Read Konyak Naga ROME 2 Bible Online

ROME 2 - Konyak Naga bible

ROME 2

¹Tüokhei, nang, ngaophünpa nang, ao ne jelakei jeyapoi, nange janlak yenang. Hangjingne eiha ngao phünwante nange nang nying nyingke ünu omnang, hangjingne nang ngaophünpa, nange tüoyin jakihmuh jonnang.

²Hüyange tüolan jonpalan phei tüi-e Kahwange ngaotingpa phei ngao phünnang she toman-e shing.

³Hüyange O kahta, nang aowe tüolan jonpalan ngao phünnang, hüyange nange hükemuh jonnang, hüyange Kahwang ngao phünpu mepu yin oklak she teih nang kü a?

⁴Yejema-a Kahwang meipu kaiye nang mong lüplak yete woinang she yeshingpe, nange Kahwang meipu hüyange tükke okpu hüyange nün-okpu toinyu iye yeteihpu a?

⁵Hüyangpoi nang mongjang wanpu hüyange yelüppu mongjang shange, Kahwange aope I üjaopa ngaophünpu hüyange mongshih ngaipu ütahte ngailak, tüopa nyih jingne yoi jingne nange mongshih ngaipu yoyah.

⁶Kahwange kahta lilite yoi toishao shange leihphalak.

⁷Aoyinne nün-okpu phei meiye lingpu me müktishiwa, minyongpu hüyange yemahlakpa yamnang, imante jintepu üyin Iye phalak.

⁸Hüpoi taishopalan, hüyange aoyinne ngaotingpa te ngao yejai, hüyangpoi yejaopupate ngaojai, imante Iye mongshih ngaipu phalak.

⁹Ümeng lingpu kahta lilite, hüke üwangne Jehudilan tangte hüyange Greeklan tangte-o Iye shaoshi yateng hüyange shaoshi pongpu shonlak.

¹⁰Hüyangpoi ümei lingpu kahta üsheite, hüke üwangne Jehudilante hüyange Greeklan te-o yoi müktishiwa hüyange minyongpu hüyange chingmei phakülak.

¹¹Hangjingne Kahwange kahta sheta yelei.

¹²Hangjingne hangshinne ngaokeng yenangpe ünu omyangki iman ngaokeng yenangpe mahne tamlak, hüyange hangshinne ngaokeng phang me ünu omyangki iman ngaokenge ngao phünlak.

¹³Hangjingne Kahwang sheshao me ngaokeng jaipalan khakshupu ne yeje, hüyangpoi aoyinne ngaokeng jonnang, iman tingtamnang.

¹⁴Hangjingne aope ngaokeng yenangpu Yinhulanne nyoingoh wanglamme ngaokeng toishaolan jonnang, iman ngaokeng yenangyapoi iman jingne ngaokeng ne tüopa mengnang;

¹⁵hangjingne iman-e ngaokeng toi-a iman mongjang me nyanne ngohpu hüonang, iman kenmonge tüopa phei saki phanang, hüyange iman juteih jawe ja te teisheng nang yejema-a ümeng teiwinnang.

¹⁶Aope Kahwange taowe nyüopu pungao ümei kih Jesu Khrista kaiye kahtalan mongjang me lowe teipu juteih ngao phünlakei, tüonyih me ngaokeng jonne ngohpalan tingetamlak.

¹⁷Hüyangpoi nange Jehudilan min yahküma-a, hüyange Ngaokhüm te monghümma-a, hüyange Kahwang te yongelüoma-a,

¹⁸hüyange Iye mongpu nange shingma-a, hüyange nange hanghe ngaolan shemeipupa tüolan yahlak jingne shingma-a, hangjingne nanga Ngaokhüm me ngohlak jingne nyüoyangpu khei,

¹⁹hüyange nanga mükpompa jingne woipa she shingma-a, hüyange wangnyak me ngohpalan jingne wangngai,

²⁰hüyange üngapa tinge ye-e tampupa, hüyange nahalan konnyüopa, hüyange nange Ngaokhüm me shingpu hüyange ngaoting tüowe,

²¹hüwante nang aowe eihate nyüonang, nange nang nying nyingke yenyüo a? Nange kahta ja te konnyüo yange, nange kuhnang kü a?

²²Nange kahta jate phwngngampu yejonlak iyange, nange phwngngampu jonnangkü a? Nange moungte nu ma-a, nang khümjing me ngohpu toinan kuhleih-e yahnangkü a?

²³Nang aowe Ngaokhüm me yongelüo, nange ngaokeng menge Kahwangte ye-i-yeshe nangkü a?

²⁴Hangjingne nyanne ngohpu ke, “Numan jingne muh Yinhulan yo me Kahwang min phoiwüm nang.”

²⁵Nange ngaokeng jonma-a, shokhüp pume ütingme küw ngohnang, hüyangpoi nange ngaokeng mengpa ja ne mengma-a, nang shokhüppuwa yekhüppu ne menglak

²⁶Tüokhei, shoyekhüppu kahta jawe ngaokeng me ngohpu jonma-a, I shoyekhüp puwa shokhüppu ne ye-ilak a?

²⁷Hüyange nang aowe nyanpu ngaokeng hüyange shokhüp yangpu ngoh, nang ngaokeng mengpa ja ne mengma-a, hüyange wanglam me yekhüp pupawe ngaokeng jonpu ne mengma-a, Iye nanga ngao yephünlak a?

²⁸Hangjingne ao ütok me Jehudilanne meng, I Jehudi ne yeje; yejema-a meime shokhüp puwa khüppune yeje.

²⁹Hüyangpoi ao ümongpa me Jehudi ne meng, I Jehudilan; hüyange shokhüppu nyanpu ngaokeng me yeje, hüpoi mongjang me hüyange yaha me ngohnang. Hüyange tüopa kahta minyongpuwa kahta mepu yeje, hüpoi Kahwang mepu ngohnang.