Read Konyak Naga LAMPULAN 8 Bible Online

LAMPULAN 8 - Konyak Naga bible

LAMPULAN 8

¹Hüyange Saul-e I li ne tamlak monge ngoh. Hüyange tüopa nyih me Jerusalem me bumeinok te shange pongpu üyong ngai, hüyange lampulan tokte kaiye, mengpalan üshei Judea hüyange Samaria kahtok me yanne ngoh.

²Hüyange wanglamte ütinglakpu lanne Stephen mang tümme mu, hüyange I jingne üngwünne mangshap.

³Hüyangpoi Saul-e nokphe te onge, netan hüyange sheko shuiye yüowe küpnok me küowe ange bumeinok mengne tam.

⁴Sha-a aoyin yanne tai, yanne taipalanne ükenphe me pungao ümei konnyüowe tai.

⁵Hüyange Philip Samaria chingnyute laiye Khrista jeng imante nyüotam.

⁶Aope ükhonge Philip-e nyüopu jai, hüyange Iye lingpu kahnyingwüngha nge, ükhong üyonge yeonge mongphawe jai.

⁷Hangjingne ünu yaha ngohpalan mepu ünu yahalan maawe ngao üyong ngaowe ngaitai. Hüyange yimtin ngohpalan hüyange faipalan maawe meitam.

⁸Tüokhei tüopa chingnyu me mongmei üyong ngoh.

⁹Hüyangpoi tüopa chingnyu me Simon she minpu kahta ja ngoh. Üwangpe Iye yepahipa jonne Samarialan yashanne tam. Iye yoi nying nyingke üyong ja ne she ngaowe ngai;

¹⁰hüyange iman üsheiye üjoipa mepu üyongpa ngoiye, I ngao jaiye i, “Üngan üyong she ipu Kahwang üngan kahta-a hatüo ngohnang.”

¹¹Hüyange iman-e I ngao jai, hangjingne hipak laolü-ünge Iye yoi hitoi kaiye iman yashanne tam.

¹²Hüyangpoi aope Kahwang ahngching jeng Pungao ümei hüyange Jesu Khrista min Philippe konnyüopute iman-e ütinglak, iman netan hei sheko baptitam.

¹³Hüyange Simone-o ütinglak, hüyange baptiyange Philip phei kem. Hüyange füo hei yashanlak üyong lingpu ngeye, I yashan.

¹⁴Sha-a Jerusalem me ngohpu lampulanne aope Samaria lanne Kahwang ngao yahteki she jai, iman-e Peter hei John iman tangte shon.

¹⁵Hüyange aope iman ngoi, mengpalanne Yaha Üjao yahlak jingne iman-e iman jingne yop.

¹⁶Hangjingne üne-o sha-a ngoiye iman ao te-o Yaha Üjao manpahpe ngoh; iman Youngwanpa Jesu min me hei baptiyange ngoh.

¹⁷Hüwante Peter hei John-e yakke imante shüng, hüyange iman-e Yaha Üjao yah.

¹⁸Sha-a lampulanne aope yakshüngpu kaiye Yaha Üjao phapu Simon-e nge, Iye Peter hei John nite ngin phawe i,

¹⁹“Ao te taowe, ü-yakke shünglakei, Iye Yaha Üjao yah oklak ne, hatüo üngan üte yahkei.”

²⁰Hüyangpoi Peterwe Ite i, “Nang ngin nangphei mahtüoh, hangjingne, Kahwang hünghao nginne tüolak she nange teih!

²¹Hatüo toime nangjingne meitam yejema-a tampu hango yenang, hangjingne nang mongjang Kahwang shaome shupu yeje.

²²Tüokhei nang ünu hatüo mepu mong lüptüoh, hüyange nang mongme teihpu win oklak heiya yewin oklakei she Youngwanpa te yoptüoh.

²³Hangjingne nang soihüng ükhah me hüyange ünuwe shapu me ngohnang she taowe ngenangki.”

²⁴Hüyange Simon-e janne i, “Nange ngaopu ngao jawe nehoi üte yengaitamlak jingne, Youngwanpa te nange üjing ne yoppha.”

²⁵Tüokhei iman-e saki phawe Youngwanpa ngao ngaoyang phei me, iman Jerusalem te leihye, hüyange Samaria ching maapu me pungao ümei konnyüo.

²⁶Hüyange wangdang shongmokpa jawe Philipte ngaowe i, “Yayong tüoh, hüyange heye me, hanghepa lam Jerusalem mepu Gaza ngoiye lainang, tüote taitüoh.” Tüopa-a wanwüng jengme ngohnang.

²⁷Hüyange I yayonge tai, hüyange leihu, Ethiopialan moiko kahta ja ngoh. Ethiopia ahngyha Kandase moth üshei tangme I nokpu ne menge, I wong üyong pheipu kahta ja ne ngoh. I yoplak jingne Jerusalem ngoiye ong.

²⁸Hüyange I leih yewante tongtoi me shotyange, Isaia hipa lai iye ngoh.

²⁹Hüwante Yaha Üjaowe Philipte i, “Owe wentüoh, hüyange I tongtoi me nang ongtüoh.”

³⁰Hüyange I tangte Philip phette wenne, Isaia hipa laitep Iye iye jaiye i, “Nange ipu shinge okya?”

³¹Hüyange Iye jan, “Ütamme üte yenyüoma-a taowe hangke iye shinglak? Hüyange Iye Philipte onge I phei jamme shotlak jingne tong.

³²Sha-a Iye iye ngohpu lai hatüone ngoh: “Toilak nyee ja kih I woiye tei, Hüyange nyeehawe I min khüppu shaome ngao yengaipu ke, hatüoke Iye yoi ju ye-ep.

³³I wüotüone tamme Ite ngao shuwe yephün. I jing huhayimlan jeng-a aowe-o ipu ye-oklak? Hangjingne I üyin kahtoknyu mepu yahteiteki.”

³⁴Hüyange moiko kahtawe Philipte janne i, “Taowe nangte tongnang, hipa ao jeng hatüowa ipu shi? Iye yoi jeng ipu heiya, yejema-a ülao ja jeng ipu shi?”

³⁵Hüyange Philippe yoi ju ep hüyange hatüo lai mepu wange ngaowe Ite Jesu jeng konnyüo.

³⁶Hüyange iman lamme kemwante yeng ngohjing ngoi, hüyange moikowe i, “Leihu tüome yeng ngohnangki. Tao baptilak jingne büangpu ütam ngohlak a?”

³⁷(Philip-e Ite i, “Nang mongjang üsheiye nang üting lakma-a, nang baptine oklak.” Iye jan; “Tao ütinglak nangki.” Jesu Khrista-a Kahwang Üha she taowe üting laknangki.)

³⁸Hüyange moikowe tongtoi lakne tam. Tüophei me Philip hüyange moiko imni moini yeng yete yu hüyange Philip-e Ite baptiye tam;

³⁹Hüyange aope iman-e yeng mepu ngai, Youngwanpa Yahawe Philip woitei, hüyange moikowe shaaji I ye-nge; hüyangpoi I yoi lamyete mongmei me tai.

⁴⁰Hüyangpoi Philip Azotus me nge hüyange linne taiwante, Kaisarea manngoi manngoi chingnyu üshei me Iye pungao ümei konnyüo.