Read Konyak Naga ROME 10 Bible Online

ROME 10 - Konyak Naga bible

ROME 10

¹Jeiheinaolan, ü-mongjang me yoonge teihpu hüyange Kahwangte taowe yoppuwa iman yinlak jingne ngohnang.

²Hangjingne Kahwang jingne iman lahnyikpu ngohnang she taowe iman jeng saki phanang, hüpoi iman lahnyikpuwe wangngai tampu yenang.

³Hangjingne iman-e Kahwang khakshupupa yeshingpe yoi nying nyingke tüopa hüone yampu jingne, iman-e yoi nying nyingke Kahwang khakshupupa phangte yepei.

⁴Hangjingne aoyinne ütinglak moilante tingtampu phalak jingne Khrista-a ngaokhüm ükümpa ngohnang.

⁵Hangjingne “aowe ngaokeng me ngohpu khakshupu linglakei I tüopa linge üyin ngohlak, she Mosawe nyan.”

⁶Hüyangpoi üting lakpupa jing khakshupupawe hüke inang; “Nang mongjang me tah i, ao wangdang te ongpu oklak?” hatüowa Khrista yeitaine,

⁷yejema-a, “Ao lakjing yenangpu kahsa te yulak?” (tüowa, Khrista lipu mepu yah yene).

⁸Hüpoi hatüowe hanghe inang? Ngaowa nang ü-o me, nang ju hüyange nang mongjang me ngohnang tüowa, toman-e nyüopu ütinglakpu ngao;

⁹hangjingne, nange nang juwe Jesuwa Youngwanpa she janma-a, hüyange nang mongjang me Kahwange I lipu mepu yange yene tam she mengma-a, nang yinlak.

¹⁰Hangjingne üjaopa ne menglak jingne kahtawe mongjange mengnang, hüyange yinyepu tüolak jingne juwe Iye jannang.

¹¹Hangjingne ngaolaiye inang: “Aowe Ite menglakei I wüotüone yetamlak.”

¹²Hangjingne Jehudilan hüyange Greeklan nipa me hango yoi yoi yenang, hangjingne Youngwanpa ja muh üshei tangte Youngwanpa ngohnang, hüyange Ite tongpu üsheite I hakpa.

¹³Hangjingne, “Aoyinne Youngwanpa min me nyiklakei I yinlak.”

¹⁴Hüpoi aote iman-e yemeng Ite hangke nyiklak? Hüyange ao jeng iman-e yejai Ite hangke menglak? Hüyange konnyüopa ütam-e imante nyüopu yenangma-a, iman-e hangke jailak?

¹⁵Hüyange iman shon yeteima-a, kahtalanne hangke konnyüolak? Nyanne ngohpuke: “Pungao ümei jeng mongmeilak ngaolan yah peipalan ya hangke shemei yüoma!”

¹⁶Hüyangpoi pungao ümeite iman üsheiye mengpu ne yeje. Hangjingne, Isaiawe inang, “Youngwanpa, toman mepu Iye hanghe jaiyapeih tüote aowe ütinglakpu?”

¹⁷Tüokhei ütinglakpuwa jaipu mepu pei, hüyange jaipuwa Khrista ngao mepu pei.

¹⁸Hüyangpoi taowe tong: Iman-e manjai pu a? Ütingme iman-e jai; hangjingne, “Iman ngaowüng kahtoknyu üshei yete, hüyange iman ngaolan kahtoknyu üküm ngoiye tai.”

¹⁹Üne-o taowe tong, Israel lanne yeshingpu a? Üwangne Mosa-e inang, “Hanghepa jatli ne yenang hatüowe taowe numan müktakne tamlak; juteih yenangpu jat-e taowe numan mongshih ngaine tamlak.”

²⁰Hüyange Isaiawe yeonge mongyonge inang, “Aoyinne tao yeyam iman-e tao tüo; hüyange aoyinne ü-jeng yetong, imante tao ü-nying nyingke ütahte ngai hüo.”

²¹Hüpoi Iye Israel lante tüo inang, “Ngao yejaipu hüyange longetanpa lante nyihlao hipak taowe peiye tamlak jingne yak lanyangki.”