Read Konyak Naga LAMPULAN 27 Bible Online

LAMPULAN 27 - Konyak Naga bible

LAMPULAN 27

¹Aope toman-e Italy te yenglin me taine she mong, iman-e Augustan kengphet ükhong mepu Julius ghoja woipate Paul hüyange ülao phowe angpalan ütam phünne pha.

²Asia yengching nah me kenphe yete taine ngohpu Adramyttium chingnyu mepu yenglin me onge; Thessalonica mepu Macedonialan Aristarkhas toman phei omme ngohwante, toman-e yengching te taine yayong.

³Üne nyih toman-e Sidon ngoi, hüyange Julius Paulte yayeng hüowe I nying nyingke toloi meilak jingne I shümpalan tangte taine tam.

⁴Tüomepu yengching te yayonge toman-e Saipras jayekao wangyang yeleipu yete tai, hangjingne wangyang ünyong yete lei.

⁵Hüyange Cilicia hüyange Pamphylia ü-o me ngohpu yengching kaiye taiphei me, toman-e Lisia me Myra chingnyu te pei.

⁶Tüome ghoja woipawe Italy te tailak Alexandria chingnyu mepu yenglin ja tüo, hüyange Iye tüome toman innetam.

⁷Hüyange nyih nangjange monglüowe kemme taiye, toman-e ngange Nedas (Cnidus) ching ngoi; hüyange üne-o wangyange tienpu jingne, toman-e Salmone ü-o me Krit jayekaote tai.

⁸Tüopa dikhot neiye ngange taiye, Lin Lakjing Ümei she nyikpu nyoijing ja ümekenme Lasea chingnyu ngoh, tüome toman pei.

⁹Hüyange aope hipak yeonge win hüyange yengching lamme ütuh ne meng, hangjingne shaaji nyaowelelaka linne tai; Paul-e imante kentinglak ngao iye,

¹⁰imante i, “Üyih üyonglan; yenglin me ngohpu hangki hüyange yenglin shaha yeje, hüpoi teman üyin-o yengching lamme mengpu hüyange mahpu üyong ngailak wengtuh ngohnang she taowe nge oknangki.”

¹¹Hüyangpoi ghoja woipawe Paul-e ipu pheiya yenglin nokpu hüyange lin woipa ngaopupa shejai she jai.

¹²Hüyange eanyu me nyoilak yenglin lakjing yemeipu jingne, ngang tange nehoi Phoenix ngoi okma-a, tüome eanyu nyoi oklakne, iman sheyongpu jinge tüomepu tailak jingne ngaowe nyüo. Phoenix-a nyipjing apye me hüyange ongjing heyekao te miye ngohpu Krit dikhot me yenglin lakjing ja.

¹³Aope heye mepu wangyang nyaishümme lei, iman-e iman teihpu ngainangki she teih-e, yenglin tüklak teakke yah-e, Krit dikhot nah ü-o me tai.

¹⁴Hüyangpoi hipak meiyange yengohpe tüomepu waishihwangkhah üyong ja, “Apye wangyang” she nyikpu wangyang yeonge mengpu ja pei.

¹⁵Hüyange aope yenglin-a tük hüyange wangyang yete yenglin yeme ok, toman-e yengangpe angne tam hüyange wangyange hei toman woine tam.

¹⁶Kauda she nyikpu dikhot üjinghapu ünahyeme wangyange yeleipu yeme taiye, toman-e ngange yenglin üjoiha peipu ok.

¹⁷Yenglin-a iman-e nyeangte shuwe ngaiyange wu ütam-e yenglin neikonne monge sha. Libya yengnah pheih ükhaite iman ngoipha ma she nyampuwe iman-e yenglin tokme kangpu nye shuwe taiyange yenglin-a wangyange shunge kemne tam.

¹⁸Hüyange waishihwangkhah leipu yelak, tüokhei üne nyih iman-e yenglin me ngohpu hangki winne wang;

¹⁹hüyange lüm shepupa nyih phei me iman-e yoi yakke yenglin me ngohpu toinan win.

²⁰Aope wanghe jeyah hüyange shanha jeyah tomante nyih nangjange yetee, hüyange waikei wangmengpu yelakpe pei, hüwante toman yinlak monghümpu üshei taimah.

²¹Hüpoi hipak nangjange iman-e hahying yehahpe wenyang phei me, Paul-e iman ye me yonge i, “Kahtalan, numan-e üte jaine ngohshihpu üja, hüyange Krit mepu yetailakne ngohshihpu üja, hüyange hatüo mengpu hüyange mahpu ye-ngehah shepu.

