Read Konyak Naga LAMPULAN 7 Bible Online

LAMPULAN 7 - Konyak Naga bible

LAMPULAN 7

¹Hüwante Ütahpa Ngengpa-e Stephen te i, “Hatüolan-a üting ne jeyah?”

²Hüyange Stephenne i: “Jeiheinaolan hüyange üpa yiman, ü-ngao jaikhu! Aope teman üpa Abraham, I Haran me nyoishao me; Mesopotamia me nyoingoh, müktishiwa Kahwang I tangte ngai;

³hüyange Ite i, ‘Nenok hüyange nang kahtok tüotüoh hüyange Taowe nangte hanghepa kahtok hüolakei tüote taitüoh’

⁴Hüwante Iye Chaldea kahtok tüoh hüyange Haran me nyoilak jingne tai. Hüyange aope Ipa li, tüomepu numan sha-a ümeken me ngoh hatüo kahtokte Kahwange I woipei.

⁵Hüwante Kahwange Abraham te yoi moth ne menglak jingne, hüyange yapha loklak nyoi shinne nehoi hango yepha; hüyangpoi hatüo Iye Ite phalak hüyange hatüo I jingne hüyange I mepu jaalunpulan jingne menglak she Kahwange jan. Kahwange hatüo janwante Abraham hayim yenangpe ngoh.

⁶Hüyange Kahwange hüke i: ‘Nangme jaalunpulan mih kahtok me wangpeng gho peli jingne rha shaoshanne hüyange wanwao ponge, jonne tamme nyoilak.

⁷Hüyangpoi iman ao jat shaoshan lakei hatüo jat te Taowe ngao phünlak. Tüophei me iman leih yelak, hüyange tüome ü-shaoshanlak she Kahwange i.’

⁸Hüyange Iye shokhüppe jiengpu Ite pha. Hüyange hatüoke Abraham mepu Isaac ngai, hüyange nyih tet shepu nyih me I shokhüp, hüyange Isaac mepu Jacob, hüyange Jacob mepu pajeiyonglan pen me ni ngai.

⁹“Hüpoi pajeiyonglan-e Joseph te müktak, Egypt lante yüo; hüyangpoi Kahwang Iphei ngoh.

¹⁰Hüyange I shange pongpu üshei mepu yin, hüyange Egypt Ahngpa, Pharaoh mükshao me meiye ngene tam hüyange konheingao pha. Hüwante Egypt hüyange I Ahngpa nok üshei tangme Iye I wanglam lampa ne mengetam.

¹¹Hüwante Egypt hei Kanan üshei me seanyao yengle hüyange shange pongpu üyong pei, tüokaiye teman puyimlanne hahlak yetüo.

¹²Tüokhei aope Jacob-e Egypt kahtok me tah ngohnang she jai, Iye toman puyimlan üwang üne yinte tei.

¹³Hüyange ün ni shepupa me Joseph yoi jeiheinaolante shingne tam hüyange Joseph nok Pharaoh te shingne tam.

¹⁴Hüwante Ipa Jacob hüyange yoi nok üshei kahta denyit me nga ngoh, Joseph-e I tangte nyik.

¹⁵Tüokhei Jacob Egypt te ta, hüyange I hei teman puyimlan li;

¹⁶hüyange iman-e mang Shekhemte yahtei, Abraham-e Shekhem me Hamor hayim lan mepu ngin phayange shakke angpu mangjong me mu.

¹⁷“Hüyangpoi hanghe jiengpu Kahwange Abrahamte pha hatüo ngailak hipak owe peiwante, Egypt me Israel kahtalan jaalun-e maangai.

¹⁸Ükümne Joseph yeshingpu Ahngjawe, Egypt me wanglam lam ne wang.

¹⁹Iye teman jat te aohüng puphei jon, hüyange teman puyimlante menge jon; hüyange iman üyin ne mintah meng she naotak halan chingyang ko me angne tam.

²⁰Hatüo hipak me Mosa puh, hüyange naoshe yeonge meingoh. Hüyange Ipa nokme I lekeng lüm jongne tam;

²¹hüyange aope I win, Pharaoh üha yhalawe yahye, hüyange yha üha ne menglak jingne pao.

²²Hüyange Egypt lan konngao khongkümpu Mosa te nyüo, hüyange I ngaopu me hüyange toi me yeonge okkeshange ngoh.

²³“Aope I wangpeng deli ne ngoh, yoi jeiheinao Israellan phei pongne I mongjang me teipei.

²⁴Hüyange iman yo me ja Egypt naoshe jawe menge jonpu ngeye, Iye Egypt pa te shette I phuh hah, hüyange tüopa toi.

²⁵Hüyange I yakke Kahwange I jeiheinao lante yinyepu phanangki she, iman-e shingnang she Iye teih, hüyangpoi iman-e yeshing.

²⁶Üne nyih iman teishette ngohwante, I iman shongte wen; hüyange imante chingmei lingne ngange i, ‘Kahtalan, numan jeiheinao ja ngohnang; hangne shejawe sheja te ümeng jonpu shi?’

²⁷Hüyangpoi Iphei teekong wangpupawe Ite shunge i, ‘Aowe nang toman tangte wanglam lamne hüyange ngaophünpa ja ne menge tampu shi?

²⁸Nange menyih Egypt lan toipu kih-e tao toihupu a?’

²⁹Aope Mosawe tüo jai, Egypt mepu I phette tai, hüyange Midian me nyoine wang. Tüome Iye nao she ni puh.”

³⁰“Hüyange wangpeng deli linyang phei me, Sinai kahtang phaome phümtümp ja me vün ngai tüome wangdang shongmokpa ja I tangte ngai.

