Read Konyak Naga LAMPULAN 24 Bible Online

LAMPULAN 24 - Konyak Naga bible

LAMPULAN 24

¹Nyih nga ngohyang phei me, jeiyonglan ütam hüyange Tertullus she minpu ngao iye okpu kahta ja phei Ütahpa Ngengpa Ananias lai, hüyange iman-e Paul phei tüi-e Governor tangte ngao pei.

²Aope Paulte nyik Tertulluswe I yeshupu jeng iye wang: “Üshei tangte üyongpa Felix! Nang kaiye toman-e toloimei üyong tüowe, hüyange nange paowe tongpu jingne tüopa jat jingne ümeng hango peine yetampe lintampu nanjingne;

³toman-e hatüolam üshei me hüyange kenphe me yeonge monghah yah nangki.

⁴Taowe nang hipak meiyang yewinhu, nange toman ngao üjingha chingmei lamlinge jailak jingne taowe nangte tongnang.

⁵Hangjingne hatüowa pokke nopu phapu kahta ja, hüyange kahtoknyu üshei me Jehudilan mopne tampu ja, hüyange Nazarene ükhong woipa üjengpa ja she toman-e ngeye peiyangki.

⁶Tüokaiye Iye khümjing nehoi nuwe tamne ngang. Hüyangpoi toman-e I pho. (Toman-e toman ngaokeng ke Ite phünhu,

⁷hüyangpoi haja woipa Lysia peingoi, hüyange yakyuwe toman mepu I yahtei.

⁸Tüophei me Ite ümeng phapalan nang tangte peilak jingne Lysiawe ngaopha.) Nange tüopa kahtate tongküme, toman-e hangjingne I ümengne i, tüolan nang nying nyingke shinglak.”

⁹Hüyange Jehudilanne-o tüolan-a üting üja she iye, I ümengne ipu me omme yong.

¹⁰Aope Governorwe Iye ngaolak jingne yak tonne i, Paul-e jan: “Wangpeng nangjange tüopa jat jingne nang ngao phünpa ja ne menge pei she taowe shingyah-e, taowe ü-ümeng tienpu ngao ine mongmei nang.

¹¹Hangjingne tao Jerusalemte yoppe khümne ongyang phei me tenyih iye nyih penme ni phei nyeiye mantaishe nange shingne ok.

¹²Hüyange khümjing me jeyah, synagogue me jeyah, hüyange chingnyu me jeyah tao ao phei-o ngao moppu, yejema-a ükhong mopne tamme iman-e ye-nge.

¹³Yejema-a sha-a hanghe jingne iman-e tao ümengne i hatüo nangte iman-e ngaoting she hüone ye-ok.

¹⁴Taowe nang te jannang: Iman-e yeshu she ipu Lam teman puyimlan Kahwangte taowe khümnang; Hüyangpoi ngaokeng me ngohpu ngaolan khongkümpu hüyange hipalan laitep me hangyin nyanne ngoh tüolante taowe mengnang.

¹⁵Hüyange üjaolan hüyange ünulan moini yange yelak she imane-o monghümme ngohpukih, taowe Kahwangte monghüm nang.

¹⁶Tüokhei Kahwang hei kahta ye me jinte juteih mongjang ümei ngohlak jingne tao-o ü-nying nyingke ngang nang.”

¹⁷“Wangpeng nangjange Jerusalem mepu yanne ngohyang phei me, ü-jat jingne hünghao hüyange dopu peiye tamlak jingne tao pei.

¹⁸Tüoyin phawe ngohwante iman-e khümjing me tao jaoweshapu nge, hüyangpoi ükhong phei yeje, yejema-a üne-o moppe yeje. Hüyange Asia mepu Jehudilan ütam ngohyangki.

¹⁹Iman-e ü-phei tüi-e ngao ngaima-a, tüome nang tangte woipei hahshepu, hüyange iman-e iman nying nyingke tao ümengne ihah shepu.

²⁰Yejema-a aope tao Ngengtüp sheshaome yong, hang ümeng üme nge tüome yonge ngohpu tüolan kahtawe min ikei.

²¹Tao aope iman sheshao me yong, ‘Lipulan yange yelak she taowe mengpu jingne tenyih numan-e üte ngaophün nang’, she taowe üngwün.”

²²Hüyangpoi Felix, aowe Lamjeng meimeiye shingyange ngoh, iman ngao lakne tamme i, “Aope haja woipa Lysia ngoilakei, numan ngao taowe phünlak.”

²³Hüyange Iye ghoja woipate Paul küpnok me anglak, hüyangpoi I kemme yongne tamlak, hüyange I shümpalan ao te-o Ite paolak mepu tahkhüm she ngaopha.

²⁴Nyih ütenja linphei me, Felix I shekonyu, Jehudi yha Drusilla phei pei, hüyange Paul nyik-e Khrista Jesu me ütinglakpu jeng I mepu jai.

²⁵Hüyange ütingpa jeng yoi nying nyingke tükke okpu, hüyange Ngoikülak ngaophünpu nyih jeng Iye saki phawe ngaowante, Felix yeonge nyam, hüyange janne i, “Tenyihpu jingne-a hüke jataitüoh. Üte meipu hipak ja me taowe nang ü-tangte nyikpha peih.”

²⁶Paul-e Ite ngin phakülak she Iye monghümme, tüojingne I nyikne shonkhan shonne I phei teingao.

²⁷Aope wangpeng ni ngoi pei, Felix nanleiye Porcius Festus Governor ne meng; hüyange Felix-e Jehudilanne Ite kenne tamhuwe Paul küpnok me tüoh.