Read Konyak Naga ROME 16 Bible Online

ROME 16 - Konyak Naga bible

ROME 16

¹Cenkhrea bumeinok mepu shaoshannyu teman nyanao Phoebe, taowe numante shingne tamnang.

²Youngwanpa minme üjaolan-e meimeiye yahpuke numane-o yahtüoh. Hüyange hanghe me yhawe numan mepu jampu wongpongne menglakei, üshei me numan-e yha püoyah, hangjingne yhawe kahta maapute hüyange üte-o jamnang.

³Khrista Jesu me ü-phei jam-e toilingpalan Priska hei Aquila te salam shonnang.

⁴Iman-e ü-üyin jingne yoi üng shan, hüyange ü-shaha yeje, hüpoi Yinhulan bumeinok üsheiye imante minyongpu phanang.

⁵Hüyange iman nokme jempu bumeinokte salam shonnang. Taowe kenpu Epaenetus, ao Asia me üwangne Khrista te meng, Ite ü-salam shonnang.

⁶Mary, aowe numan yo me ngange toiling Ite salam shonnang.

⁷Üpheipu hüyange ü-phei jam-e küpnok me angpalan Andronikas hei Junias, aoyin lampulan yo me minngaipalan ne hüyange ü-shao memuh Khrista me ngoh, imante salam phanang.

⁸Youngwanpa me taowe kenpu Ampliatas te salam shonnang.

⁹Khrista me toman jam-e toilingpalan Urbanus hei taowe kenpu Stachys te salam shonnang.

¹⁰Khrista me kahta ümei Apelles te salam phatüoh. Aristobulus noksalante-o salam shonnang.

¹¹Tenok Herodion te salam shonnang. Youngwanpa me Narcissus nokte salam shonnang.

¹²Youngwanpa me toi lingpalan Tryphena hei Tryphosa te salam shonnang. Youngwanpa me yeonge ngange lingpu taowe kenpu Persis te salam shonnang.

¹³Youngwanpa me leyangpu Rufus hei tomni ünyu te salam shonnang.

¹⁴Asyncritas, Phlegon, Hermes, Patrobas, Hermas, hüyange iman phei ngohpu jeiheinaolan te salam shonnang.

¹⁵Philologus, hei Julia, Nereus hei Inao shekonyu, hüyange Olympas hüyange iman phei ngohpu üjaolan üsheite salam shonnang.

¹⁶Numan jeihei nao hei jeiheinao ni üjao om teihüp puphei salam teipha yah. Khrista bumeinoklan üsheiye numante salam shonnang.

¹⁷Jeiheinaolan, numan-e hanghepa konnyüopu shange yahteki tüopa kaiye aoyinne juteih yoi yoi hüyange yashah hüopu ngaine tamnang imante leiye angyah, hüyange iman mepu lüppe yetüoh she taowe numante tongnang.

¹⁸Hangjingne tüokihpu kahtawe teman Youngwanpa Khrista shao yeshanpe yoi seanyu hei shannang; hüyange iman yohpu hei meipu ngao kaiye ümeng yenangpulan kenmong lowe tamnang.

¹⁹Hangjingne numan ngao jaipu ngaolan jeng kahta üsheiye jaiteki. Tüokhei tao numante mongmeinang, hüpoi taowe numan hanghe ümei ngoh tüome konnangpu, hüyange hanghe ümeng ngoh tüome lantaakke ngohne tamhu nangki.

²⁰Chingmei Kahwange numan yaphang me satan lokne tamlak. Teman Youngwanpa Jesu Khrista shüpshe numan phei ngohtüoh.

²¹Ü-phei jamme toilingpa Timothy-e salam shonnang; hüke muh üpheipu Lucius, Jason, hei Sosipater lanne numante salam shonnang.

²²Tao, Tertius, Youngwanpa shaoshan pume aowe tüopa lai nyannang, numante salam shonang.

²³Ü-yinpa hüyange bumeinoklan üshei jemhümpu nok Gaiuswe numante salam shonnang. Chingnyu ngin angpa Erastus hei toman ünao Quartus numante salam shonnang.

²⁴(Teman Youngwanpa Jesu Khrista shüpshe numan üshei phei ngohtüoh. Amen.)

²⁵Kahwangte müktishiwapu phahah! Taowe nyüopu pungao ümeike, Iye numan ütinglakpu me mongne tamphalak, hüyange lintepu jinme yengaipe lowe angpu Üting ütahte ngaipu kih;

²⁶hüpoi sha-a, tüopa üting hipalanne nyanpu kaiye ütahte ngaiteki tüokaiye kahta lanne menglak hüyange ngao jailak; hüyange jintepu Kahwang ngao kaiye jatlan üshei te shingne tamteki.

²⁷Jesu Khrista kaiye, kentamong tingpu Kahwang shahate, Ite jin jinte müktishiwa tüoh! Amen.