Read Konyak Naga ROME 8 Bible Online

ROME 8 - Konyak Naga bible

ROME 8

¹Tüokhei sha-a Khrista Jesu me aoyin ngohnang iman jingne ümeng phapu yenang.

²Hangjingne Khrista Jesu me üyin Yaha ngaokenge tao ünu hüyange lipu ngaokeng mepu lanne tam.

³Mei wong yenangpuwe ngaokenge hango yeling ok. Tüokhei Kahwange yoi Ha ünu mei lepume hüyange ünu jingne dopu ja leye shonne, Iye meime ünu yeine tam.

⁴Hüyange ngaokenge mongpu teman me ngaitamlak jingne, aoyinne teman kahtoknyu wanglam-e mongpuke yewoipe yaha mongpute woi, tüolan jingne Iye tüopa ling.

⁵Hangjingne aoyinne mei pheite woinang iman-e meijeng teihnang, hüpoi aoyinne Yaha pheite woinang iman-e Yaha jeng teihnang;

⁶Hangjingne meijeng teihpuwa lilakpa ngohnang, hüpoi Yaha jeng teihpuwa üyin hüyange chingmei.

⁷Hangjingne meijeng teihpuwa Kahwang phei wepa ngohnang; hangjingne hatüowa Kahwang ngaokeng phangme yenang, ütingme I yengoh oklak;

⁸hüyange aoyin meime ngohnang, iman-e Kahwang mongmei ne yetam oklak.

⁹Hüpoi Kahwang Yaha numan me ngohma-a, numan mei me, yeje hüpoi Yaha me ngohnang. Hüpoi ao me Khrista Yaha yenang, Iya I jingne yeje.

¹⁰Hüpoi numan me Khrista ngohma-a, ünu jingne püm-a ümang ngohnang; hüpoi khakshupupawe numan Yaha-a üyin me ngohnang.

¹¹Aowe Jesu lipu mepu yange yene tam I Yaha me ngohma-a, Jesu Khrista lipu mepu yange yetampupawe numan me ngohpu I yaha kaiye numan lilak pümte-o üyin phakülak.

¹²Tüokhei, jeiheinaolan, teman pheeisea shümlakpalan, hüyangpoi meiye mongpuke ngohlak jingne, meite yeje;

¹³hangjingne numan mei mongpuke ngohma-a, numan lilak; hüpoi Yahawe püm wanglamlan toine tamma-a, numan üyin ngohlak.

¹⁴Hangjingne hangshin Kahwang yaha kaiye woinang, iman Kahwang hayimlan ngohnang.

¹⁵Hangjingne numan-e üne-o nyamtamlak rha yaha yatuhshao yeyah; hüpoi numan-e Kahwang yoi üha, hangheye teman-e “Abba! Opa!” she nyik, tüopa yaha numan-e yah.

¹⁶Teman Kahwang hayim she Yahawe yoi nying nyingke teman yaha phei saki phanang;

¹⁷hüyange teman hayim ne mengma-a, hümma-a teman mothleipalan; hüke I phei teman müktishiwa tamlak jingne teman-e I phei shangma-a, teman Kahwang mothleipalan hüyange Khrista phei mothleipalan ngohnang.

¹⁸Sha-apu hipak me teman shangpuwa, hanghepa müktishiwapu temante ütahte ngaitamlak ne ngoh, tüopa phei phünlak yewang she taowe teihnang.

¹⁹Hangjingne linge ngaipu shemin lamphe toishao üsheiye Kahwang ühalan ütahte ngaipu yeonge yoonge tannang.

²⁰Hangjingne lingengaipu toishao üshei yoi mongpuwe yengai, hüpoi aowe lingengaipu toishao üshei jajang japune mengtam, Iye tüopa ling. Hüpoi hatüo me monghümpu ngoh;

²¹hangjingne lingpu toilan üshei mahlakpa shapu mepu lanpu ngeye Kahwang halan müktishiwa tangte woilak.

²²Hangjingne lingengaipu toilan üshei wong me jamshe sha-a ngoiye pongnang hüyange toinan nang she teman-e shingnang;

²³hüyange tüolan shaha yeje, hüpoi teman-o, aoyinne Yaha üwangpa ülick ngoh, teman Kahwang yoijing hayimlanke menglak, hüke teman püm yinlak jingne tanne teman-e yoi nying nyingke toinan nang.

²⁴Hangjingne teman tüopa monghümpu me yin. Hüpoi ngepu monghümpuwa monghümpu yeje, hangne! Hanghe ngenang tüo jingne aowe monghüm nangshi?

²⁵Hüpoi teman-e hanghepa üne-o mannge tüopa jingne monghüm ma-a, teman-e tüojingne nün okpu phei tannang.

²⁶Hüyange hüke muh Yahawe teman ye-ok yeshangpu püonang, hangjingne teman-e hangke yoplak wongpong hatüo yeshing. Hüyangpoi Yahawe yoi nying nyingke teman jingne ye-i-okpu khahkopuwe tongne tamnang;

²⁷hüyange aowe kahta mongjang te yamnang Iye Yaha mong shingnang; hangjingne yahawe Kahwange mongpuke üjaolan jingne tonge tamnang.

²⁸Kahwangte kenpalan aoyin Iye mongpuke kem-e ngohnang iman shongme toi üshei jam-e ümei jingne teiling nang she teman-e shing.

²⁹Hangjingne jeiheinao maapu yo me Kahwang Üha üwangne puhpu ne menglak jingne, Kahwange aoyin üshong memuh shing, iman I ha leye menge tamlak jingne Iye üne-o iman nying yangki.

³⁰Hüyange aoyin Iye nyingyangki, Iye iman nyik; hüyange aoyin Iye nyik, Iye üne-o iman tingetam; hüyange aoyin Iye tingetam, Iye üne-o iman müktishiwa ne tam.

³¹Hümma-a tüolan jeng teman-e hanghe ilak? Kahwang teman jingne ngohma-a, teman phei tokteipu ao ngohlak?

³²Aowe yoi Ha yetükpe teman üshei jingne I phünne pha, Iye temante I phei üne-o üshei ja jang jawe yephalak a?

³³Aowe Kahwange leyangpulan te ümeng phapu oklak? Kahwange tingne tamyang phei!

³⁴Aowe ümeng phapu? Khrista Jesu ao li, eihyang, hüpoi lipu mepu yange ye, hüyange ao Kahwang yakjah yeme shotte ngohnang, Iye teman jingne yoppe tongnang!

³⁵Khrista yayeng mepu teman aowe yantamlak shi? Shangepongpu, yejema-a shangnetampu, yejema-a seanyao yenglepu, yejema-a pümkeng, yejema-a wengtuh, hei yanglow tüolanne oknang kü a?

³⁶Nyanne ngohpu ke: “Nang jingne toman nyihlao hipak li pongnang; toilakpa nyeehake tomante toitei.”

³⁷Yeje, tüoyin üshei me aowe temante ken I kaiye teman-a okpalan phei nehoi shetahpu.

³⁸Hangjingne lipuwe jeyah, üyin jeyah, wangdang shongmokpalanne jeyah, wanglam lampalanne jeyah, sha-a ngohpu toinan ne jeyah, ngoilakne ngohpalanne jeyah, ünganwonge jeyah,

³⁹ütangme ngohpune jeyah, ümong me ngohpu ne jeyah, ülao lingengaipu toine jeyah, teman Youngwanpa Khrista Jesu me ngohpu Kahwang kenpu mepu teman yantamlak ye-oklak, she taowe ütingme ütinglak nang.