Read Konyak Naga ROME 9 Bible Online

ROME 9 - Konyak Naga bible

ROME 9

¹Khrista me taowe ngaoting inang hüyange yeleih, Yaha Üjao kaiye ü-juteih mongjange ü-phei saki phanang,

²hangjingne ü-mongjang me mongmeng üyong hüyange yelakpu pongpu ngohnang.

³Hangjingne meime ü-jeiheinaolan hüyange ü-jat jingne tao ü-nying nyingke Khrista mepu phoiwümpu tüolakne tao mongteiye ngoh.

⁴Iman-a Israelan; Kahwange yoi ha ne lingetampu, hüyange müktishiwa, hüyange jiengjeppulan, hüyange janpu ngaokeng, yoppe khümpu janpulan;

⁵hüyange iman pajeiyong mepu üli, hüyange tüolan iman jing; hüyange meime Khrista-a iman mepu ngai; I üshei tangte jinte Kahwange moimanpu! Amen.

⁶Hüyangpoi Kahwang ngao jajang japu ne meng she yeje, hangjingne Israel mepu ülilan üshei Israellan ne yeje,

⁷yejema-a iman Abraham üli ne mengtepuwe iman üshei Ihayim ne yeje: hüpoi, “Isaac mepu numan üli nyiklak.”

⁸Hatüowa hüke ngohnang, meimepu hayimlan Kahwang hayim ne yeje, hüpoi janpulante I hayim üli she inang.

⁹Hangjingne hatüo janpu ngaoja ngohnang, “Hakihting hipak me tao peikülak, hüyange Sarahwe netan naha ja puhlak.”

¹⁰Hüyange tüo shaha ne yeje, hüpoi kahta ja, hüke teman üpa Isaac-e Rebecca püm yekengpe mengtamwante,

¹¹ha manpuhwante, hüyange ümei yejema-a ümeng hango manlingwante, toishao mepu yeje, hüpoi aowe nyik I mepu, janyangpuke Kahwange mongpuwa yonglak jingne,

¹²Iye Rebeccate hüke i, “Jeiyongpawe naolipa shaoshanlak.”

¹³Nyanne ngohpuke: “Taowe Jacobte ken, hüpoi Esaute taowe nu.”

¹⁴Hüma-a teman-e hanghe ilak? Kahwangpawe üting ye-ipu a? Hüke aope-o yeje!

¹⁵Hangjingne Iye Mosate inang, “Aoyinte taowe shüpshe hüohunang imante taowe shüpshe hüolak, hüyange aoyinte taowe yayenge teipu hüohuwe teihlakei, imante taowe yayenge teihpu hüolak.”

¹⁶Tüokhei shemin lamphe, kahtawe teihpu me ngaipu ne yeje, yejema-a ünyei mongpu jingne yeje, hüpoi shüpshe ngohpu Kahwang mepu.

¹⁷Hangjingne ngaolaiye Pharaoh te inang: “Nangte ü-ünganwong hüone, hüyange ü-min kahtoknyu üshei yeme ponge teine, tüojingne taowe nang loinetam.”

¹⁸Tüokhei Kahwange aote I shüpshe hüohunang Ite hüonang, hüyange ao mongjang wanne tamhu Iye I mongjang wanne tamnang.

¹⁹Hüwante nange üte ilak, “Hangne Iye üne-o ümeng phopu? Hangjingne aowe Iye mongpute tienlak?”

²⁰Hüyangpoi yeje, O kahta! Kahwang phei tüi-e janpu nanga ao shi? Lingengaipu toiye Lingengaipupate, “Hangne nange tao hüke ling she ilak a?”

²¹Kümp kahtok ü-oun ja mepu, meitam jawe tük shemeipu ja, hüyange meitam jawe ülao tük shemengpu ja she linglak kümpkahtok tangme tükyaopa wong yenangpu a?

²²Kahwange yoi mongshih ngaipu hüone hüyange I üngan shingne tamlak jingne mongyapoi, mahlak jingne tümpu mongshih ngaipu tük Iye laowe tanne okma-a,

²³hüyange müktishiwa jingne hanghepa Iye üshongme muh tüm, tüolan shüpshe tükte I müktishiwa toinyu shingne tamlak nün okma-a, hümma-a hanghe?

²⁴Hüyange aoyin Iye Jehudilan yomepu shaha yeje, hüpoi Yinhulan yomepu-o nyik, teman-o tüolan shüpshe tük ngohnang!

²⁵Hüke Iye Hosea me-o hüke inang: “Aoyin ü-kahta ne yeje, taowe imante ‘ü-kahta she nyiklak,’ hüyange ao nyu te yeken, yhate kenpunyu she taowe nyiklak.”

²⁶“Hüyange imante ümeken me numan ü-kahtane yeje she iye ngohnang, tüome imante üyin Kahwang halan she nyiklak.”

²⁷Hüyange Isaiawe Israel jingne hüke üngwünne inang: “Israel hayimlan shangtoi yengching pheih kih-e ngohyapoi, jetohapulan hei yinlak;

²⁸hangjingne kahtoknyu me Youngwanpawe yoi ngao tüm-e hüyange mamshe shohne tamme linglak.”

²⁹Hüyange Isaiawe üshong me ipuke: “Wangdang ükhong Youngwanpawe temante ülija yetüoh shih ma-a, teman Sodom ke menge ngoh hahshepu, hüyange Gomorrah ke mengne tamyange ngoh hahshepu!”

³⁰Hümma-a teman-e hanghe ilak? Yinhulanne khakshupupa yeyam yapoi, tüopa tüo; hüke khakshupupa hanghepa ütinglakpu mepu ngohnang tüopa tüo.

³¹Hüyangpoi Israel lanne khakshupupa ngaokeng ja yamyapoi, tüopa ngaokenga yetüo.

³²Hangne? Hangjingne iman-e tüopa-a ütinglakpuwe yeje, hüpoi toi kaiye yam. Iman “Yashah hüopu long me yashah hüo.”

³³Nyanne ngohpu ke: “Leiyah, taowe Zion me yashah hüopu long hüyange tienpu longnyu angnang; hüyange aowe Ite menglakei I wüotüone yetamlak.”