Read Konyak Naga LAMPULAN 26 Bible Online

LAMPULAN 26 - Konyak Naga bible

LAMPULAN 26

¹Hüwante Agrippawe Paulte i, “Nange nang nying nyingke nang jeng ilak jingne phanang.” Hüwante Paul-e yak hong yange I shuwe ngohpu ngao ine wang:

²“Ahngpa Agrippa! Jehudilanne tao hangjingne yeshushe i, tüopa khongkümpu jeng tenyih nang sheshao me ü-tienpu ngao ilak tüopa jingne, taowe ü-nying nyingke yatuhshao meinang she teihnangki;

³hüyange ünyei ne Jehudilan wanglam tongpu üshei me nang wange ngohpupa khei, nange nünne jailak taowe tongnang.”

⁴“Tao naha memuh ü-jatli yo me hüyange Jerusalem me hangke ngoh pei, hatüo Jehudilan üsheiye shing.

⁵Iman-e ü-jeng üwang memuh shinge, hangke toman wanglam shewanpupa ükhong phei, tao Pharisee ja ne menge ngohpei, hatüo iman nehi mongma-a, saki phapu oklak.

⁶Hüyange sha-a toman puyimlante Kahwange janpu, hanghepa tüolak jingne monghümnang, hatüo monghümpu jingne ü-ngao phünlak tao tüome yonge ngohnang.

⁷Hatüo monghümpu jingne toman jat penme niye wangnyak wangngai Kahwang te mongong mongle puphei shaoshan nang. Hüyange O Ahngpa, hatüo monghümpu jengme Jehudilanne tao yeshushe yeine tamnang!

⁸Kahwange lipulan yange yenetamma-a, hangne numan-e hatüo üting yelak oklakpa she teihpu?

⁹“Taowe Nazarethlan Jesu min phei toktei-e toimeng maawe linglak wongpong she, ütingme taowe ü-nying nyingke teihngoh.

¹⁰Hüyange hatüowa Jerusalem me-o taowe ling; hüyange ngengpa üjenglan mepu wong tüoyange hüyange üjaolan maawe taowe küpnok me ang, hüyange aope iman li ne tam, taowe iman phei tüi-e yak hong.

¹¹Hüyange synagogue üshei me hipak lep iye iman shangne tamme, taowe iman phei tüi-e Kahwangte phoipu ngao ngaotamlak jingne ngang, hüyange imante jamloi mongshih ngaiye yinhulan chingnyulan me-o taowe iman shangne tam.”

¹²“Hüke ütahpa ngengpalan mepu wong hüyange nyinge tampu ngao phei tao Damascus te tai.

¹³O Ahngpa, nyihning lamme wanghe phei sheteepu wangngai ja wangdang mepu tao hüyange ü-phei yinte taipalan neikonne teepu taowe nge.

¹⁴Hüyange aope toman üshei kahtok me toita ngoh, taowe Hebrew ngaome ngaowüng jawe üte ngaopu jai, ‘Saul! Saul! Hangne nange tao shangne tampu shi? Kahwang phei tüi-e vi me yashah hüolak nang jingne wannang.’

¹⁵Hüwante taowe i, ‘Youngwanpa, nang ao shi?’ Hüyange Youngwanpawe i, ‘Nange shangne tampu Jesu Tao.

¹⁶Hüyangpoi lüotüoh, hüyange yayong tüoh, hangjingne hangyin ngaome nange Tao ngeyangki, hüyange hangyin ngaome Taowe nang tangte ngailak, tüolan jingne nang shaoshanpa ja hüyange saki phapa ja ne menglak jingne Tao nang tangte ngaiyangki.

¹⁷Jehudilan hüyange yinhulan, aoyin tangte Taowe nang shonlak, iman yak mepu Taowe nang yinlak.

¹⁸Nange iman mük eppe tamlak hüyange wangnyak mepu iman wangngaite lüppe tamlak, hüyange kahshih wong mepu Kahwang tangte ye-e tamlak, hüyange üte ütinglakpu kaiye iman ünu winpu oklak hüyange Kahwange lepu yo me mothleilak jingne Taowe nang iman tangte shonnang.’

¹⁹“Tüojingne, O Ahngpa Agrippa, wangdangpa himangte taowe ngao yejaipe yengoh.

²⁰Hüyangpoi üwangne Damascus me, Jerusalem me, hüyange Judea kahtok üshei yete hüyange yinhulante-o, iman-e monglüplak wongpong she, hüyange Kahwang tangte lüplak yangshe hüyange iman monglüppe wangngoiye toi linglak yang she, taowe üngwünne tam.

²¹Tüojingne Jehudilanne khümjing me tao pho, hüyange tao toilak jingne ngang.

²²Hüyangpoi tenyih ngoiye taowe Kahwang mepu jampu tüowe, tüopa jeng üyong hei üjoi nite taowe saki phawe, hipalan hüyange Mosawe hanghe ngailak she i, hatüo tokte kaiye taowe ülao hango ye-i-pe:

²³tüowe Khrista shanglak wongpong, hüyange lipu mepu üwangne yange yepuwe, Iye Jehudilan hüyange yinhulan moini te wangngai peipu jeng nyüolak yonge ngoh nang.”

²⁴Iye hüke tienpu ngao ngaowante, Festuswe Ite üngwün, “Paul, nang nganang! Jamloi shingpu kaiye nang nga ne tamnang!”

²⁵Hüyangpoi Paul-e i; “Üshei tangte üyongpa Festus, tao ngapu yeje? Hüyangpoi taowe ngaoting hei bumei ngao hei ngaonang.

²⁶Hangjingne ahngpa ao te taowe ngaiye ngaonang, Iye tüolan jeng shingnang. Hangjingne tüolan ngao hanghe-o I mepu lowe yenang she taowe ütinglak nang; hangjingne hatüo ünuk ja me lowe lingpu ne yeje.

²⁷Ahngpa Agrippa, nange hipalan ngaote mengya? Nange mengnang she taowe, shingnang.”

²⁸Hüyange Agrippawe Paulte i, “Hipak shohkü nohpu mongme nange tao khristan ne menge tampu oklak she teihnang kü a?”

²⁹Paul-e jan i, “Shohkü nohpu mongme jeyah, laolüngpu me jeyah, nang shaha yeje, hüyangpoi tenyih ü-ngao jaipalan üshei, tüolan shapu tokte kaiye, iman ü-kih-e menglak jingne taowe Kahwangte yopnang!”

³⁰Hüwante Ahngpa yong, hüyange Governor, Bernice, hüyange ülaolan üshei yong;

³¹hüyange aope iman-e yanne tai, iman hei iman nipa me teingaowe i, “Tüopa kahtawe lilak ne yejema-a, küpnok me anglak ne wange hango linge yenang.”

³²Hüyange Agrippawe Festuste i, “Tüopa kahtawe Kaisar ngoiye ngaolakei she yengao shihma-a, hüke lanne teine-o ok hah shepu yang.”