Read Konyak Naga ROME 3 Bible Online

ROME 3 - Konyak Naga bible

ROME 3

¹Hümma-a Jehudilan ne mengpu me hanghe ünyei ngohnang shi? Yejema-a shokhüppu küw hanghe ne menglak?

²Ülam lilime yeonge? Üwangne, imante Kahwange ülangpa nyanpu pha.

³Hangjingne ütam-e üting yelakma-a, hangke? Iman üting yelakpu kaiye Kahwang monghümpu jajang japune menge tamlak a?

⁴Hüke aope-o yeje: Kahta lili ngaoleih me ngoh yapoi, Kahwang-a ngaoting me minngoh yah. Nyanne ngohpuke: “Nange aope ngaolakei nanga tinge ngohnang she hüolak yang; Hüyange nang aope ngaophün jingme peilakeih nange oklak yang.”

⁵Hüyangpoi teman yejaopuwe Kahwang ütingpa minyonge ngaoma-a teman-e hanghe ilak? Kahwange ünupate shangne tamma-a, I yejaope ngohlak a? (Taowe kahta wanglam me ngaonang)

⁶Hüke aope-o yeje! Hüke nangma-a, Kahwange hangke kahtoknyu ngao phünlak?

⁷Hüyangpoi ü-tahleih ngao kaiye ngaotingpa Kahwang Ite müktishiwa phama-a, taowe hangne üne-o ünupa ja ke ngao phünnangpu shi?

⁸Hüyange, “Ümei ngailak jingne ümeng linghah, she hüma-a hangne hüke ye-ipu?” Hatüo ngao toman-e inang she ütam-e ngaonang, hüyange phoiwümpu ngao inang. Iman-e lingpuke, imante yaolene tamlak.

⁹Hümma-a hanghe? Yinhulan yafün phei teman Jehudilan yafün shemeipu a? Yeje, hanghe me-o yeje! Hangjingne Jehudilan hei Yinhulan moini ünu phangme ngohnang she taowe üshong memuh yeine tamyangki.

¹⁰Nyanne ngohpuke: “Ao-o khakshupu yenang, yenang, ja nehoi yenang;

¹¹shinge okpu ao-o yenang, Kahwang yampu ao-o yenang.

¹²Üshei ünyong yete tai, iman jamme ünyong yete tai; ümei lingpu ao-o yenang, ja nehoi yenang!”

¹³“Iman üng mangjong eppuke, iman-e iman yee lowe tamne jon.” “Iman jupen me pu üliükai (soihüng) ngohnang.”

¹⁴“Iman ju phoiwümpu hei ükhah maa ngohnang.”

¹⁵“Iman ya iy ngailak jingne mam,

¹⁶iman jongelamme mengpu hei shangshih toitai ngohnang;

¹⁷hüyange iman-e chingmei lamnyu yeshing.”

¹⁸“Iman mükshaome Kahwangte nyampu yenang.”

¹⁹Ngaokenge hanghe i, tüolan-a ngaokeng phangme ngohpalante inang she; hüke ju lili büanglak jingne hüyange kahtoknyu me ngohpu üshei Kahwang ngao phünpume peilak she teman-e shingnang.

²⁰Tüokhei ngaokeng jonpuwe kahtanyuha ao-o I sheshao me meiye yeling, hangjingne ngaokeng kaiye ünu shingpu pei.

²¹Hüpoi sha-a Kahwang khakshupu ja ngaokeng ye-ompe ütahte ngaiteki, ngaokeng hüyange hipalanne tüojingne saki phayapoi,

²²Kahwang khakshupupa-a Jesu Khrista kaiye mengpalan üshei jingne ngohnang.

²³Hangjingne üsheiye ünu omyangki hüyange Kahwang müktishiwa yeyüo ok.

²⁴Hüyangpoi Khrista Jesu me hanghepa yinyetampu ngohnang, hatüo kaiye I shüpsheye iman jajangjawe tingetam.

²⁵Aowe I iy kaiye ütinglak, I yahlak jingne Kahwange dopu ja ne pha, hatüowa Kahwang khakshupu hüolak jingne, hangjingne Kahwange I nün okpu kaiye lintepu hipak me jonpu ünu winyangki.

²⁶Hüke, sha-apu hipak me Kahwange I khakshupu hüolak jingne, hüyange I nying nyingke Üjao me ngohlak jingne, hüyange aoyinne Jesute ütinglak Kahwang phei tinge tampu kahta ja ne Iye lingetam.

²⁷Hüma-a yongelüopa ümme ngohnang? Tüo yenangpe taiteki. Hangkihpu ngaokenge? Ngaokeng toishao hei? Yeje, hüyangpoi ütinglakpu ngaokenge.

²⁸Hangjingne ngaokeng toi ye-ompe kahta ja ütinglakpuwe tingetam nang she teman-e shing.

²⁹Yejema-a Kahwang-a Jehudilan Kahwang hei a? I yinhulan Kahwangne-o yeje pu a? Jenang, yinhulan Kahwangne-o.

³⁰Hangjingne Kahwang ja ne hei menge, iman ütinglakpu phei phinne shokhüppulan tingetamlak, hüyange shoyekhüppulan iman ütinglakpu jingne tingetamlak.

³¹Hümma-a ütinglakpuwe teman-e ngaokenga jajang japune mengtampu a? Yeje, teman-e ngaokeng mongne tamnang.