Read Konyak Naga LAMPULAN 28 Bible Online

LAMPULAN 28 - Konyak Naga bible

LAMPULAN 28

¹Aope toman yinpu okke ngoi, hüwante dikhot te Malta she nyikpu toman-e shing.

²Hüyange tüopa chingshao kahtalanne teih yetüopute tomante yeonge meiye pao: hangjingne waikei, hüyange wangshüm me ngohwante, iman-e vün jaktam-e toman üshei yah.

³Paul-e hansho ütep ja moiyah-e vünte jak, vün sheampu kaiye, pu ja ngai hüyange I yakme nyeih.

⁴Aope chingshao kahtalanne puwa I yakme jhotte nge, iman-e jawe japhei teingaowe i, “Nüngneilak yenang, hatüo kahta-a ütingme kahta toipa ja. I yengching mepu yinne ok yahpoi, üne-o khakshuwe Ngaophünpawe I üyin ngohlak jingne yetam.”

⁵Hüyangpoi Iye puwa vün me konge yeine tam, hüyange I ma yeyah.

⁶Iman-e I püm peakülak yejema-a mokhshe toitakülak she tanne lei, hüyangpoi aope iman-e laowe tanne ngoh, hüyange Ite hango ümeng yengaipe nge, iman-e iman juteih jeilei hüyange i. “I-a Kahwang ja yang!”

⁷Sha-a tüopa ü-o me Publius she minpu tüopa dikhot me üjengpa ja ngoh hüyange I jing pesha hei fandei ngoh, Iye toman nyik-e nyihlüm ngoiye toman yeong meiye ngoine tam.

⁸Hüyange tüo ngai, Publius üpa tinye hüyange iydak phei dak-e ngoh. Paul-e I shongte onge yop, hüyange Ite yak-shinge hüyange I meine tam.

⁹Aope tüokih lingpu nge, dikhot me ngohpu dak ngohpalan üshei jem hüyange iman meitam.

¹⁰Iman-e tomante hünghao maapha, hüyange aope toman yenglin me taine wang toman-e wongpongne mengpu toilan iman-e lin me hüntam.

¹¹Lekeng lüm linne toman Alexandria chingnyu mepu yenglin ja me tai. Tüopa yenglin dikhot me eanyu linne nyoi; hüyange lin min-a, yepinlak ja ne “Nipet Jeiheinao” she ngoh.

¹²Toman Syracase chingnyu ngoi hüyange tüome nyihlüm nyoi.

¹³Tüomepu toman pahtaiye Rhegium chingnyu ngoi. Hüyange nyih ja ngohyange heye mepu wangyang ja lei, hüyange nyih ni shepume toman-e Puteoli ching ngoi.

¹⁴Tüome toman-e mengpalan ütam tüo, hüyange iman phei nyih nyit nyoilak jingne tong. Hüyange toman Rome te pei.

¹⁵Tüomepu aope jeiheinaolanne toman jeng jai; iman-e Appius Hatleih, hüyange Lamtep Lüm ngoiye toman pongte yu. Aope Paul-e iman nge, Iye Kahwang minyong hüyange wongnang.

¹⁶Hüyange aope toman Rome ngoi, Paul I yompu kengphet phei I shaha ngohne tam.

¹⁷Hüyange tüo ngai, nyihlüm ngohyange Iye Jehudilan yo me woipalan jamme nyik-e jem. Aope iman jem, Iye iman te i, “Jeiheinaolan, taowe teman kahta yejema-a teman puyimlan wanglam phei tüi-e hango yeling; tüoyangpoi Jerusalem mepu Romelan yak me tao phowe angne phünne pha.

¹⁸Iman-e üte tokleiyang phei me lanne teihu, hangjingne tao litamlak ne hango ngao yenangpe ngoh.

¹⁹Hüyangpoi aope Jehudilanne, ü-phei tüi-e ngao, taowe Kaisar ngoiye ngaolak she ilakne ngai; tüoyangpoi taowe yoi jat jingne ümeng ütam püolak she yeje.

²⁰Tüojingne numan phei hüolak hüyange ü-phei teingaolak jingne taowe numan nyikyangki; hangjingne Israellan monghümpu jeng jingne tüopa yanwuwe tao shayange ngohnang.”

²¹Hüpoi iman-e Ite i, “Toman-e Judea mepu nang jeng nyanpulai hango ye-nge, yejema-a jeiheinaolan yo me aote-o tüome peiye nang jeng hango ümeng ngaolan ye i, yejema-a yengao.

²²Hüyangpoi nange hanghe teih, tüowa toman-e nang mepu jaihunangki, hangjingne üshei ye me nang ompu tüopa ükhong jeng yemeipe ngaonang she toman-e shinge ngohnang.”

²³Hüyange aope iman-e I jingne nyih ja le, iman-e ükhong yeonge yonge I ngohjing te pei. Hüyange shom mepu wangnyak ngoiye, Mosa ngaokeng hüyange hipalan laitep mepu Iye Kahwang ahngching jeng saki phawe, hüyange Jesu jeng iman yoh-e imante ngaowa khoih-e nyüo.

²⁴Iye nyüopu ngaote ütam-e mongonge teih, hüyange ütam-e yemong.

²⁵Aope iman yo me ngao yesheipe ngai, hüyange iman yanlak jingne po, Paul-e tüopa ngao i: “Yaha Üjaowe Isaia hipa kaiye numan puyimlante ütingme hüke ngaoyangki:

²⁶“Tüopa jat tangte taitüoh, hüyange itüoh: Numan-e jaipupa-a jailak, hüyangpoi mongte ye-onglak; numan-e ngepupa-a ngelak, hüyangpoi yeshinglak.

²⁷Hangjingne tüolan kahta mongjang pomme meng; hüyange iman na jeiteki, hüyange iman-e iman mük ngoihteki. Yejema-a iman mük phei iman-e ngehah shepu, hüyange iman na phei jaihah shepu, hüyange iman mongjang phei üpong tüohah shepu, hüyange Ü-tangte lüphah shepu, hüyange Taowe meitamhah shepu, she Kahwange inang.”

²⁸“Tüokhei hatüo Kahwange yinyepu ngaolan Yinhulan tangte shonne ngohnang; imane-o hatüo jailak she numan-e tüopa ngao shingyah.”

²⁹(Hüyange Paul-e tüolan ngaowe shoyang phei me, iman yo me ngao yeonge ngao yesheipe moppe Jehudilan yan.)

³⁰Hüyange wangpeng ni ngoiye Iye pengmee phayange yoinok ne ngoh, hüyange I tangte peipu üshei Iye yah.

³¹Aowe-o yetienpe Kahwang ahngching jeng konnyüowe, hüyange Youngwanpa Jesu Khrista jeng yeonge wongnange nyüo.