Read Konyak Naga LAMPULAN 9 Bible Online

LAMPULAN 9 - Konyak Naga bible

LAMPULAN 9

¹Sha-a Saul, yelakpe Youngwanpa pinlan tangte taiye ümeng jonlak hüyange toilak jingne, Ütahpa Ngengpa tangte tongne tai,

²hüyange Damascus synagogue mepu lanphei hüoyange mengpalan lamme ngohpu ütam ngema-a netan hei sheko moini shayange Jerusalemte yelak jingne o-ngao nyanpu yuwe yah.

³I yayonge taiwante Damascus chingnyu pephang ngoi, hüyange mokhshe wangdang mepu wangngai ja I neikonne tee.

⁴Hüwante I kahtokte yeita, hüyange ngaowüng jawe Ite ngaowe i, “Saul, Saul! Hangne nange üte shaoshine tampu shi?”

⁵Hüyange Iye i, “Nang ao shi, Youngwanpa?” Hüyange Iye jan, “Nange shaoshine tampu Jesu Tao;

⁶hüyangpoi lüotüoh, hüyange chingnyute ongtüoh, hüyange nange hanghe linglak wongpong hatüo nangte iphalak.”

⁷Hüyange Iphei taipu kahtalanne ao-o ye-ngepe, ngao shaha jaiye, ngao yengao okpe yong.

⁸Hüyange Saul kahtok mepu yayong, hüyange aope I mük wem Iye hango ye-nge; tüokhei iman-e yakke I shuyange Damascus te woi in.

⁹Hüyange I nyih lüm, hango ye-ngepe ngoh, hüyange hah-o yehah ying-o yeying.

¹⁰Sha-a Damascus me Ananias she minpu pin ja ngoh. Ite Youngwanpawe himang me i, “Ananias!” Hüyange Iye i, “Youngwanpa, tao tüome ngohnang.”

¹¹Hüyange Youngwanpawe Ite i, “Yayongtüoh, hüyange Tingkhak she nyikpu lamnyute taitüoh, hüyange Judas nokme Saul she minyange Tarsaslan ja tongtüoh; hangjingne leiyah, Iye yopnang;

¹²hüyange Iye Ananias she nyikpu kahta ja I ngeyetamlak jingne peiye I yakke Ite shinge ngeteki.”

¹³Hüyangpoi Ananias janne i, “Youngwanpa, kahta maapu mepu tüopa kahta jeng Jerusalem me nangjing üjaolan te Iye yeonge yemeipe hangke jon, taowe jaiyangki,

¹⁴hüyange tüome nang min me nyikpu üshei phoshalak jingne ngengpa üjenglan mepu yahpu wong Ime ngohnang.”

¹⁵Hüyangpoi Youngwanpawe Ite i, “Nang taitüoh, hangjingne yinhulan, ahngpalan, hüyange Israel hayimlan tangte ü-min kilak, I ü-jingne leyangpu wan ngohnang;

¹⁶hangjingne ü-min jingne I hangshin me hangke shange ponglak, Taowe Ite hüolak.”

¹⁷Hüyange Ananias yayonge taiye nokte ong, hüyange Ite yakke shüngyange i, “Jeiheinao Saul, nang peipu lamme nang tangte ngaipu Youngwanpa Jesuwe, nang ngeye tamlak hüyange Yaha Üjaowe maatamlak jingne tao shon.”

¹⁸Hüyange hüwante muh I mükmepu nyahla kihpu yei, hüyange Iye ngepu ok, hüyange I yonge taiye bapti;

¹⁹hüyange hahying ütam hahyang phei me I me wongpei. Hüyange I Damascus me pinlan phei nyih ütenja ngoh.

²⁰Hüyange hüwante muh synagoguelan me, “Jesuwa Kahwang Üha she Iye üngwünne tam.”

²¹Hüyange Ite jaipalan üsheiye yashanne i, “Hatüo minme nyikpalante Jerusalem me shangne tampu I ne yeje a? Hüyange Iye Ütahpa Ngengpa tangte iman shayange yahyelak she iyange tüome peiyangki!”

