Read Konyak Naga ROME 14 Bible Online

ROME 14 - Konyak Naga bible

ROME 14

¹Ütinglakpu me ao wong yenang numan-e I yahtüoh, hüpoi I juteih jengme numan-e ngao moppu tahngai.

²Kahta jawe lampheli hah oklak ne ütinglakpu ngohne ok, hüpoi ao ütinglakpu me wong yenang Iye hoilai hei hahnang.

³Aowe hah Iye yehahpupa ye-i-yeshepe tahling, hüyange aowe yehah Iye hahpupate ngao tahphün, hangjingne Kahwange I yahteki.

⁴Eihajing shaoshanpa te ngaophünlak nang ao shi? Hatüowa I yoi nokpupa shongme I yongnang yejema-a toita nang. Eiyang, I yongne tamkülak, hangjingne I yongne tamlak Youngwanpa me wong ngohnang.

⁵Kahta jawe hüke nyih japhei-a, ülao nyih japa shemeipu she teihnang; ülao kahta jawe nyih üshei teilepu phei jakih ngohnang she teihnang. Kahta liliye yoi kenmong me kenting shakke tümne tamtüoh.

⁶Aowe nyih ütam-a toinyu she inang, Iye hatüowa Youngwanpa iyeshepu jingne inang. Hüyange aowe hahnang, Iye Youngwanpate minyong phayange hahnang, hangjingne Iye Kahwangte minyongpu phanang. Hüyange aowe yehah, Iye Youngwanpate iyeshepu jingne yehah, hüyange Iye Kahwangte minyongpu phanang.

⁷Hangjingne teman aowe-o yoi jingne üyin yengoh, hüyange yoi jingne yeli.

⁸Hangjingne teman üyin ngohma-a, teman Youngwanpa jingne üyin ngohnang; hüyange teman lima-a, teman Youngwanpa jingne linang. Tüokhei teman liyapoi, yejema-a üyin ngohyapoi, teman Youngwanpa jing.

⁹Hangjingne lipu hei üyin ngohpu ni tangte Youngwanpa ne mengne Khrista li hüyange yange ye.

¹⁰Hüpoi hangne nange nang jeiheinao ja ngao phünpu shi? Yejema-a üne-o hangne nange jeiheinao ja ye-i-yeshepu? Hangjingne teman üshei Kahwangpa ngaophünpu shotjing shongme yonglak.

¹¹Hangjingne hüke nyanne ngohnang: “Tao üyin me ngohtepuwe, Youngwanpawe inang, yatuh üsheiye üshongme ümme khümlak, hüyange yee üsheiye Kahwangte yihlupu phalak.”

¹²Tüokhei teman kahta liliye yoi yoijeng Kahwangte ngaolan phalak.

¹³Tüokhei teman-e üne-o jawe ja ngao tahphünhah; hüpoi aowe-o yoi jeiheinao yashah hüolak yejema-a haone tamlak aope-o yelinglak she mongeteih tüoh.

¹⁴Yoi nying nyingke yejao yeshapu hango yenang, hüpoi aowe hanghe toi yejaopu she teihnang, I jingne hatüo yejaopu she taowe Youngwanpa Jesute ütinglakpu kaiye shing.

¹⁵Hangjingne nange hahyingpu jingne nang jeiheinao ja mengne tamma-a, nange shaaji yayeng me yekem. Ao jingne Khrista li, nang hahyinge I mahne tahtam.

¹⁶Numan meipu jengte yemeipe ngaomeng ngaone tahtam.

¹⁷Hangjingne Kahwang ahngchinga hahlak yejema-a yinglak yeje, hüpoi Yaha Üjao me khakshupu chingmei hüyange mongmei ngohnang.

¹⁸Hangjingne aowe Khrista shaoshannang Iye Kahwang monghah ne tamnang, hüyange kahta shaome-o monghahpu tüonang.

¹⁹Tüokhei hangheye chingmei ngaitamnang hüyange hangheye jawe ja nyoingoh me wongnangne tam, tüolan teman-e jonhah.

²⁰Hahying jingne Kahwang toishao tahwin. Ütingme toi üshei jaowe ngohnang, hüyangpoi aowe hahyinge ülao yashah hüone tam, I jingne hatüo ünu ngohnang.

²¹Mei hahpune jeyah, wuwüngti yingpu ne jeyah, yejema-a hangheye nang jeiheinao yashah hüone tam, tüolan-a yelingpu shemei.

²²Nang hanghepa ütinglakpu ngoh Kahwang nang nipa me angyah. Hanghepa meinang she yah, tüopa me aowe yoi nying nyingke ngao yephün, I mongmeilak.

²³Hüyangpoi nüngneiye hahma-a I yeshu, hangjingne Iye ütinglakpu phei yehah; hangjingne hanghe ütinglak puwe yeje tüowa ünu.