Read Konyak Naga 1 KORINTH 14 Bible Online

1 KORINTH 14 - Konyak Naga bible

1 KORINTH 14

¹Kenpu yamtüoh, hüyange üne-o yaha hünghao jingne yeonge lahnyiktüoh, hüpoi ünyei ne hikon nyüolak lahnyik tüoh.

²Hangjingne ülao ngaome yee phei ngaopuwa kahtate yeje, Kahwangte ngaonang; hangjingne aowe-o yeshingok, hüpoi Iye lowe ngohpu ngao yaha me ngaonang.

³Hüpoi aowe hikon nyüonang, Iye kahtate wongnanglak ngao, hengpu ngao hüyange toloimei ngao inang.

⁴Aowe ülao ngao yee phei ngaolakei Iye yoi nying nyingke wongnang tamnang, hüpoi aowe hikon nyüo Iye bumeinok wongnang ne tamnang.

⁵Taowe numan üshei ülao ngao yee phei ngaone tamhu nangki, hüpoi ünyei numan-e hikon nyüone tamhunangki. Hüyange ülao ngao yeephei ngaopuwe bumeinok wongnangne tamlak jingne leppu yengaoma-a, ülao ngao yee phei ngaopu phei-a hikon nyüopu sheyongpu?

⁶Hüpoi jeiheinaolan, taowe numante ütahte ngaipu ngao, yejema-a, shingemanpu, yejema-a hikon nyüopu yengaope numan tangte ülao ngao yee phei ngaowe peima-a, numan-e hanghe küw tüolak?

⁷Hüyange üyin yenangpe ngaowüng phapu toilan viwo jeyah, kongki jeyah, iman-e ngaowüng yoi yoi yephama-a, hanghe me yoi yoi yangshe hüyange wüng shinglak?

⁸Hüyange nyawong meiye yewüngma-a, aowe shapju jingne tümlak?

⁹Tüokhei numan yee kaiye shinglak ne ngao yengaoma-a, numan-e hanghe ngao hatüo hangke shinglak? Hangjingne numan-e wangyang phei ngaopuke hei ngohlak!

¹⁰Kahtoknyu me ngao maa ngohnang, tüoyangpoi leppu yenangpe ngao ja nehoi yenang;

¹¹hüpoi taowe ngao yeshingma-a, ngao ipa shaome tao yinpajake ngohlak hüyange ngao ipa-o ü-sheshao me yinpa ja ke hei ngohlak.

¹²Ünye-hi numan-e yaha hünghao jingne lahnyikpu khei, bumeinok wongnange tamlak jingne, numan wangngoilak jingne yamtüoh.

¹³Tüokhei aowe ülao ngao yee phei ngaolakei, Iye tüote leppu ngaowe oklak jingne yoptüoh.

¹⁴Hangjingne ülaongao yee phei taowe yopma-a, ü-yahawe yopnang, hüpoi ü-kenmong jingne ühak yekoh tam.

¹⁵Hümma-a taowe hang linglak? Taowe yaha phei yopning, hüyange taowe kenmonge-o yopning. Taowe yaha phei hem lokning, hüyange taowe kenmonge-o hem lokning.

¹⁶Tüone yejema-a nange yahawe minyongma-a, yeshingpu lanne nange ipu hango yeshingpute Iye hangke “Amen” she ilak? Hangjingne iman-e nange ipu hango yeshing.

¹⁷Hangjingne ütingme nange meijange minyong phanangki, hüpoi eiha wongnangne yetam.

¹⁸Taowe numan üshei phei shenyei she ülaongao yeephei ngaopu jingne, taowe Kahwang minyong nang.

¹⁹Hüpoi bumeinok jemwante taowe ülao ngao yeephei hajapen ngaoleima, eihate nyüowe oklak jingne ngaopha nga ü-kenmonge shinge ngaohah pei.

²⁰Jeiheinaolan, juteih me nahane tahmeng, ümengpa me nahane mengyah, hüpoi numan juteih me lwngmeine mengtüoh.