²²Hüyangpoi sha-a mong yongyah she taowe numante hengnang. Hangjingne yenglin tokte kaiye numan yo me ao üyin-o yemahlak.

²³Hangjingne ao jingne tao ngohnang hüyange ao te taowe shaoshan nang, tüopa Kahwang wangdang shongmokpa ja minya ü-shong me yong,

²⁴hüyange i, ‘Paul tahnyam: Kaisar shaome nang yonglak. Hüyange leitüoh, nang phei yinkempalan üyin üshei Kahwange nangte phateki.’

²⁵Tüokhei, kahtalan, wongnang yah! Hangjingne üte ngaopu kih ütingme hükemuh ngailak she taowe Kahwangte ütinglak nang.

²⁶Tüoyangpoi dikhot ja jingne teman phetlak.”

²⁷Aope pha penme peli shepupa ya ngoi, Mediterranean yengching me toman jaye jaye me shuiye pongwante phawo ngoi, yenglin woipalanne kahmük ja phei owe tainang she teih.

²⁸Tüokhei iman-e yeng lupute sheam, hüyange lusheam da ngoiye ngoh. Üne-o kenja ngohyange iman-e nishe sheamme nyao hüyange lusheam penme nga ngoh she shing.

²⁹Yengnah longnyu ümeng yo me toman pitpha ma she nyamme, iman-e yenglin ükong yemepu lentüklak peli lanne, hüyange wang ngailak jingne yoppe tan.

³⁰Hüyange lin yeihpalan lin mepu taine ngangwante, iman-e lenshang yeme lentüklak lanne yeitampukih hüowe, iman-e yenglin üjoipa yengching me lanne yeine tam.

³¹Hüwante Paul-e ghoja woipa hei kengphetlante i, “Tüolan lin yeihpalan lenme tanne yengohma-a, numan yeyinlak.”

³²Hüwante kengphetlan-e yenglin üjoi shinpu wu khongkümpu tehlang hüyange yengme yeine tam.

³³Wangngai ne oteiye Paul-e iman üsheite jaja hahlak jingne tonge i: “Tenyih iye nyih penme peli shepupa numan-e tanne ngohnangki hüyange hango yehahpe nyaonangki.

³⁴Tüokhei numan-e jaja hahlak jingne taowe tongnang, hangjingne hatüowe numante wong peine tamlak, shaaji numan ao mepu-o shangmin ja nehoi minmah ja.”

³⁵Aope Paul-e tüo ngaowe sho, Iye an yah, hüyange iman üshei sheshaome Iye Kahwang min yong, hüyange Iye hatüo khoih hahne wang.

³⁶Hüwante iman üshei wongnange teih hüyange iman-e hahying hah.

³⁷Hüyange yenglin me toman khongkümpu kahta ghoni phei me denyit me wok ngohyangki.

³⁸Hüyange iman-e wangmanne hahyangphei me, yengching me iman-e wong win hüyange yenglin tanne tam.

³⁹Sha-a aope wangngai, iman-e kahtok yeshing ok; hüyangpoi yengnah pheipu yengnüp ja iman-e nge ok, hüyange tüopa me yenglin-a wenpu ok yalak she iman-e konkon.

⁴⁰Hüyange lin tüklak üshei lanne yengching me tüoh, hüyange tüohipak memuh yenglin woipawe pekhüw shapu-o lan. Hüyange wangyang yete ütokpa nye no inne, iman yengnah yete wen.

⁴¹Hüyangpoi yengching ni hüojing me nyippe, yenglin kahtok me tüp. Hüyange lenju ye kahtok me tüppe yepo ok, hüwante lenkong ye-a waishihwangkhah loipu jingne khoihpaine wang.

⁴²Hüwante phowe teipalan-a yeng yatte taiye ja nehoi mahpha ma she teih-e, kengphetlanne iman üshei toilak jingne ngaowe nyüo.

⁴³Hüyangpoi ghoja woipawe, Paul yinhuwe, iman-e teihpu te tien. Hüleima, Iye ngao phawe i, Yengyat manpalan-e iman nying nyingke yenglin mepu yengte phette, üwangne pah-e kahtok ngoilak;

⁴⁴hüyange topulan-a, ütam pekhüw tangme, hüyange ütam lin ümeng me tailak, hüke toman üshei kahtokte meimeiye ngai ok.