Read Konyak Naga ROME 15 Bible Online

ROME 15 - Konyak Naga bible

ROME 15

¹Teman aoyin ütinglakpu me wong nange ngoh yoi nying nyingke mongmeilak jingne yeje, hüpoi wong yenangpe ye-ok-yeshang palante jamponglak yang.

²Teman kahta liliye yoi yupi meilak jingne hüyange wongnange tamlak jingne I mongmeine tamhah.

³Hangjingne Khristawe-o yoi nying nyingke mongmei ne yetam, hüpoi nyanne ngohpuke: “Aowe nangte yaowele iman-e yaowelepu üte yei.”

⁴Hangjingne nün-okpu kaiye hüyange ngaolai mepu toloimei kaiye monghümpu tüolak jingne üshong hipak me hanghe nyan, tüolan teman-e shingeyahlak jingne nyan.

⁵Sha-a nün okpu hüyange toloimei Kahwange numan jawe japhei, Khrista Jesu phei mong ja ne menge,

⁶hüke hei ja ne mengyange Youngwanpa Jesu Khrista hüyange Ipa Kahwang müktishiwa tamlak jingne numan-e lingtüoh.

⁷Tüokhei hangke Khristawe numan yah hüke numan-e Kahwang müktishiwa jingne jawe ja yahtüoh,

⁸Puyimlante Kahwange janyangpu ütingme ngailak jingne, hüyange Kahwang ngaotingme ngohnang she hüolak jingne Jehudilan shaoshanpa ne Khrista meng she taowe inang;

⁹hüyange I shüpshe jingne yinhulanne Kahwang müktishiwalak jingne; nyanne ngohpuke: “Tüokhei taowe Yinhulan yo me nangte yihlupu phanang, hüyange taowe nang min me lokning.”

¹⁰Üne-o hüke inang, “Yinhulan, Kahwang jing kahtalan phei mongmei tüoh.”

¹¹Üne-o hüke inang, “Yinhulan, üsheiye Youngwanpate yihlutüoh; hüyange kahta üsheiye Ite yihlutüoh.”

¹²Üne-o Isaia inang, “Jesse yalah ngailak, Iye yinhulan tangme wanglam lamlak; Ime yinhulanne monghümlak.”

¹³Sha-a numan Yaha Üjao üngan me monghümpuwe maalak jingne, monghümpu Kahwange mengpu me mongmei hei chingmei üsheiye numan maatam tüoh.

¹⁴Ü-jeiheinaolan, numan yoi nying nyingke shemei she hüyange sheshingpuwe maawe, jawe jate teiheng nang she, taowe yoi nying nyingke numante monghümnang.

¹⁵Hüpoi ülam ja me numante teihne tamhulak jingne, Kahwange üte phapu shüpshe kaiye, taowe mongyong puphei numante nyan.

¹⁶Yinhulan yo me Khrista Jesu shaoshanpa ne menglak jingne; Kahwang pungao ümei nyüopu me taowe dopu ja leye phanang, tüowe yinhulanne dopu yah oklak jingne, Yaha Üjaowe jaowetam.

¹⁷Tüokhei Kahwang toijengme ü-müktishiwa Khrista Jesu me tao otalak ngohnang;

¹⁸Ü-kaiye yinhulanne ngao jailak jingne, Khristawe lingpu ngaolak jingne tao mong yeyongpe yengoh ok, hanghepa me Iye ngao hei toi me ling,

¹⁹yepinlakpa wong hüyange yashan yali kaiye hüyange Yaha Üjao ünganwong kaiye, tüokaiye Jerusalem mepu Ellirikam ngoiye Khrista Pungao Ümei nyüopu taowe shoteki.

²⁰Hüke mihlingpu nyoijing tangme yelinglak jingne, ümeken me Khrista jeng manjai, tüome pungao ümei konnyüolak ü müktakpe ngoh;

²¹hüpoi nyanne ngohpuke, “Aoyin tangte I jeng ngaolan manpei iman-e ngelak, hüyange aoyinne manjai iman-e shinglak.”

²²Tüojingne tao numan tangte peilak mapu hipak lep-iye tienpu ngohyangki.

²³Hüpoi sha-a tüolan kahtokme ütoi linglak yenangpuwe, hüyange wangpeng yeonge numan tangte peilak jingne teihngohpu jingne;

²⁴tao aope Spainte tailakei numan hüolak she, hüyange numan phei hüowe ja me toloimei phei me numan-e tao lünge tam külak she monghüm nang.

²⁵Hüpoi sha-a, üjaopalan shaoshanlak jingne tao Jerusalem te tainang.

²⁶Hangjingne Macedonia hei Akhaia bumeinoklan ne Jerusalem me ngohpu bumeinok üjaolan yo me toinanpalan jingne jampu shaiye phahah she tüm.

²⁷Iman-e tüopa meinangki she teih, hüyange ine ima-a imante pheeisea shümlak ne iman ngohnang. Hangjingne Yinhulanne iman mepu yaha meitam ja ke muh yahma-a, iman-e iymei jingne wongpong toishaowe-o imante-o shaoshanlak wongpong.

²⁸Tüokhei taowe tüopa toi tümyange, hüyange tüopa ülick imante meimeiye phünne phayang pheime, tao numan ne jampu kaiye Spainte tailak.

²⁹Hüyange aope tao numan tangte peilakeih, Khrista moiman wangngoipu phei tao peikülak she taowe shing.

³⁰Jeiheinaolan, okpupa Jesu Khrista hüyange Yahawe phapu yayeng kaiye, taowe numante üjingne Kahwangte yeonge yoppu me omkei she tongnang,

³¹tüokaiye Judea me yemengpalan mepu tao yin oklak jingne, hüyange Jerusalem me taowe shaoshanpu üjaolan-e yah oklak jingne,

³²hümme nakshih Kahwange mongpune mengma-a tao numan tangte mongmeiye maawe peikülak, hüyange numan phei ngoiye teishin puphei mongmeilak.

³³Chingmei Kahwang numan üshei phei ngohtüoh. Amen.