Read Konyak Naga LAMPULAN 5 Bible Online

LAMPULAN 5 - Konyak Naga bible

LAMPULAN 5

¹Hüyangpoi kahta ja min Ananias, shekonyu Sapphirawe-o monge, Iye fandei ja yüo;

²hüyangpoi Iye ngin ütam shekonyuwe shinge angne tam, hüyange tamme yahpeiye lampulan yashong me ang.

³Hüyangpoi Peterwe i: “Ananias, Yaha Üjao shaome ngaoleih ilak, hüyange kahtok ümee ütam tüohlak hangne Satanne nang mong maatampu?

⁴Hatüo manyüope hatüo nang jingne jeshihpu üje a? Hüyange hatüo yüo phei me peiye nang mongne yeje a? Hüma-a hangke nange nang mongjang me tüo teihyapu? Nange kahta sheshao me yeje, hüpoi Kahwang sheshao me tahleih ngaoyangki.”

⁵Aope Ananias tüopa ngao jai, I toita hüyange lüomah, hüyange tüo jaipu üshei yeonge nyam.

⁶Hüyange naoshelan powe tawe I mang wopsha, hüyange paiye teiye I mu.

⁷Hüyange ghonda lüm nanjing ngohyang phei me, hanghe ngai hatüo yeshingpe, I shekonyu ong.

⁸Peterwe yhate i, “Numan-e kahtok-a halan te hei yüopu heiya yejepu, üte ipha.” Hüyange yhawe jan, “Üm, halan te hei yüoki.”

⁹Hüyangpoi Peterwe yhate i, “Youngwanpa Yaha toklak jingne hangke nangni jamme taisho? Leiyah, nenok netanpa mupulan tafün shongme yong yange ngohnang, hüyange iman-e nang yahteilak.”

¹⁰Mokhshe I shongme yha toita hüyange lüomah. Hüwante naoshelan onge, yha liteiye ngoh-i-ye yahyüo, hüyange yha netanpa phei phinne mu.

¹¹Hüyange bumeinoklan üshei hüyange tüopa ngaolan jaipu üshei tang me yeonge nyampu pei.

¹²Sha-a ükhong yo me lampulan yakke yashanyalilak hüyange füo maawe ling. Hüyange iman üshei mongja ne sheiyange Solomon nokshümphang me ngoh.

¹³Hüyangpoi iman phei omlak ülaolan yo me ao-o mong yeyong, tüoyangpoi ükhonge iman yongne tam.

¹⁴Hüyange Youngwanpate ütinglakpu sheko hüyange netan ükhong üyong iman phei ünyei om.

¹⁵Tüo kaiye Peter kemme linwante, I yashüm nehoi iman ütamte shümlak jingne, iman-e dakpalan chingyangko me yüowe, hüyange leng hüyange shinleng-aam me tüoh.

¹⁶Hüyange üne-o Jerusalem neikonpu chingnyulan mepu ükhonge dakpalan hüyange ünu yahawe shangne tampalan woi peiye jam-e jem, hüyange iman kahta lili meiye tam.

¹⁷Hüyangpoi Ütahpa Ngengpa hüyange I phei ngohpu Sadduceelan ükhong yeonge aohüng mükdakke yong.

¹⁸Hüyange iman-e lampulan pho hüyange chingnyu küpnok me küoang.

¹⁹Hüyangpoi Youngwanpa wangdang shongmokpawe yaning küpnok taten epne tamyange iman woitei, hüyange i,

²⁰“Taitüoh hüyange khümjing me yongtüoh hüyange kahtalante numan-e hatüo üyin jeng ngao üshei itüoh.”

²¹Aope iman-e hatüo jai, iman-e wangngai ne oteiye khümjing te ong hüyange konnyüo. Sha-a ütahpa ngengpa hüyange I phei ngohpulan, hüyange Israel pangshanlan khongkümpu jem, hüyange iman woipeilak jingne küpnok te shon.

