Read Konyak Naga ROME 7 Bible Online

ROME 7 - Konyak Naga bible

ROME 7

¹Jeiheinaolan, taowe numan ngaokeng shingpalan phei ngaonang she, hangjingne hangshin kahta üyin ngohlakei, hüshinne ngaokenge I tangme wanglam lamnang she numan-e yeshing a?

²Leppu ja me netanpa ngohpu sheko ja yoi netanpa üyin me ngohwante ngaokenge netanpa phangte shinyange ngohnang, hüpoi netanpa lima-a, netanpa ngaokeng mepu yha lanteki.

³Tüokhei, netanpa üyin ngohwante yhawe ülao netan tangte taima-a, yha phwngngamnyu she nyiklak. Hüyangpoi netan lima-a, yha ngaokenge shinyange yeje, hüyange yha ülao japhei toitaima-a phwngngampu ne yeje.

⁴Tüokhei Ü-jeihei naolan, teman Kahwangte ülick phalak jingne, numan lipu mepu yange yepupa jing, hüke lipu mepu yepupa phei ja ne menglak jingne, numan-o lipu Khrista püm kaiye ngaokeng jingne li ne tam.

⁵Aope teman iymei me muh ngoh, ngaokeng kaiye peipu ünu yejaoyeshapuwe teman püm ümük ja me lipupa jingne ülick licktam ne toiling.

⁶Hüyangpoi hangheyin me teman shayange ngoh, tüopa ngaokeng mepu sha-a teman lanpu tüo: Tüokhei teman nyanpu ngaokeng ülangpa me yeje, hüpoi üyin üla Yaha me shaoshan nang.

⁷Hümma-a teman-e hanghe ilak? Ngaokenga ünu a? Hüke aope-o yeje! Tüoyangpoi, ngaokeng yenang shihma-a taowe ünuwa hanghe yeshinghah shepu. Hangjingne, “Nange tahwau,” she ngaokenge ye-i-shihma-a taowe waupu yeshinghah shepu.

⁸Hüyangpoi ünuwe ngaokeng yeinetam-e ngaolak ülam tüowe, waupu ülam khongküm üte hengne wang, hangjingne ngaokeng mepu yanne ünuwa lipu ngohnang.

⁹Hüyange tao hipak ja me ngaokeng mepu yanne üyin me ngoh, hüpoi ngaokeng peiwante ünuwa üyin ne ye; hüyange tao li;

¹⁰hüyange ngaokeng hanghepawe tao üyin lamnyu me woilak ne ngoh, hatüowe tao lipu lamnyute woi.

¹¹Hangjingne ünuwe ngaokeng kaiye ngaolak ülam tüowe, tao lowe tam, hüyange ngaokeng kaiye tao toitam.

¹²Tüokhei ngaokenga üjao hüyange phapu ngaokengo üjao, üting hüyange shemeipupa.

¹³Hümma-a hanghe shemeipupa hatüowe tao lipu ngaitampu a? Hüke aope-o yeje! Hüpoi ünuwa ünu üja she hüolak jingne, hüyange ünuwa meiyangpu ünu she ngetamlak jingne hanghepa meipupa ngoh; hatüo kaiye ünuwe üte lipu ngaitam.

¹⁴Ngaokenga yaha she teman-e shingnang; hüpoi tao, ünupa rhane yüotampu hangko kahta.

¹⁵Hangjingne taowe hanghe lingnang hatüo taowe yeshing, hangjingne taowe hanghe lingne mongnang hatüo yeling; hüpoi taowe hanghe nu hatüo taowe lingnang.

¹⁶Hüpoi taowe hanghe lingne yemong hatüo taowe lingma-a, ngaokenga meinang she taowe jannang.

¹⁷Tüokhei shaaji hatüowa taowe yeling, hüpoi üme ngohpu ünuwe hatüowa lingnang.

¹⁸Hangjingne üme, hüke ü-meime hanghe ümei-o yenang she taowe shing; hangjingne monglak jingne üme ngohnang, hüpoi hanghepa ümei tüopa linglak üme yenang.

¹⁹Hangjingne taowe hanghe ümei linglak jingne mongnang hatüo yeling, hüpoi hanghe ümeng taowe yelinghah shepu hatüo taowe lingnang.

²⁰Hüyangpoi taowe hanghe yemong hatüo lingma-a, hatüowa taowe yeje, hüpoi üme ngohpu ünuwe lingnang.

²¹Tüokhei tao, aowe ümei linglak jingne mongnang, ü-phei ümengpa omme ngohnang she tüopa ngaokeng taowe ngenang.

²²Hangjingne ü-mong ümongpa me taowe Kahwang ngaokeng me mongmei,

²³hüpoi ülao ngaokeng ja ü-püm mük me taowe ngenang. Hatüowe ü-ken heimong ngaokeng phei tüi-e hoknang; hüyange hatüowe üpüm mükja me ngohpu ünu ngaokeng phangme tao phowe angpa ja kih-e yahpei.

²⁴O, tao hangke shangshih mongmengpu kahta! Hatüo lipu püm mepu aowe tao yinlak?

²⁵Teman Youngwanpa Jesu Khrista kaiye taowe Kahwang min yongnang! Tüokhei taowe ü-nying nyingke ü-kenmonge Kahwang ngaokeng ütingme shaoshan nang, hüpoi ü-iy meiye ünu ngaokeng shaoshan nang.