te pha, hüyange Paul-o I shongme yongne tam.

³⁴Hüyange nyanpulai iyang phei me, Iye I ümpehepa kahtok mepu she tong. Aope Iye I Cilicia mepu she shing;

³⁵Iye i, “Aope nangte ümeng phapalan peilakeih, taowe nang ngao khongkümpu jailak.” Hüyange I Herod ahngpa nokme angtüoh she ngao pha.