Read Konyak Naga ROME 13 Bible Online

ROME 13 - Konyak Naga bible

ROME 13

¹Kahta lili wanglam lampalan phangme ngohtüoh; hangjingne Kahwang mepu yejepute wanglam lampa ao-o yenang; hüyange ngaiye ngohpu wanglam lampalan Kahwange leye ngai.

²Tüokhei aowe tüopa wanglam lampa tien yongnang, Iye Kahwange leye tamyangpupa tien-e yongnang; tüokhei aoyinne tien-e yongnang iman-e yoi nying nyingke ngaophünpu ngelak.

³Hangjingne wanglam lampalan toimei jingne nyamlak yenang, hüpoi toimeng jingne nyamlak ngohnang. Nange wanglam lampate yenyampe ngohhu nangkü a? Hanghe ümei hatüo lingtüoh, hüyange nange I mepu monghahpu tüolak.

⁴Hangjingne nang tangte ümei jingne Kahwang mepu I shaoshanpa ja ngohnang. Hüpoi nange hanghe ümeng tüopa lingma-a, nyamyah. Hangjingne jajang jawe Iye yanglow yejon; hangne Kahwang mepu I shaoshanpa ja; mongshih ngaiye ümeng lingpalante phuh hahpa ngohnang.

⁵Tüokhei Kahwang mongshih ngaipu te nyampu ne shaha yeje, hüpoi numan juteih mongjang jingne-o numan-e wanglam lampa phangme ngohyah.

⁶Hangjingne tüojingne numan-e kahngin phanang; hangjingne iman-e tüopa toi yelakpe linge, Kahwang toishao me shaoshanpalan ngohnang.

⁷Aote hanghe phalak ne ngoh, imante üshei phatüoh; kahngin phalak ne ngohpupate kahngin phatüoh, poon phalak ne ngohpate poon phatüoh; aote iyeshelakne ngoh, Ite iyeshetüoh, hüyange aote yihnoon hüolak ne ngoh, Ite yihnoonpu hüotüoh.

⁸Jawe japhei teikenlak tokte kaiye, ao phei-o pheeisea tahnang. Hangjingne aowe yoi yupite kennang Iye ngaokeng ngaine tamyangki.

⁹Tüokhei, “Nange phwngngampu toi tahling, nange tahtoi, nange tahkuh, nange tahwau;” hüyange üne-o ngaokeng ütam ngohma-a, “Nange nang yupipate yoike kenyah,” tüopa ngaome üshei omme ngohnang.

¹⁰Kenpuwe yupite hanghe ümengo yeling ja, tüokhei kenpuwe ngaokeng ütahte ngaine tamnang.

¹¹Hüyange sha-a shiye ngohpu mepu lüolak ngoiteki she numan-e tüopa wengtuh ju shing. Hangjingne teman-e üwangne meng ngohpupa phei-a sha-a yinyepuwa ünyei teman shongte owe ngohnang.

¹²Wangnyak nangjange taiteki, wangngai owe peiteki. Tüokhei teman-e wangnyak toishao tüotüoh, hüyange wangngai wehok o tümyah.

¹³Teman-e nyihning kih-e ngaoting iye kemhah; phayangpa hei yuwe jokpume yeje, iymei lengpu hei yejaoyeshapu me yeje, teelapu hei aohüng müktakpu me yeje.

¹⁴Tüonanlei numan-e Youngwanpa Jesu Khrista oyah, hüyange meiye lengpu ngaitamlak jingne mei tahteih.