²²Hüyangpoi aope woipa lan ngoi, iman-e lampulan küpnok me ye-nge; tüokhei iman leihye hüyange ngao ipalante ngaolan i:

²³“Aope toman küpnok te peingoi, yeonge meiye latyange nge hüyange yompalan üshei tafün shongme yonge ngoh: hüpoi aope toman-e taküp ep, toman-e ümong me ao-o ye-nge!”

²⁴Sha-a khümjing woipa hüyange ngengpa üjenglanne aope tüolan ngao jai, lampulan jeng hangke shonlak she iman mongtoitai.

²⁵Hüyangpoi kahta ja peiye imante i, “Jaitehu! Numan-e küpnok me küowe angpu kahtalanne khümjing me yongyange ükhongte konnyüo nangki!”

²⁶Hüwante ngao ipalan phei khümjing woipa tai, hüyange ükhonge longe shüplak te nyamme iman-e mongshih yengaipe jünge iman woipei.

²⁷Aope iman-e iman woipei, iman pangshanlan sheshao me yongne tam. Hüyange ütahpa ngengpawe imante tonge i,

²⁸“Toman-e numante tüopa minme yenyüolak jingne mongjüonge ngaokeng pha. Hüyangpoi leihu numan-e nyüopu konne Jerusalem maateki, hüyange numan-e hatüo kahta li ne tampu (iy) ümeng tomante shahne tamhunang!”

²⁹Hüyangpoi Peter hüyange lampulanne janne i: “Toman-e kahta phei-a Kahwang ngaopa jailak.

³⁰Teman Üpa Kahwange, numan-e pee ja me takke toiyangpu Jesu yange yene tam.

³¹I ahngpa hüyange yinyepa ne menglak, hüyange Israel te monglüppe hüyange ünu winpu phalak jingne, Kahwange yoi yakjah yeme I ongne tam.

³²Hüyange tüolan jingne toman saki ngohnang, hüyange Yaha Üjao, ao Kahwange Ite jaipalante phayangki; I-o saki ngoh nang.”

³³Aope iman-e tüopa ngao jai iman yeonge mongshih ngai hüyange iman toihuwe teih.

³⁴Hüyangpoi Pharisee kahta hüyange ngaokeng nyüopa üyongja, hüyange kahta liliye wangshüm hüowe leipu Gamaliel she minpu kahta ja, pangshanlan sheshao me yong, hüyange lampulan nokshaote ja me yüowe tamlak jingne ngaopha.

³⁵Hüyange Iye ükhong te i; Israellan, numan-e tüolan, kahtate hanghe linghuwe teih, tüo jingne kentingyah.

³⁶Hangjingne hipak ütenja taiteki. Theudas I nying nyingke üyongne menge ngai, hüyange I phei kahta gho peli nanjing ngoh. Hüyangpoi I toi, hüyange I pinlan khongkümpu yan, hüyange mahshon.

³⁷I phei me, shangtoi itpu hipak me Galileelan ja Judas she minpu ngai, hüyange kahtalan I pheite woi, hüyangpoi I-o toi, hüyange I phei te woipalan yanmah.

³⁸Sha-a taowe numante ipha ning: “Hatüo kahtalante hango tahling, hüyange iman hüke ngohne tamtüoh, hangjingne hatüo toishao kahta mepu ne mengma-a, hatüo mahkülak;

³⁹Hüyangpoi hatüo Kahwang mepu ne mengma-a, numan-e iman mahne tampu ye-ok külak; hüyange numan-e Kahwang phei-o tüi-e shonlak!”

⁴⁰Tüokhei iman-e Iye hengpu ngao yah hüyange iman-e lampulan nyik-e ye, hüyange iman-e imante shüt, hüyange Jesu min me yengaolak jingne ngaopha yange teine tam.

⁴¹Tüokhei I min jingne wüotüopu ngelak ne wangnangki she, meitamme ompu jingne mongmei me iman pangshan ükhong mepu yanne tai.

⁴²Hüyange nyihjeih she khümjing me hüyange nokme, Jesuwa Messiah she iman-e konnyüopu yelak.