Read Konyak Naga 1 KORINTH 10 Bible Online

1 KORINTH 10 - Konyak Naga bible

1 KORINTH 10

¹Jeiheinaolan, teman puyimlan üshei wangphom phangme ngoh, hüyange üsheiye yengching kaiye lintai she taowe numante shingne yetampe ye-anghu;

²hüyange Mosa pheite woiye üshei wangphom me hüyange yengching me baptitam;

³hüyange üsheiye jakihpu yaha hahying hah,

⁴hüyange üsheiye jakihpu yaha yeng ying. Hangjingne iman-e iman phei woipu yaha longnyu mepu ying, hüyange tüopa longa Khrista ne ngoh.

⁵Tüoyangpoi iman sheyongpu jingte Kahwange mong yehah, hangjingne iman wanwüng jeng me mahne tam.

⁶Sha-a, iman-e lahnyikpuke, toman-e ümeng jingne lahyenyiklak, tüolan-a teman jingne leppu ja ne ngohnang.

⁷Yejema-a iman yo me ütamja ke numan moung khümpa ne tahmeng; nyanne ngohpuke, “Iman-e hahying ne shot, hüyange polokne ükong wang.”

⁸Hüyange iman ütam-e phwngngampu jingne nyih ja me haja daphei me lüm haowe li, hüke teman-e tahjon hah.

⁹Yejema-a iman-e Youngwanpa te tok hüyange puwe mahtampuke teman-e Youngwanpa tahtok hah;

¹⁰Yejema-a iman-e nguwe ngao hüyange mahne tampupawe mahne tampuke teman-e tahngu hah.

¹¹Tüolan khongküm imante ngaipuwa eihalante leppu ja ne ngai, hüyange tüolan-a teman jingne deingao ja ne nyanne tüoh. Hangjingne ükümnyih shongte owe peipu hipak ja me teman ngoh nang.

¹²Tüokhei aowe yongnang she teih nang, I mintahhüone kentingne tamtüoh.

¹³Kahtawe nün oklak ne tokpu tokte kaiye numan tangte tokpu yepei; hüyange Kahwang-a monghümpu ne menge Iye numan-e nün oklak tokte kaiye numan tokne yetam phalak, hüpoi numan-e nün oklak ne Iye tokpume yinlak jingne lam tümme tamphalak.

¹⁴Tüokhei, taowe kenpulan, moung khümpu mepu yantüoh.

¹⁵Taowe shinge manpalan phei ngaopuke ngaonang, taowe hanghe inang tüopa-a numan-e teihtüo yah.

¹⁶Aope teman-e moimanpu wan-a moimanne tamnang, Khrista iy me teman-e meitam yahpu ne yejepu a? Aope teman-e an khoihnang, Khrista püm me teman-e meitam yahpu yeje a?

¹⁷An ja nehei menge, teman maawe ngohyapoi, püm-a ja, hangjingne teman üsheiye an ja mepu hei teitam nang.

¹⁸Israellanne jonpaipu teih nyüohu; toidopu hah, iman wümjong me shüppe shapune yeje a?

¹⁹Hümma-a taowe hang inangpu shi? Moungte uhyingpu me ülamja ngohnang she ipu a? Yejema-a mounga ülamja üja she ipu a?

²⁰Yeje, hüpoi yinhulanne dopulan Kahwangte yeje, laalan te toido nang; hüyange taowe numan laalan phei shüppe sha ne yetamhu.

²¹Numan-e Youngwanpa wan hei laalan wan jamme yeying ok; numan-e Youngwanpa mo khao hei laalan mo khao moini me teitamne ye-ok.

²²Tüone yejema-a teman-e Youngwanpate müktakne tamnangkü a? Teman Iphei wong sheyong pupa a?

²³“Üshei heimeilak,” hüpoi üshei meipu shaha ne yeje. “Üshei heimeilak,” hüpoi üsheiye wongnangne yetam.

²⁴Üsheiye yoi meilak shaha yeyampe yoi yupipa meilak yamtüoh.

²⁵Hanghe mei yüojing me yüonang tüopa nang kenmong jingne hango tonge yengohpe yeshang shinpe hahtüoh;

²⁶Hangjingne laingaowe inang, “Kahtoknyu hüyange kahtoknyu me ngohpu üshei Youngwanpa jing.”

²⁷Yemengpu kahta jawe nangte nük hahne nyikma-a, hüyange nang taihuma-a, nang sheshaome hanghe tümme ang, kenmong me tah yetüolak jingne ngao yetongpe hahtüoh.

²⁸Hüpoi, “Tüopa-a moungte khümpu hahying üja she ütam-e nangte ima-a, hümma-a nangte aowe tüopa ngao i, tüopa kenmong jingne tah hah.

²⁹Tüopa-a nang kenmong jingne yeje, hüpoi nang phei ngaopu kahta kenmong jingne inang. Hangjingne ü-bumeite hangne eiha kenmonge ngaophün lakshi?

³⁰Taowe ü-hahying jingne Kahwangte minyong phama-a, hümma-a taowe minyong phapu ü-hahying jingne ütam-e üte hangne ümeng phalak?”

³¹Tüokhei numan-e hahyapoi, yingyapoi, sheminlam phe lingyapoi, khongkümpuwe Kahwang müktishiwa jingne lingtüoh.

³²Jehudilante jeyah, Greeklante jeyah, Kahwang bumeinokte jeyah, yashah hüone tahtam;

³³taowe ülam üsheime kahtalan lilite mongmei ne tamhupuke, ü-küw yeyampe, hüpoi üngang ngohpu iman yinlak jingne ling yangki.