Read Konyak Naga 1 KORINTH 11 Bible Online

1 KORINTH 11 - Konyak Naga bible

1 KORINTH 11

¹Taowe hangke Khrista konyah, hüke numan-e ü-kon yayah.

²Taowe numante yihlu nang hangjingne numan-e tao üshei me teihtüonang, hüyange taowe numante hangke pha hüke numan-e nyüopu ngao meimeiye angnang.

³Hüpoi kahta lili jingne üshanga Khrista, hüyange shekonyu üshanga yoi netanpa, hüyange Khrista üshanga Kahwang she taowe numante shingne tamhunangki.

⁴Kahta lili aowe shang lümyange yoplakei, yejema-a konnyüolakei, Iye yoi üshang yaolene tamnang,

⁵hüpoi sheko lili aowe shang yelümpe yoplakei, yejema-a konnyüolakei, yhawe yoi üshang yaolene tamnang; hangjingne yha shanglin puphei ja ne mengnang.

⁶Hangjingne shekowe shang yelümma-a, yha shangkhüp-e tamtüoh; hüpoi shekowe shangkhüppu, yejema-a shanglinpu wüolak ne mengma-a, hüma-a yha shanglümne tamtüoh:

⁷Hüpoi netanpa-a Kahwang lepu hüyange Kahwang müktishiwa ne menge, ütingme shang yelümlak, hüpoi shekowa netan müktishiwa ngohnang.

⁸Hangjingne netan sheko mepu yeje, hüpoi shekowa netan mepu lingengai.

⁹Yejema-a, netan-a sheko jingne yeling, hüpoi shekowa netan jingne ling.

¹⁰Tüokhei, wangdang shongmokpalan ngohtepuwe, shekowe yoi shangme yha tangme netanpa wong ngohpu yepinlakpa anglak wongpong.

¹¹Tüoyangpoi Youngwanpa me shekowa netan mepu yoi mongpuke yeje, hüyange netan-o sheko mepu yoi mongpu ke ngohlak ne yeje;

¹²hangjingne sheko hangke netan mepu, hükihmuh netan-a shekowe puh; hüpoi üshei Kahwang mepu ngohnang.

¹³Numan nying nyingke tokke leihu, sheko shang yelümpe Kahwangte yoplak shupu a?

¹⁴Netan shangmin laowe angma-a, I jingne wüolakne ngohnang, tüopa-a I wanglamme numan-e yeshing a?

¹⁵Hüpoi sheko shangmin laowe ngohma-a tüopa-a yha jingne müktishiwa ngohnang; hangjingne yhate yoi shangmin-a büanglak jingne pha.

¹⁶Hüpoi kahta ütam-e teilahuküma-a, teman yejema-a Kahwang bumeinok wanglam hüke yenang she taowe ilak nehei ngohnang.

¹⁷Hüpoi tüoyin hengpu phawante, taowe numante yihlupu yeje; hangjingne numan yoppe khümne jempuwa meilakpane yeje hüpoi shemenglak jingne jemnang.

¹⁸Hangjingne üwangne, numan bumeinok me jemwante numan yo me tampu ngohnang she taowe jai; hüyange ütam-a jenang she taowe ütinglak nang.

¹⁹Numan yo me ümeipalan ütahte ngailak jingne, numan ngao yesheipu ngohkülak.

²⁰Tüokhei numan-e aope jamshe jem, numan-e Youngwanpa mo hahpu ne yeje a?

²¹Hangjingne hahwante kahta liliye hahying eiha shaome yah; hüyange ja seanyao, hüyange ülao ja yuwe jok.

²²Hahyinglak jingne numan nok yenang a? Yejema-a numan-e Kahwang bumeinok yaowe leye hahyingne yepükpalante wüo phatamlak a? Taowe numante hanghe ilak? Taowe numante yihlupu phalak a? Tüopa jingne taowe numan min yeyong.

²³Hangjingne taowe numante hanghe nyüo, Youngwanpa mepu taowe shing, hüke I lowetampu ya Youngwanpa Jesuwe an yah;

²⁴hüyange Iye minyong phayange; an khoih-e i, “Hatüowa numan jingne phapu ü-püm. Tao teihtüolak jingne tüopa jontüoh.”

²⁵Hüyange mo hahyange, hüke muh Iye wan jonyange i, “Tüopa wan Ü-iy kaiye jiengjeppu üla ngoh nang. Numan-e tüopa wan hangshin yinglakei tao teihtüolak jingne tüopa jontüoh.”

²⁶Hangjingne numan-e hangshin tüopa an hahlakei hüyange wan tüopa yinglakei, numan-e Youngwanpa lipu jeng I manyu manyu pongetam nang.

²⁷Tüokhei aowe yewang yengoipu nyoingoh phei an hahlakei, yejema-a Youngwanpa wan yinglakei, I Youngwanpa püm hüyange iy phei tüi-e püohpu ne ngohlak.

²⁸Kahta liliye yoi nying nyingke tokleiyah, hüyange hüke an hahtüoh, hüyange wan-o yingtüoh.

²⁹Hangjingne aowe püm jeng yeteihtüope hahlakei hüyange yinglakei Iye yoite ümeng neakke hahying nang.

³⁰Tüojingne numan yo me maawe wong yenang hüyange daknang, hüyange nangjange liteki.

³¹Hüpoi teman-e teman nying nyingke shuwe ngaophün ma-a, teman ngao yephünlak.

³²Hüpoi aope Youngwanpawe teman ngaophün yapeih, kahtoknyu phei teman yeine yetamlak jingne phünnang.

³³Tüokhei, jeiheinaolan, aope numan-e Youngwanpa mo hahne jemlakei jawe ja teitanyah.

³⁴Numan jempu yaolene yetamlak jingne ütam-e seanyaoma-a, I yoi nokme hahyah; Hüyange tao aope peilakeih, towe ngohpu ülaolan-a taowe shuwe linghahma.