Read Konyak Naga ROME 6 Bible Online

ROME 6 - Konyak Naga bible

ROME 6

¹Hümma-a teman-e hanghe ilak? Shüpshe ünyei ngaitamlak jingne teman ünu me yelakpe ngohlak a?

²Hüke aope-o yeje! Hangke teman ünu omtamlak jingne li, üne-o teman hangke tüome muh ngohlak?

³Yejema-a teman, hangshin Khrista Jesu me baptitam, teman üshei I lipu me baptitam she numan-e yeshing a?

⁴Tüokhei hangke Ipa müktishiwa kaiye Khrista lipu mepu yange yene tam, hüke teman-o üyin üla me kemlak jingne teman üshei baptipu kaiye lipu me I phei mu.

⁵Hangjingne teman-e I lipu me hükih-e I phei shüppe shama-a, teman I yange yepu me-o I phei hükih-e shüppe shalak.

⁶Hüyange ülangpa ünu lungsa me teman yengohlak jingne, hüyangpoi ünu püm mahlak jingne, teman ülang kahta I phei tangpem me ep she teman-e shing.

⁷Hangjingne ao liyangki I ünu mepu lanne ngohnang.

⁸Hüyangpoi teman Khrista phei li she ima-a, teman üne-o I phei ngohlak she teman-e mengnang.

⁹Hangjingne Khrista lipu mepu yange yephei me shaaji yelilak she teman-e shing. Lipupawe I tangme shaaji wanglam yelam.

¹⁰Hangjingne I liwante ünu üshei jingne ja me li; hüyangpoi I hanghepa üyin ngoh hatüo Iye Kahwang jingne üyin ngohnang.

¹¹Hüke numan-o numan nying nyingke ünu mepu yanne li she hüyange Jesu Khrista me Kahwang jingne numan üyin ngohnang she teih tüoh.

¹²Tüokhei numan-e püm yejaoyeshapu te wenjailakpa ne numan lilak pümme ünu te wanglam lamne tahtam.

¹³Numan püm ümükja yejao yeshapu yang-hei-ngou ke ünute tahpha. Hüyangpoi numan nying nyingke lipu mepu yange yepu üyinkih, hüyange numan püm ümükja khakshupu yang-hei-ngou ke Kahwangte phatüoh.

¹⁴Hangjingne numan tangme ünuwe wanglam yelamlak, hangjingne numan shaaji ngaokeng phangme yeje, hüyangpoi shüpshe phangme ngoh nang.

¹⁵Hümma-a hang? Teman-a ngaokeng phangme yeje, hüpoi shüpshe phangme ngoh tepuwe, teman-e ünu linglak a? Hüke aope-o yeje!

¹⁶Numan-e ngao jaiye ao te yoi nying nyingke rhane pha, ünu jingne lilakne jeyah, ngao jaipuwe khakshupu jingne jeyah, numan-e ao te ngaojai I rha numan ngohnang she, numan-e yeshingpu a?

¹⁷Hüyangpoi Kahwang min yongtüoh, numan aoyin ünupa rha ne ngoh, numan-e mongjang üsheiye numante phapu konnyüopu me ngao jai,

¹⁸hüyange ünu mepu lantamyange numan khakshupupa rhalan ne mengteki.

¹⁹Numan iymei wanglam me ngohtepuwe, taowe numante kahta wanglam me ngaonang. Hangjingne numan-e hangke numan püm ümükja yejaopupate rha ja leye pha, hüyange ünyei ünyei ünu üyongpate pha ngoh; hümma-a sha-a numan püm ümük ja jaoweshalak jingne khakshupupa rhalanne phatüoh.

²⁰Aope numan ünu rhapalanne ngoh, numan khakshupupa phangme yengoh.

²¹Hümma-a sha-a numan-e hanghe toilan jingne wüoteih nang, tüopa hipak me tüolan mepu numan-e hanghe küw tüo, tüolan üküm toishaowa lipu.

²²Hüyangpoi sha-a ünu phang mepu lantamyange, hüyange Kahwang rhalanne meng; hüyange sha-a numan me ngohpu ülickke, numan jaowe tampupate woinang, hüyange ükümne jintepu üyin.

²³Hangjingne ünu küw-a lipu ngohnang, hüyangpoi teman Youngwanpa Khrista Jesu me Kahwang jajang japu hünghaowa jintepu üyin ngohnang.