²¹Ngaokeng me tüopa nyanne ngohnang, “Ülao ngao yeephei ngaopu kahtawe hüyange mihjat jawe taowe tüopa kahtalante ngaolak; hüyange hüke lingyapoi, iman-e ü-ngao yejailak she Youngwanpawe inang.”

²²Tüokhei ülao ngao yeephei ngaopuwa mengpalan jingne yeje, yemengpalan jingne füo ngohnang.

²³Tüokhei bumeinok üshei jemme ngoh-e üsheiye ülao ngao yeephei ngaoma-a, hüyange yeshingpulan yejema-a yemengpalan peima-a iman-e numan woowanang she ye ilak a?

²⁴Hüpoi üshei hikon nyüoma-a, hüyange yemengpalan yejema-a, yeshingpu ja peima-a, I üsheiye ümeng she shingne tamnang, hüyange üsheiye ngao phünnang.

²⁵I mongjang me lowe ngohpu ngaolan ütahte ngaitam nang; tüokhei Iye kahtokte khuhtawe, “Numan yo me Kahwang ütingme ngohnang she iye Kahwang khümlak!”

²⁶Ü-jeiheinaolan, taowe ipuwa hatüo ngohnang. Aope numan yoppe khümlak jingne jem, kahta ja me hem ngohnang, sheja me nyüowe tamlakpa, sheja me Kahwang mepu ütahte ngaitampu ngao, sheja me yee phei yashanlak ne ngaopu, hüyange yelakpe Iye ngaoyangpu khoih ilak ütam she ngohnang. Khongkümpuwa bumeinokte jamlak jingne linglak yang.

²⁷Ülao ngao yeephei ngaoma-a, kahta ni te yejema-a sheyongpune lümte leijeiye ngaone tamtüoh, hüyange kahta ja te ngaowa lüpne tamtüoh.

²⁸Hüpoi ngaolüplak yenangma-a, iman lili yopnok me jünge ngohne tamtüoh, hüyange Iye yoite hüyange Kahwangte ngaone tamtüoh.

²⁹Hikon nyüopalan ni yejema-a lümme ngaone tamtüoh, hüyange ülaolanne janne tamtüoh.

³⁰Hüpoi phinne shotte ngohpu ülao ja te ütahte ngaipu ja shingne tamma-a, üwangne ngaopupa jünge ngohne tamtüoh.

³¹Numan liliye Kahwangpa ngaolan-a ja pheime ja, phei me ja she ngaolak yang; tüome nakshih moilanne shinge yahlak hüyange teihengpu tüolak.

³²Hüyange Kahwangpa ngaolan nyüowe tampupa hünghaowa ngao ipawe woilak yang.

³³Hangjingne Kahwang-a mopngai tampupa yeje, hüpoi chingmei Kahwang. Üjaolan bumeinok üshei me ngohpuke,

³⁴shekolan bumeinok me yelangmanpe ngohne tamtüoh. Hangjingne imante ngao ilakne yetam, hüpoi ngaokenge ipuke iman shephangpane angtam tüoh.

³⁵Hüyange iman-e ütam shinghuma-a yoi nokme netanpate tongne tamtüoh; hangjingne shekowe yopnok me ngao ilak wüolakpa.

³⁶Hümma-a numan mepu Kahwang ngao ngaipu heiya? Yejema-a numan tangte hei tüopa pei a?

³⁷Numan yo me kahta ütam-e yoi nying nyingke hikon nyüopa yejema-a yaha kahta she teihma-a, taowe numan tangte hanghe nyan tüopa Youngwanpa ngaokeng ngohnang she Ite shingne tamtüoh.

³⁸Hüpoi Iye tüopate mong yephaküma-a, Ite-o mong yephape angtüoh.

³⁹Tüokhei, jeiheinaolan, hikon nyüolak jingne yeonge lahnyik tüoh, hüyange ülao ngao yeephei ngaopute tahtien.

⁴⁰Hüpoi toishao üshei meiye hüyange ülam shuwe lingne tamtüoh.