Read Konyak Naga LAMPULAN 3 Bible Online

LAMPULAN 3 - Konyak Naga bible

LAMPULAN 3

¹Nyih ja ünpong lümpaji yoppu hipak me Peter hüyange John khümjing te ong.

²Hüwante puhnap memuh yafaiteiye ngohpu kahta ja khümjing te ongpalan mepu hahyulak jingne “Shemeipu Taten” she nyikpu khümjing taten shongme iman-e nyihjeih I woipeiye ang.

³Iye Peter hüyange John ni khümjing te ongne ngohpu ngeye ngin yu.

⁴Hüwante Peterwe John phei Ite tingkhakke leiye i. “Toman te leipha!”

⁵Hüyange iman mepu ülam ja tüokülak she monge, Iye iman ngao jaiye yepope lei.

⁶Hüyangpoi Peterwe i, “Taowe nginmei hüyange hon yenang, hüyangpoi üme hanghe ngoh hatüo nangte yahpha ning. Nazareth mepu Jesu Khrista min me, kemtüoh.”

⁷Hüyange Iye yoi yakjah ye-e jonyange yongne tam, hüyange hüwante muh I ya hüyange yatuh lah me wongnange pei.

⁸Hüyange I homme yong, hüyange kem ne wang hüyange kemme, homme, hüyange Kahwang min yonge, I iman phei khümjing te ong.

⁹Hüyange kahta üsheiye I kemme hüyange Kahwang minyonge nge.

¹⁰Hüyange khümjing “Shemeipu Taten” taten shongme shotyange hahyupa she iman-e shing, hüyange Ite hanghe ngai, tüojingne iman yashanpuwe maa hüyange nyam.

¹¹Aope Iye Peter hüyange John nite jonne ngoh, Solomon shümphang she nyikpu me kahta üshei yeonge yashanne iman tangte phette jem.

¹²Aope Peterwe tüo nge, Iye kahtalante i, numan-e hangne tüopa kahta jingne yashanpu? Yejema-a toman yoi üngan hüyange jaopuwe I kemne tampukih hangne numan-e tomante ange leipu?

¹³Abraham hei Isaac hüyange Jacob Kahwang teman puyimlan Kahwange yoi “Ha Jesu müktishiwa tamyangki. Numan-e I phünne pha, hüyange Pilate-e lanteilak jingne monge ngohwante, I sheshao me numan-e yeyah.

¹⁴Hüyangpoi numan-e Üjaopa hüyange ümeng yenangpupa yeyahpe, kahta toipa ja hi tonge yah;

¹⁵hüyange numan-e üyin lingengaipa Youngwanpa toi. Hüyangpoi Kahwange I lipu mepu yange yenetam; hatüo jingne toman saki ngohnang.

¹⁶Hüyange I minme mengpu jingne I minme tüopa kahta ao numan-e nge hüyange shing, I wong nange tam. Aiyang, hanghe ütinglakpu I kaiye ngoh hatüowe numan üshei sheshao me I jaoshe-i-ye meitam yangki.”

¹⁷“Hüyange sha-a, jeiheinaolan, numan-e tüopa yeshingpe jon hüyange numan wanglam lampalanne-o hüke jon she taowe shing.

¹⁸Hüyangpoi Kahwange I Khrista shanglak she hangyin hipalan üshei ju kaiye itte ang, hüke Iye ngaine tam.

¹⁹Tüokhei monglüptüoh, hüyange Kahwang yete lüptüoh, tüome nakshih Iye numan ünu phutte winlak;

²⁰hüyange numan jingne lepu Khrista Jesu Iye shonlak, she I Üjao hipalan kaiye Kahwange üshongwante muh shingne tam.

²¹Hüyange üshei üla ne linglak hipak manngoi manngoi I wangdang me tan ngohlak.

²²Mosawe i, ‘Youngwanpa Kahwange numan jeiheinaolan yo mepu numan jingne ü-kihpu hipa ja ngaitamphalak. Iye numante hangyin ngaolakei tüolan khongküm numan-e Ite jailak.

²³Hüyange hüke ngailak, aoyinne tüopa hipa ngao yejailakei, kahta yo mepu jaoshih mahtamlak.’

²⁴Hüyange hipalan, Samuel mepu hüyange I pheite peipu üsheiye ngaolan phei jamme tüopa nyih hei hipak jingne-o ngaoyangki.

²⁵Numan hipalan hayim; ‘Hüyange nangmepu üli me kahtoknyu nokphong üshei moimanlak’ she Abrahamte ngaowe, hanghe Kahwange numan puyimlan phei jiengpu yah, hatüo jiengpu hayimlan-o numan.

²⁶Numan kahta phephe yoi ünu ümeng mepu lüppe yene tampu kaiye numan moimanlak jingne, Kahwange yoi ‘Ha’ yange yene tamphei me, I numan tangte üwangne shon.”