Read Konyak Naga LAMPULAN 4 Bible Online

LAMPULAN 4 - Konyak Naga bible

LAMPULAN 4

¹Hüyange iman ükhong phei ngaowe ngohwante ngengpalan hüyange khümjing yompalan woipa hüyange Sadduceelan iman tangte pei,

²iman yeonge mongshih ngai hangjingne imniye ükhong te nyüo, hüyange Jesu lipu mepu yange ye she pong.

³Hüyange iman-e imni pho, hüyange shaaji ünngoi mahpu nanjingne, ngainyih ngoiye imni küpnok me ang.

⁴Hüyangpoi ngaojaipulan maawe ütinglak hüyange lungphak me kahtalan haja nga nanjing ngoh.

⁵Üne nyih iman wanglam lampalan, jeiyonglan hüyange ngaokeng nyanpalan Jerusalem me jamshe jem.

⁶Iman Ütahpa ngengpa Annas, hüyange Kaifas, hüyange John, hüyange Alexander, hüyange Ütahpa Ngengpa nokphong ülaolan she jem.

⁷Hüyange aope iman-e imnite iman hotan me yongne tam, iman-e tong, “Hanghe üngan kaiye yejema-a ao minme numan-e hatüo lingpu shi?”

⁸Hüwante Yaha Üjaowe maawe Peterwe imante i, “Pinnyuha wanglam lampalan hüyange jeiyonglan,

⁹yafaipa meiye tampu jingne, hanghe kaiye I meiye tampu she tenyih tomante tongma-a;

¹⁰Nazareth mepu Jesu Khrista min me, ao numan-e tangpem pee me daktoi, hüyange ao Kahwange lipu mepu yange yene tam, I min me hatüo kahta numan sheshao me meiye yonge ngohnang she, numan liliye hüyange Israellan üsheiye shingyah.

¹¹Hatüowa numan nokwepalanne yeyahpe winyangpu long, hüyangpoi nokjing shongnyu longne I meng.

¹²Hüyange ülao aome-o yinyepu yenang, hangjingne teman hanghe kaiye yinyelak, wangphang me kahta yo me ülao min hango phawe yenang.”

¹³Sha-a aope iman-e Peter hüyange John wongnangpu nge, hüyange aope iman lai yenyüopu hüyange yeshing yemanpu kahtalan she shinge ok, iman yashan; hüyange imni Jesu phei ngohyangpu she iman-e shinge pei.

¹⁴Hüyangpoi meiye tampu kahta imni phei yongyange ngohpu ngeye tüo tokte kaiye iman-e hango yengao ok.

¹⁵Hüyangpoi iman-e aope pangshanlan mepu nokshaote iman yanne yune tam, iman hei iman pa me hüke teingaowe i:

¹⁶“Hatüolan kahtate teman-e hang linglak? Hangjingne iman kaiye ütingme kahnyingwüngha toi ja lingteki she Jerusalem me ngohpu üsheiye shinge ngohnang, hüyange hatüo yeje ja she teman-e janpu ye-oklak.

¹⁷Hüyangpoi ükhong yo me jalunne mintahtai ne, hüyange sha-a memuh iman-e tüopa min me ao te-o yengaolak jingne, teman-e imante ngao phahah.”

¹⁸Tüokhei iman-e imni nyik, hüyange Jesu minme üjingha nehoi yengaolak yejema-a yenyüolak ngaokeng pha.

¹⁹Hüyangpoi Peter hei Johnne imante janne i, “Kahwang phei-a numan ngao jailakpa Kahwang shaome shupu heiya yeshupu, numan-e ngao phünne itüoh.”

²⁰Hangjingne toman-e jaipu hüyange ngepu jeng yengaope yengoh ok.

²¹Hüyange aope iman-e imnite ünyeine nyamshao, hüyange iman-e hanghe jingne shangne tamlak ülao ümeng yetüope, ükhong te nyampu kaiye imni lanne tei; hangjingne hanghe lingyangki tüopa jingne kahta üsheiye Kahwang minyong.

²²Hangjingne kahta ao te tüopa kahnyingwüngha meitampu linge tam, tüopa kahta-a wang deli linne yafai teiye ngohyangki.

²³Aope imni lantam shümpalan tangte imni ye, hüyange ngengpa üjenglan hüyange jeiyonglanne imnite ngaopu üshei imante i.

²⁴Hüyange aope iman-e tüo jai, iman üsheiye mong ja ne menge ngao ngaiye Kahwang te i, “Wongnangpu Youngwanpa, wangdang, kahtok, yengching hüyange tüoyin me ngohpu khongküm lingpupa,

²⁵Yaha Üjao me toman üpa David nang shaoshanpa ju kaiye i, “ ‘Hangne yinhulanne mongshih ngai, hüyange kahtalanne jajang japu konkon?

²⁶Kahtoknyu ahnglan iman nying nyingke tüm, hüyange I wanglam lampalanne jamme jem, Youngwanpa phei tüi-e hüyange I Messiah phei tüi-e.’

²⁷Hangjingne tüopa chingnyu me Herod hüyange Pontius Pilate ükhong, yinhulan hüyange Israel kahtalan phei, Jesu, nang üjao shaoshanpa, ao nange Messiah ne mengetam tüopa phei tüi-e jamshe jemnang;

²⁸hüyange nang yak hüyange nange nyinge tamyangpu ütahte ngailak linglak jingne iman jem.

²⁹Hüyange sha-a Youngwanpa, iman-e konpute leitüoh, hüyange nang shaoshanpalan, toman-e mongyongpu phei nang ngao ngaone,

³⁰hüyange aope nange meitamlakpa nang yak lanlakei, hüyange kahnyingwüngha füo hei yashanlak nang üjaopa shaoshanpa Jesu min me lingne tampha.”

³¹Hüyange aope iman-e yoppe sho, iman jamshe jemme ngohpu nyoi shuipo. Hüyange iman üshei Yaha Üjaowe maawe ngoh, hüyange iman-e Kahwang ngao wongnange ngao.

³²Hüyange mengpalan iman ükhong üyong mongjang hüyange Yaha ja ne menge ngoh. Hüyange aowe-o yoi nangpu te yoijing she ye-i, hüyangpoi toi lili ükhong sheine meng.

³³Hüyange üngan üyongpuwe lampulanne Youngwanpa Jesu yange yepu jeng saki pha, hüyange shüpshe üyong iman üshei tangme ngoh.

³⁴Hangjingne iman yo me aowe-o hanghe-o toinanne yengoh, hangjingne kahtok yejema-a nokjing ngohpalanne tüolan yüo;

³⁵hüyange yüopu ümee yahpeiye lampulan shaome ang, hüyange kahta lilite yoi yoi wongpong te shuwe tamme han.

³⁶Hüyange Levi nokphong, Saipras lan Joseph, aohite lampulanne Barnabas she nyik, (leppu Hengtampu Ha)

³⁷Iye kah ja ngohpu yüo, hüyange ngin yahpeiye lampulan sheshao me ang.