Read Konyak Naga LAMPULAN 25 Bible Online

LAMPULAN 25 - Konyak Naga bible

LAMPULAN 25

¹Festus tüopa kahtokte pei pheime, nyih lüm ngohyange Kaisarea mepu Jerusalemte ong.

²Hüyange ngengpa üjenglan hei Jehudi woipalanne Ite Paul phei tüi-e ngao shingne tam.

³Iye Jerusalemte Paul nyik-e peilak jingne iman-e Ite yoppe tong, hüyange lamme I toilak jingne iman-e konkon.

⁴Hüyangpoi Festus janne i: “Paul Kaisarea me phowe angnang, hüyange tüoyete tao mamshe leih yelak.

⁵Tüokhei Iye i, numan yo me aoyin üjenglan ngohnang, ü-phei laihah, hüyange kahtawe ülamja nehoi püohpu ngohma-a, iman-e I ümeng phone tamtüoh.”

⁶Festus, iman phei nyih tet yejema-a nyih pen yengoipe nyoi, hüyange tüophei me Kaisareate tai, üne nyih I ngaophün jingme shot, hüyange Paul woi peilak jingne ngaopha.

⁷Hüyange aope Paul peingoi, Jerusalem mepu peipu Jehudilanne I neikonne yong. Hüyange ngaoting she hüone ye-okpu ngaolan üyong maawe I phei tüi-e yahpei.

⁸Hüwante Paul-e I tienne i, “Jehudilan ngaokeng phei tüi-e jeyah, khümjing phei tüi-e jeyah, yejema-a Kaisar phei tüi-e jeyah taowe hang ümengo üjingha nehoi ye-om.”

⁹Hüyangpoi Festuswe Jehudilan mongmeine tamhuwe Paulte janne i, “Nange Jerusalemte onglak hüyange tüome ü-sheshao me tüolan ngao phünlak monge ngohya?”

¹⁰Hüyangpoi Paul-e i, “Kaisar ngaophün jingme, ümeken me ü-ngao phünlakne ngoh, tüopa tangme tao yongyange ngohnang. Nange meiye shingpuke Jehudilante taowe hang ümengo yeling.

¹¹Tüokhei tao ümeng lingpu ja ne mengma-a, hüyange lilak wange ülam ja nehoi lingyange ngohma-a, tao minli she ye-ilak. Hüyangpoi iman-e hanghe üne tao ümengne i, hatüolan-a ja nehoi üting yejema-a aowe-o iman yakme tao phünne phapu ye-ok. Taowe Kaisar ngoine ngaolak.”

¹²Hüwante yoijing ngengtüplan phei shenpong yange Festus janne i, “Nange Kaisar (ahngpa) ngoiye ngaolak she iyangki; nang Kaisar ngoiye tailak wongpong.”

¹³Sha-a aope nyih ütenja linteiye ngoh, Ahngpa Agrippa hei Bernice ni Festus te wangshüm hüolak jingne Kaisareate peingoi.

¹⁴Tüome nyih nangjange iman nyoi ngohwante, Festuswe ahngpa shaome Paul ngaojeng ngaiye i, “Felix-e tüome kahta ja küpnok me tüoyange tai;

¹⁵hüyange aope tao Jerusalem me ngoh, Jehudi ngengpa üjenglan hüyange jeiyonglanne üte ngao shingne tamme, I phei tüi-e ngaophünlak jingne tong.

¹⁶Hüpoi taowe imante janne i, Romelan wanglam me yeshuja she lapukhong sheta teihüowe metpawe-o I phei tüi-e ngaipu ngaote tienpu ilak hipak ümei mantüo mantüo, kahta aowe-o phünne phalak she yenang.

¹⁷Aope iman üshei tüome jem, tao shonne yengohpe ünenyih muh ngaophün jingme shot, hüyange kahta-a woipeilak jingne ngaopha.

¹⁸Hüpoi aope I phei lapukhong yong, taowe teihpu kih ngaomeng jeng hanghe-o yeitampu iman-e yah yepei ok.

¹⁹Iman teimoppu liliya iman yoi yoi mengpu wanglam jengme hüyange litepu Jesu she minpu kahta ja Paul-e tüopa üyin me ngohnang ja she ipu jeng me iman mopngai.

²⁰Hüyange taowe tüolan jeng hangke ngaoponga yamlak teihpu yetüope, Paulte Jerusalem te taiye tüome tüolan ngao phünlak jeya she taowe tong.

²¹Hüwante Paul-e Ahngpawe ngao phünpu tanne ngao ilakei, she ipu jingne, taowe I Kaisar tangte manshon manshon tanne anglak jingne ngaopha.”

²²Hüyange Agrippawe Festus te i, “Taowe-o ünawe tüopa kahta mepu jaihu nangki.” Hüyange Festus i, “Ngainyih nange I ngao jailak.”

²³Tüokhei üne nyih aope Agrippa hei Bernice yeonge müktishiwa puphei pei, hüyange iman-e haja woipalan hei chingnyu me üjengne ngohpu kahtalan phei chingjem jingte ong. Festuswe ngaophawe Paul woipei.

²⁴Hüyange Festus i: “Ahngpa Agrippa, hüyange tüome toman phei omme ngohpu kahta üshei, Jerusalem me hüyange tüome-o Jehudilan ükhong khongkümpuwe I shaaji üyin angne yetamlak she üngwünne, ao phei tüi-e ngaopei, tüopa kahta numan-e ngenang.

²⁵Hüyangpoi lilak wange Iye hango yeling she taowe nge, hüyange Iye yoi nying nyingke ütahpa Ahngpa ngoiye ngaolakei she ipu jingne, taowe I shonlak jingne mongyangki.

²⁶Hüpoi I jeng ü-nokpupa tangte taowe hüke ilak shepu ngao hango yenyan ok. Tüokhei tokyang phei me taowe ülam ja nehoi nyanlak ne ngaiyalak jeyapu she, numan sheshao me, hüyange ünyei ne nang tangte, Ahngpa Agrippa! taowe I yüoyangki.

²⁷Hangjingne küpnok me ngohpu ja teiwante, I phei tüi-e ngaipulan shingne yetampe teilaka yeshupu toi she taowe teihnang.”