Read Konyak Naga 1 KORINTH 12 Bible Online

1 KORINTH 12 - Konyak Naga bible

1 KORINTH 12

¹Sha-a jeiheinaolan, yaha hünghaolan jeng taowe numante shingne yetampe ye-anghu.

²Numan aope yinhune ngoh, üyin yenangpu mounglan tangte; hanghe yete numan woi, tüoyete numan woi she numan-e shing.

³Tüokhei Kahwang yaha me ngaopu aowe-o “Jesute phoiwüm tüoh” she ye i; hüyange Yaha Üjao me ngaopu kahtawe hei “Jesuwa Youngwanpa” she ipu oknang; tüolan-a taowe numante shingtam nang.

⁴Yaha hünghao ülam maawe ngohnang, hüpoi Yaha jashing;

⁵hüyange shaoshanpu ülam maawe ngohnang, hüpoi Youngwanpa ja shing;

⁶hüyange toishao ülam maawe ngohnang, hüpoi Kahwang aowe üshei me üshei lingnang, I ja shing.

⁷Hüpoi kahta lilite moilante meilak jingne Yaha ütahte ngaipu phanang.

⁸Hangjingne kahta ja te Yaha kaiye konjong phanang; hüyange ülao jate Yaha ja kaiye muh shingmanpu phanang.

⁹Ülao ja te Yaha kaiye muh ütinglakpu; hüyange ülao ja te Yaha ja kaiye muh meitamlak hünghao;

¹⁰hüyange ülao ja te yepinlakpa toi lingpu; hüyange ülao ja te hi-ngao nyüolak; hüyange ülao ja te Yahalan jeng iye okpu, hüyange ülao ja te yee kaiye ülam maawe ngaopu lüplak pha.

¹¹Tüolan üshei Yaha jawe muh yoi mongpuke kahta ja ja te tamme tüolan hünghao ling nang.

¹²Hangjingne püm hangke ja shahane ümük maawe nangyange, hüyange püm ümük maa ngoh hüpoi püm jashing, hüke Khrista ngohnang,

¹³Hangjingne teman Jehudilan ne jeyah, Greeklanne jeyah, rha ne jeyah, ünu mepu lantampu ne jeyah, Yaha jawe toman üshei püm ja me bapti, hüyange teman üshei Yaha ja mepu yingne tam.

¹⁴Hangjingne püm me ümük ja shaha ne yeje, hüpoi maawe ngohnang.

¹⁵Yawe, “Tao yakne yeje, tüokhei tao püm me ye-om she ima-a, tüo ipu jingne tüopa-a püm me ye-ompe yenang.”

¹⁶Hüyange nawe, “Tao mükne yeje, tüokhei tao püm me ye-om,” she ima-a, tüo ipu jingne tüopa-a püm me ye-ompe yenang.

¹⁷Püm nopu mükne mengma-a, hangheye jailak shi? Püm-a nopu na ne mengma-a, hangheye pelak shi?

¹⁸Hüpoi Kahwange ümük lamme lamme Iye anghupuke püm me nyimme tam.

¹⁹Hüpoi khongkümpu ümük ja nehei mengma-a, püm ümeken me ngohlak?

²⁰Hüpoi hüke tüolan ümük maawe, hüpoi püm jashing.

²¹Hüyange mükke yakte, “Üjingne nang wongpongne yeje she ye-i-ok.” Yejema-a üshange ya te, “Üjingne nang wongpongne yeje she ye-i-ok.”

²²Tüolan phei phinne tüome püm me wong yenangpuke ngohpu ümük pahi wongpongne ngohnang.

²³Hüyange püm ümük hanghepa teman-e yewang she teihnang tüopate teman-e wangshüm ünyei phanang, hüyange teman ümük üshe yemeipupa-a ünyei shemeipupa ngoh nang;

²⁴teman ünyei shemei yaomapu püm wongpongne yeje. Hüpoi hanghepa wong yenang tüopate wangshüm hüowe, Kahwange püm ja ne mengetam,

²⁵tüokaiye püm me teitampu yenang, hüpoi ümük moilan jakihkih teijampu ngohnang.

²⁶Ümük ja dakma-a, ümük moilan I phei shangnang; hüyange ümük jate yihlupu ngohma-a, tüopa phei moilanne jamshe mongmei nang.

²⁷Sha-a numan-a Khrista püm ngohnang, hüyange she ja ja-a tüopatepu ümük.

²⁸Hüyange Kahwange bumeinok ja me, üwangne lampulan, nishepupa me hipalan, lümshepupa me konnyüopalan, tüophei me kahnyingwüngha toi lingpalan, tüophei me meitamlak hünghao pheipulan, jampongpalan, wanglamlampalan, yee kaiye ülam maawe ngao okpu, tüolan letamyangki.

²⁹Iman üshei lampulan a? Iman üshei hipalan a? Iman üshei konnyüopalan a? Üsheiye kahnyingwüngha lingnang kü a?

³⁰Üsheiye meiyetamlak hünghao ngoh nangkü a? Üsheiye ülao yee me ngaonang kü a? Üsheiye ngao lüppe oknang kü a?

³¹Hüpoi ütahpa hünghao jingne yeonge lahnyik tüoh. Hüyangpoi taowe numante üne-o shemeipupa lam hüonang.