Read Konyak Naga ROME 12 Bible Online

ROME 12 - Konyak Naga bible

ROME 12

¹Tüokhei, jeiheinaolan, numan-e yoi püm üyin toidopu ja, üjao hüyange yah oklakne dotüoh she, taowe Kahwang shüpshe kaiye numante hengnang. Tüopa-a numan yahame yoppe khümpu ngohnang.

²Tüopa jin wanglamke tahngoh, hüpoi ümei, yah oklakpa hüyange wangngoipu Kahwang mongpu wanglamke hanghe hatüo tokke shinglak jingne, numan kenmong üla ne mengpu kaiye numan leijei ne tamtüoh.

³Hangjingne shuwe teihyangpu tokte yoi ünyei daowe yonge tahtei, hüpoi Kahwange kahta lilite hanghe meitamme ütinglakpu pha, hatüo phei phinne yoi jeng nünne teihyah she, taowe üte phapu shüpshe kaiye numan yo me kahta pümlep ipute inang.

⁴Hangjingne hangke püm ja me ümük maawe ngohnang, hüyange ümük üshei lingyahpu ja shaha ne yeje,

⁵hüke teman maawe ngohyapoi, teman Khrista me püm ja ngohnang, hüyange kahta liliye jawe japhei ümük japongne menge ngohnang.

⁶Temante phapu shüpshe phei phinne hünghao yoi yoi ne menge, hipa hünghao ne mengma-a, teman-e ütinglakpu phei phinne hi-ngao ngaotüoh;

⁷Yejema-a shaoshanlak hünghao ne mengma-a, teman-e shaoshanpu me phünne phahah; yejema-a aowe nyüonang Iye nyüotüoh;

⁸yejema-a aowe henglakne ngoh, Iye hengpu phatüoh; aowe mongonge pha, Iye mongong monglepu phei phatüoh, aowe wanglam lamnang Iye yak yengaipe wanglam lamtüoh; aowe yayeng shüpshe hüo Iye mongmei sheiye hüotüoh.

⁹Khakwangpu me teiken yah. Hanghe ümeng tüote nuyah; hanghe ümeipa ngoh tüopa tükyah.

¹⁰Jeiheinao teikenpu me yeonge meiye teikenyah; wangshüm hüopume jawe ja sheyongpu she teihyah.

¹¹Ngange lingtüoh, hüyange jookpa ne tahmeng. Yaha me lahnyikpu phei; Youngwanpa shaoshan-e ngohyah;

¹²monghümpu me mongong tüoh; shanghah shaoshiwante nün oktüoh; yoppu me yelakpe mongjüonge ngohtüoh.

¹³Üjaopalan wongpong me phatüoh; yinpate yayeng hüotüoh.

¹⁴Numan shangne tampalante moimantamtüoh, moimantüoh hüyange imante tahphoi.

¹⁵Aoyin hoongli mongong iman phei hoongli mongmei tüoh; hüyange aoyin shapnang iman phei shaptüoh.

¹⁶Numan jawe japhei kenmong ja ne ngoh yah. Kheyonglak toijeng tahteih, hüpoi innenyaipu kahtalan phei pangyah. “Numan nying nyingke deitahpa she tahteih.”

¹⁷Aote-o ümeng nanleiye ümeng tah pha. Kahta üshei phei hanghe ngaoting ngoh, tüopa linglak jingne juteih angyah.

¹⁸Okma-a nanga kahta üshei phei chingmei me ngohtüoh.

¹⁹Jeiheinaolan, numan nying nyingke phuh tah-hah; hüpoi Kahwang mongshih ngaipu tanne ngohtüoh, hangjingne hüke nyanne ngohnang; “Phuh hahpuwa üjing; taowe leih phalak.”

²⁰Hüleima-a, “Nang wepa seanyao ma-a, uhtamtüoh; yenglema-a, yingne tamtüoh. Hangjingne tüo lingwante nange I shangtang me vünloong ngohpu vünhan moijem nang.”

²¹Ümenge okne tahtam, hüpoi ümeipawe ümeng okne tamtüoh.