Read Konyak Naga ROME 11 Bible Online

ROME 11 - Konyak Naga bible

ROME 11

¹Hümma-a taowe tong, Kahwange yoi kahta yeyahpu a? Hüke aope-o yeje! Hangjingne tao-o Abraham üli, Benjamin nokphong mepu Israellan ja ngohnang.

²Iye üwangne muh leyangpu kahta Kahwange yewinja. Laingaowe hanghe i, Elijahwe Israel phei tüi-e Kahwangte tongpu jeng nyanpu nange shingya?

³“Youngwanpa, iman-e nangjing hipalan toiyangki, iman-e nangjing wümjonglan pheckke mengyangki, hüyange ü-shaha, towe ngohnang; hüyange iman-e ü-üyin-o yamnang!”

⁴Hüyangpoi Kahwang mepu Ite hangke janpu shi? “Taowe üjingne Baal shaome ümme yekhümpu haja nyit towe angnang.”

⁵Hüke muh sha-apu hipak me-o shüpsheye leyahpu phei shuwe jetohapulan Kahwange towe ngohnang.

⁶Iye lepuwa shüpshe me yafün lingnang; iman-e hanghe lingyangki tüopa me yeje. Hangjingne Kahwangpawe kahtawe hanghe ling tüopa me yafün yange lepu ne mengma-a, hümma-a shüpshe-a ütingpa shüpshe ne yeje.

⁷Hüma-a hanghe? Israel-e hanghe yam hatüo yetüo, hüpoi leyangpu lanne hatüo tüo, hüyange topulan mongjang wanne tam;

⁸hüke nyanne ngohnang: “Kahwange imante ye-innyaipu yaha, ye-ngelak mük hüyange yejailak na pha, hüyange tenyih ngoiye hüke ngohnang.”

⁹Hüyange David-e inang, “Iman-e hahpu mo iman jingne tün hüyange jhom, iman yeita shih, hüyange imante shaoshi yateng tamshih!

¹⁰Iman-e ye-nge oklakne iman jing mük pomtam shih, hüyange iman shangpuwe jinte iman tok kokne tam tüoh.”

¹¹Tüokhei, taowe tong, mahtam ne iman yashah hüopu a? Hüke aope-o yeje! Hüpoi iman-e ünu ompu jingne iman-e müktakke tamlak jingne yinhulan tangte yinyepu pei.

¹²Sha-a Israel lanne ünu ompu jingne kahtoknyu jingne hak-hepu yah peipu ne mengma-a, hüyange yaha me iman ye-okpu ngepuwe Yinhulan haklak moiman peitampu ne mengma-a; hümma-a aope Israel khongkümpu omteki she ilakei, moiman hangshin yonglak!

¹³Sha-a numan yinhulante taowe ngaonang. Yinhulan tangte tao teshinne lampune menge, taowe ü-shao shanpu müktishiwa tam.

¹⁴Üpheipu Jehudilanne müktakke tamlak jingne, hüyange tüowe iman ütam yinlak jingne,

¹⁵hangjingne iman-e yeyahpute leppuwa kahtoknyu phei mongkenhahjiengpu ne mengma-a, iman-e yahpute leppuwa lipu mepu üyin ne mengpu tokte kaiye hanghe ngohlak?

¹⁶Üwangpa pelick ü-oun Kahwangte phapune mengma-a, ülao khongkümpu hüke I jing ngohnang: hüyange pee yalahlan Kahwangte dopu ne mengma-a üquilan-o hüke I jing ngohnang.

¹⁷Hüyangpoi üqui ütam phakke mengma-a, hüyange nang phao mepu olive peequi ne menge, iman nyoi me nyimyange hüyange iman phei olive pee yalah üyao yahpalan phei om ma-a, hümma-a nang üqui me yonglüowe tahngoh.

¹⁸Hüyangpoi nange yongelüoma-a teihtüoyah, üya-a nange püotükpu ne yeje, hüpoi üyawe nangte püotük nang.