³¹Aope Mosa tüopa nge, Iye ngepu lante yashan, hüyange Iye leilak jingne owe wenwante, Youngwanpawe ngaowe pei:

³²‘Tao nangpu yimlan Kahwang, Abraham hüyange Isaac hüyange Jacob Kahwang.’ Hüyange Mosa nyamme nün, hüyange leilak jingne mong yeyong.

³³Hüyange Youngwanpawe Ite i, ‘Nang ya mepu yashom khoktüoh, hangjingne nang yonge ngohjing kahtok üjao ngohnang.

³⁴Egypt me ü-kahtalan shange pongpu Taowe ütingme ngeyangki, hüyange iman yinlak jingne Tao laiyangki; hüyange sha-a wenkei, Taowe nang Egypt te shonning.’

³⁵“Hatüo Mosa Israel kahtalanne yeyah, hüyange hüke i, ‘Nang toman tangme wanglam lampa hüyange ngaophünpa ne aowe mengtam ei?’ Kahwange wanglam lampa ne hüyange yinyepa ne, Iye vün-phümtümp me ngepu wangdang shongmokpa kaiye shon.

³⁶Hatüo kahtawe Egypt me, Ütak Yengching me hüyange phaonyu jongme wang deli yashanyali hüyange kahnyingwüngha lingyange, iman woitei.

³⁷Hatüo Mosawe Israel hayimte i, ‘Kahwange numan jeiheinao lan yo mepu numan jingne tao kihpu hipa ja ngaitamlak.’

³⁸Hatüowa I ao phaonyu jongme Israellan jemwante omme ngoh; I teman puyimlan phei ngoh hüyange I phei Sinai kahtang me ngaopu wangdang shongmokpa phei ngoh; teman te phalak jingne Iye Kahwang mepu üyin ngaolan tüo.

³⁹“Hüyangpoi Ite teman puyimlanne ngao yejaipe ling, hüyange iman mepu I kawin, hüyange iman mongjang Egypt te nishe leihye.

⁴⁰Hüyange iman-e Aaron te i, ‘Toman shaote tailak jingne tomante kahwanglan lingpha, hangjingne tüopa Mosa, aowe Egypt mepu toman woipei, I hangne mengyapeih toman-e yeshing.’

⁴¹Hüyange tüopa nyih hei hipak me iman-e mahu üpongha ja ling, hüyange tüopa te dopu yahpeiye khüm, iman yakke ling okpu toi me mongmei.

⁴²Hüyangpoi iman mepu Kahwang lüp hüyange wangdang shanhalan khümlak jingne tüoh, hipalan laitep me nyanpu kih: “ ‘Üte toipu yinmoklan hüyange dopulan numan-e phaya ei! Wangpeng deli phaonyu jongme, O Israel jatlan!

⁴³Hüyange numan-e Molech nyenok jon, hüyange Rephan kahwang shanha khümlak jingne numan-e mieng leiyange ling; tüokhei taowe numan Babilon kaiye yahteilak.’

⁴⁴“Hanghepake Iye nge, hatüo leye lingtüoh she aowe Mosa te i, Iye mongpu saki nyenok ke teman puyimlan phei phaonyu jongme hatüo ngoh.

⁴⁵Aope Kahwange teman puyimlan shaomepu jatlan iman kahtok mepu jange tei, iman tüome peiye iman hipak me Joshua phei nyenokke lam woipei, hüyange David hipak ngoiye hatüo ngoh.

⁴⁶David-e Kahwang sheshao me shüpshe tüowe, Jacob Kahwang jingne nokja wetamlak jingne yuweyah.

⁴⁷Hüyangpoi Solomon pahi Ite nok ja wetam.

⁴⁸“Tüone jeyapoi Ütahpa Kahwang, yakke wepu nokme yengoh; hipawe ipu ke:

⁴⁹“ ‘Wangdanga Ü-Ahngpa shotjing, hüyange kahtoknyu Ü-yalok jing, Youngwanpawe inang. Nange üte hangkihpu nok wetamlak? Yejema-a Tao hangkihpu me toloimei lak?

⁵⁰Hatüolan khongkümpu ü-yakke yeling a?’

⁵¹“Numan longetanpalan mongjang yejhotpu hüyange na yenyimpalan! Numan-e jinte Yaha Üjao phei tüi-e yongnang; numan-e numan puyimlankih jonnang.

⁵²Hipalan yo me numan puyimlanne shange yetampu ao ngoh nangki? Iman-e Üjaopa peilak hi-ngao ipalan toi, I lowe tampulan hüyange toipalan sha-a numan mengteki.

⁵³Wangdang shongmokpalanne ipukih numan-e ngaokeng yah, hüyangpoi yejon!”

⁵⁴Sha-a aope iman-e tüolan jai, iman mongte jak ong, hüyange I phei tüi-e fa teingao.

⁵⁵Hüyangpoi I me Yaha Üjao maawe, wangyete leiye, Kahwang müktishiwa hüyange Kahwang yakjah yeme Jesu yonge nge.

⁵⁶Hüyange Iye i, “Hüowü! Wangdang epyange Kahwang yakjah yeme Kahta Üha yongyange taowe ngenang.”

⁵⁷Hüyangpoi iman-e yeonge üngwünne ngao ngai, na büangyange mong ja ne mengyange I tangte phet.

⁵⁸Hüyange iman-e chingnyu mepu I shuwe teiye longe Ite shüp. Hüyange naoshe ja min Saul shaome sakilanne iman inkhek tüoh.

⁵⁹Hüyange iman-e Stephen te longe shüpwante, Iye ngaowe i, “Youngwanpa Jesu, ü-yaha yayah!”

⁶⁰Hüyange I khuhta hüyange üngwünne i, “Youngwanpa! Hatüo ünu imante tahpha.” Hüyange tüo iyang pheime I shimah.