²²Hüyangpoi Saul, wong ünyei tüowe ngai, hüyange Jesuwa Messiah she Iye saki phapu jamloi ngao, tüokaiye Damascus me ngohpu Jehudilanne I ngao te yejan ok.

²³Nyih nangjange taiphei me, Jehudilan jem, hüyange I toilak kon yam.

²⁴Hüyangpoi iman kon Saul-e shinge pei. Hüyange I toilak jingne iman-e nyihning hüyange yaning petenlan yomme ngoh.

²⁵Hüyangpoi I pinlanne yaning I woiteiye chingtukpenyu kaiye muhto ja me I nowe kaitam.

²⁶Aope I Jerusalem te pei, Iye pinlan phei omlak jingne ngang; hüyange I-o pinja she üting yelak okpe, iman üsheiye Ite nyam.

²⁷Hüyangpoi Barnabaswe lampulan tangte I woipei, hüyange hangke lamme Iye Youngwanpa nge, hüyange Iye I phei ngao, hüyange hangke Damascus me Jesu min me wongnange konnyüo, hatüo imante jaine tam.

²⁸Tüokhei Youngwanpa min me wong nange konnyüowe, I Jerusalem me onge peiye iman phei ngoh.

²⁹Hüyange Iye Greek ngaopu Jehudilan phei ngaowe mop, hüyangpoi iman-e I toilak yamme ngoh.

³⁰Hüyange aope jeiheinaolanne tüopa shing, iman-e I Kaisareate woilai, hüyange Tarsaste shon.

³¹Tüokhei Judea, Galilee hüyange Samaria üshei me bumeinok jaalunne chingmei me ngoh, hüyange Youngwanpa nyamlepu hüyange Yaha Üjao toloimei tampume kemme jaalun.

³²Sha-a Peter kenphe me kemwante, Lidda me üjaolan tangte-o pei.

³³Hüyange tüome Iye Aeneas she minpu lengme wangpeng tet yimtinne dakpu kahta ja nge.

³⁴Hüyange Peterwe Ite i, “Aeneas, Jesu Khristawe nang meitam nang! Lüotüoh hüyange nang leng tümyah.” Hüyange hüwante muh I lüo.

³⁵Hüyange Lidda me hüyange Sharon me ngohpu üsheiye I ngeye Youngwanpa tangte monglüp.

³⁶Sha-a Joppa me Tabitha she minpu ütinglakpu sheko ja ngoh. Greek me yha minna Dorcas, leppu-tokpongha. Yhawe yoi hipak khongkümpu toimei lingpu me hüyange toihalante paotükpu me winne ngoh.

³⁷Tüopa nyih hei hipak me hatüo ngai, yha dak-e li, liphei me iman-e yha yengyaowe tümyange, ütangpa tüp me ang.

³⁸Hüyange Joppa ü-o me Lidda ngohpu jingne, pinlanne Peter tüome ngohpu jaiye, I tangte kahta ni shonne tonge i, “Toman tangte yeshonpe ongkei.”

³⁹Tüokhei Peter yayong hüyange iman phei tai; Hüyange aope I ngoi, iman-e I ütangpa tüp te woi in. I neikonne wamnyulan üshei yongyange shap; hüyange Dorcas üyin me iman phei ngohwante yhawe shüngpu phakshaoh hei nyemo Peterte hüo.

⁴⁰Hüyangpoi Peterwe iman üshei tüp mepu taine tam hüyange yatuhshing yange yop. Hüyange mang yekaote lüpyange i, “Tabitha, lüotüoh!” Hüwante yhawe mükwem, hüyange aope yhawe Peter nge, yha lüowe shot.

⁴¹Hüyange Iye yha yakme jonyange lüo yongne tam, hüyange üjaolan hüyange wamnyulan nyik-e, Iye yha üyin pha.

⁴²Hüyange hatüo Joppa üshei me shinge pei, hüyange maawe Youngwanpa te ütinglak.

⁴³Hüyange Joppa me meisho lingpa Simon she minpu kahta ja phei Peter hipak laowe nyoi.