¹⁹Hüyange nange ine ok. “Tao nyimlak jingne üquilan phakke meng.”

²⁰Tüowa üting, iman ütinglakpu yenangpu nanjingne iman phakke meng, hüpoi nanga, nang ütinglakpuwe yongyange ngohnang.

²¹Tüokhei mongyonge tahngoh, hüpoi nyamme ngohyah: hangjingne Kahwange ütingpa üquilante nehoi yetünma-a numante-o Iye yetünlak.

²²Tüokhei Kahwang nyoingoh ümei hüyange mengshipu te leiyah: aoyin lanmah nang iman yete meang sheshi, hüpoi nange Kahwang nyoingoh ümei me yelakpe ngohma-a, nang yekaote I yayeng shüpshelak. Yejema-a nango lange winlak.

²³Hüyange Jehudilanne iman-e üting yelak okpu mepu yanma-a, iman-e ümeken me ngohyangki, tüoken nyoi me iman yenetamlak. Hangjingne iman nishe nyimtamlak Kahwang me ünganwong ngoh nang.

²⁴Numan yinhulan-a, phao olive peequi phakke taiteiye ngoh, tüophei me püowetüklak ne wanpu, püowetükke jongpu olive pee me hüppe tampu lenang. Jehudilan-a püowetükke jongpu pee kih-e, hüyange tüopa phakke tai ngohpu pequilan-a yoipe memuh hüppe tamlak Kahwang jingne-o she-o-lak.

²⁵Hangjingne ü-jeiheinaolan, numan kentamong tingnang she otamaohe ngohlak yang she, yinhulan wangpune mengpu manpei manpei, Israellan tangkhüwe mongjang wanmah she, tüopa lopu ngao taowe numante shingne yetampe ye-anghu;

²⁶tüokhei Israellan khongkümpu yinlak; nyanne ngohpuke: “Yinne tampupa-a Zion mepu ngailak; hüyange Iye Jacob huhayim mepu yejaoyeshapu üshei yahteilak.”

²⁷“Aope taowe iman ünulan yahteilakei, hüwante taowe iman phei tüopa jiengjeppu linglak.”

²⁸Numan yinhulan jing üne, hangjingne iman-e Pungao Ümei yeyahpu jingne Jehudilan-a Kahwangpa wepa. Hüpoi Kahwangpawe leyangpu imanjing pajeiyonglan jingne iman-a I shümpa.

²⁹Hangjingne Iye leyangpu hüyange moimanyangpulan jingne Kahwange yoi kenmong yejeilei.

³⁰Hüke numan yinhulan, lintepu hipak me numan-e Kahwangpate ngao yejai, hüpoi sha-a Jehudilanne ngao yejaipu jingne numan-e Kahwangpa shüpshe tüoteki.

³¹Tüokih-e muh, numan-e shüpshe tüopu jingne, imane-o Kahwangpa shüpshe tüowe oklak jingne, sha-a Jehudilanne Kahwangte ngao yejai.

³²Hangjingne Kahwange iman khongkümpute shüpshe hüowe oklak jingne Iye kahtalan khongküm ngao yejaipupa küpnok me hüng-ang.

³³Kahwangpa hak-hepuwa hangshin yong! I jing konjong hei shinge manpu hangshin lupu! Iye ngaophün yahyangpuwa aowe iye oklak? I jing tailam-a aowe shingne oklak?

³⁴Laingaowe ipuke: “Youngwanpa kenmonga aowe shinglak? Aowe Ite nyüoweleipu oklak?

³⁵Ite Iye shümme yelak ne aowe-o Ite ülam ja nehoi jepha man?”

³⁶Hangjingne sheminlamphe Iye lingengai, hüyange sheminlamphe I jingne I kaiye ngai. Kahwang te jintepu jingne müktishiwatüoh! Amen.