Read Konyak Naga ROME 1 Bible Online

ROME 1 - Konyak Naga bible

ROME 1

¹Paul, Jesu Khrista shaoshanpa, lampu ja ne menglak jingne nyikpu, hüyange Kahwang pungao ümei jingne yanne angpu;

²hatüo pungao ümei Kahwange Üjaolai me I hipalan kaiye üshongwante jan;

³hüyange hatüo pungao ümei I Ha jeng ngohnang, ao meime David nokli mepu puh,

⁴hüyange Yaha Üjao me lipu mepu yange yepu kaiye I Kahwang Üha ngohnang she, ünganne hüowe, hüke Jesu Khrista, teman Youngwanpa;

⁵ao kaiye teman-e shüpshe tüo hüyange lampu ne meng, I min jingne jat üshei yo me ütinglakpu mepu ngaiye ngaojaipu wange tamlak jingne,

⁶hüyange Jesu Khrista jingne aoyin Kahwange nyikyangki, numan-o omme ngohnang.

⁷Kahwange kenpu hüyange üjaolan ne mengne nyikpu Rome me ngohpu üshei tangte; teman Üpa Kahwang hüyange Youngwanpa Jesu Khrista mepu numan tangte shüpshe hüyange chingmei ngoh tüoh.

⁸Üwangne, numan üshei jingne Jesu Khrista kaiye taowe Ü-Kahwang minyong nang, hangjingne kahtok üshei yeme numan ütinglakpu jeng ngaolan jaine tam nangpu.

⁹Hangjingne Kahwang-a ü-saki, ao te ü-yahawe I Ha pungao ümei shaoshan nang, hüyange yelakpe taowe ü-yoppu me numan omnang.

¹⁰Kahwange mongma-a ngange nehoi sha-a üküm yeme tao numan tangte pei oklak jingne yopnang.

¹¹Numan wongnange tamlak jingne hüyange taowe numante yaha hünghao ütam phalak jingne taowe numan hüohuwe teihnang;

¹²hatüo ngaowa tüo; hüke numan yo me tao numan phei jamme, teman üsheiye jawe ja ütinglakpuwe, numan hüyange ü-üting lakpuwe teishinlak.

¹³Jeiheinaolan, taowe numante tüo shingne tamhu nangki, hatüowa hipak lep iye taowe numan tangte peilak tüm, hüyangpoi ülamjawe jinte tien nangki. Ülao Yinhulan yomepuke, taowe numan yomepu-o ülick wet-hu nangki.

¹⁴Greeklan hei Barbarlan ni, hüyange shingemanpalan hei yeshing yemanpu nite tao tangshüoh ngohnang.

¹⁵Tüokhei taowe okpu shinne numan Rome me ngohpalan te-o pungao ümei konnyüolak jingne taowe tümme ngohnang.

¹⁶Hangjingne tao pungao ümei jingne yewüo; hangjingne ütinglakpalan üshei, üwangne Jehudilante, hüyange Greeklan-o yinlak, pungao ümei me Kahwang ünganwong ngohnang.

¹⁷Hangjingne Pungao ümeima-a Kahwang khakshupu ütinglakpu mepu ütinglakpu jingne ütahte ngai ngohnang; nyanne ngohpuke, “Ütinglakpuwe khakshuwe ngohpalan ngohlak.”

¹⁸Hangjingne ünu hüyange yejaoyeshapu kahtalan, aoyinne yejaoyeshapuwe ngaoting tien nang, iman phei tüi-e Kahwang mongshih ngaipu wangdang mepu ütahte ngai ngohnang.

¹⁹Hangjingne Kahwang jeng hanghe shingne ok, hatüowa imante ütahte ngai ngoh nang; hangjingne Kahwange hatüowa iman tangte ütahte ngai.

²⁰Hangjingne kahtoknyu lingwante muh I jeng mükke ye-ngepulan, minlan, I üküm yenangpu ünganwong hüyange Kahwang nyoingoh hüyange I Kahwang ütingpa she, tüolan-a yaopu toilan kaiye shinge kenting shakke nge ngohnang. Tüokhei iman jingne ümeng winlak yenang;

²¹hangjingne iman-e Kahwang shingyapoi, I Kahwang kih müktishiwa ne yetam yejema-a minyongpu yepha: hüyangpoi iman juteih me jajang japune meng, hüyange iman angsa kenmong nyakke mengne tam.

²²Iman-e yoi nying nyingke kentamong tingnang she iye, iman üngapa ne meng.

²³Hüyange iman mahlak kahta, awhalan, yinmoklan, hüyange lehkempu (toshitolao) yinmoklan linge, yemah oklak Kahwang müktishiwa leijei.

²⁴Tüojingne iman yo me yoi püm ye-i-yeshe tamlak jingne Kahwange iman mongjang ünuwe yejaopupate phünne pha;

²⁵hangjingne iman-e üleihpa phei Kahwang ngaotingpa leijei, hüyange Yaopa nanleiye yaowe ngaipu toilante yoppe khüm hüyange shaoshan, ao jinjinte moiman! Amen.

²⁶Tüojingne Kahwange yewüopu lengpute iman phünne pha. Hangjingne iman shekolanne jonpu wanglam angyange, hanghepa wanglam ne yeje tüopa jon.

²⁷Hüyange hükemuh netanlane-o sheko phei jonpu wanglam angyange, jawe japhei ünu jonlak kennemong me loonge, netanlan ne netan phei wüolak toijon, hüyange iman-e yoite yoi ümeng küw hanghe tüolak ne ngoh hatüo iman-e tüo.

²⁸Hüyange iman-e iman ütingpa shingemanpu Kahwang me angtamne yejanpu jingne, Kahwange yejepu toi lingne wüopu yenangpu ünu kennemongte iman phünne pha.

²⁹Iman yejaoyeshapuwe maawe ümeng, waupu, nupu, aohüngpu, toilangpu, teelapu, teilopu, hüyange teinupu; iman ngaolo iye jempu,

³⁰hüyange eiha ümeng jeng ngaopu, iman-e Kahwang te nupu, ye-i-yeshepu, naoyampu, otapu, hüyange yongelüopu; iman-e ünyei ümeng linglak jingne juteihpu, nyupalan ngao yejaipu;

³¹üngapa, ütingyelakpu, mongjang yejhotpu, yeyayengpu,

³²Kahwangpa ngaokeng me, aoyinne tüolan jon, lilak wangnang she shingyapoi, iman-e tüolan jonpu shaha yeje, hüyangpoi üne-o tüolan jonpu kahtalante iman-e shupu she teihnang.