Read Konyak Naga 1 KORINTH 1 Bible Online

1 KORINTH 1 - Konyak Naga bible

1 KORINTH 1

¹Paul, Jesu Khrista lampu ja ne menglak jingne Kahwange mongpu kaiye nyikpu, hüyange teman jeiheinao Sosthene.

²Korinth me ngohpu Kahwang bumeinok me üjaolanne mengne Khrista Jesu me jaowetam-e nyikpulan tangte, hüyange üshei yeme teman Youngwanpa Jesu Khrista min me nyikpu üshei tangte I iman hüyange teman Youngwanpa:

³Teman Üpa Kahwang hüyange Youngwanpa Jesu Khrista mepu numan tangte shüpshe hüyange chingmei ngohtüoh.

⁴Kahwang shüpshe hanghepa Khrista Jesu kaiye numante pha, tüopa jingne taowe jinte ü-Kahwang min yongnang:

⁵hüke sheminlamphe me, ngao ngaopu üshei me hüyange shinge manpu üshei me, I me numan hakpane meng.

⁶Hüke Khrista saki numan yo me mongne tam.

⁷Tüokhei Youngwanpa Jesu Khrista ütahte ngaipu tanne numan hünghao hanghe me-o yewangpu ne yeje.

⁸Teman Youngwanpa Jesu Khrista nyih me numan ümeng yenangpe ngaiye tamlak jingne Iye numan üküm ngoiye wongnangne tamlak.

⁹Kahwang-a monghümlakpa, ao kaiye numan I Ha Jesu Khrista phei shüppe shalak jingne nyik, I teman Youngwanpa ngohnang.

¹⁰Sha-a jeiheinaolan, numan-e juja ne ngaolak hüyange numan yo me teitampu yenanglak, hüpoi mong ja ne hüyange ngaophünpu ja me wangngoi tamlak she taowe teman Youngwanpa Jesu Khrista min kaiye numante hengnang.

¹¹Hangjingne ü-jeiheinaolan, numan yo me moppu ngohnangki she, Klo (Chloe) nokmepu ütam-e numan jeng üte i.

¹²Taowe ipuwa hatüo, numan kahta liliye hüke inang, “Tao Paul kahta,” “Tao Apollos kahta,” “Tao Cephas kahta,” hüyange “Tao Khrista kahta.”

¹³Khrista tamshonge ngohnangkü a? Paul numan jingne tangpem me tak a? Yejema-a Paul min me numan bapti a?

¹⁴Krispas hei Gaius ni tokte kaiye taowe numan ao-o yebapti tüojingne Kahwangte minyong nang;

¹⁵numan aowe-o ü min me baptiyangki she ye-i-oklak.

¹⁶Hüyange taowe Stephanas hei I nok baptiyangpu tokte kaiye taowe ülao baptiyapoi yeteihtüo.

¹⁷Hangjingne baptilak jingne yeje, pungao ümei konnyüo oklak jingne Khristawe tao shon. Hüpoi Khrista tangpem jajang japu ne menge tamme ngohlak yang she iye konnangpu ngao me konnyüolak jingne tao yeshon.

¹⁸Hangjingne aoyin mahnang iman jingne Tangpem ngaowa üngapa ngao, hüpoi teman yinyange ngohpalan jingne hatüowa Kahwang ünganwong ngohnang.

¹⁹Hangjingne hatüo hüke nyanne ngohnang: “Kentamong tingpa konjonga taowe mahtamlak, hüyange deitahpalan deipuwa taowe jajang japune mengtamlak.”

²⁰Kentamongting kahta ümme ngohnangki? Ngaokeng nyüopalan ümme ngohnangki? Tüopa kahtoknyu me ngao khoih i-oklak ümme ngohnangki? Tüopa kahtoknyu konjonga Kahwange üngapa ne meng yetamlak a?

²¹Hangjingne Kahwang juteih me kahtoknyuwe yoi juteih kaiye, Kahwang yeshingpuwe, üngapa kaiye toman-e nyüopu ngao aoyinne menglakei iman yinlak Kahwange mongpu ngoh.

²²Hangjingne Jehudilanne kahnyingwüngha yu hüyange Greeklanne konjong yah-huwe yamnang,

²³hüpoi toman-e Khrista tangpem me takpu konnyüo nang, Jehudilan jingne yashah hüopu long hüyange yinhulan jingne üngapa ngohnang;

²⁴hüpoi aoyinte nyik, Jehudi hei Greeklan moini jingne Khrista-a Kahwang ünganwong hüyange Kahwang konjong ngohnang.

²⁵Hangjingne Kahwang üngapa-a kahta phei shedeipupa, hüyange Kahwang wong yenangpupa-a kahta phei wong shenangpupa ngohnang.

²⁶Jeiheinaolan, numan nyikpu teihtüohu: Kahta wanglam me shingemanpu maawe, wongnangpu maawe, hüyange okkeshangpu phei puhpu maawe yenang;

²⁷hüpoi Kahwange kentamongtingpalan wüotüotamlak jingne kahtoknyu yeshing yemanpulan le, Kahwange wongnangpalan wüotüotamlak jingne kahtoknyu wong yenangpalan le;

²⁸Hanghe toilan ngoh tüopa jajang japu ne mengtamlak jingne kahtoknyu me sheshoipupa, ye-i-yeshepu hüyange üne-o hanghe toilan yenang, tüolan Kahwange le;

²⁹tüo kaiye kahtanyuha aowe-o Kahwang shongme yeyong yelüolak jingne, tüolan üshei Kahwange le-ngai.

³⁰Hüpoi Jesu, ao teman jingne Kahwang mepu konjong hüyange khakshupupa hüyange jaowe tampupa hüyange yinlakpa ne meng, tüopa Khrista me numan Kahwang mepu ngohnang.

³¹Tüokhei nyanne ngohpuke: “Aowe yongelüo Iye Youngwanpa me yongelüone tamtüoh.”