Read Konyak Naga 1 KORINTH 15 Bible Online

1 KORINTH 15 - Konyak Naga bible

1 KORINTH 15

¹Jeiheinaolan, taowe numante nyüopu pungao ümei hanghepa numan-e yah, tüome numan mongjüonge yongtüoh she, taowe numante shingne tamnang.

²Taowe nyüopu numan-e mongjüonge tükma-a pungao ümeiye numan yinteki, yejema-a numan mengpuwa jajang japu.

³Hangjingne üshei phei üjengpake taowe hanghe yah, tüopa-a taowe numante nyüonang; ngaolai me ngohpuke teman ünu jingne Khrista li,

⁴hüyange I mu, ngaolai me ipuke nyihlüm shepupa me I yange ye;

⁵hüyange I Cephas tangte ngai, hüyange tüophei me penme ni tangte ngai.

⁶Tüophei me hipak ja me jeiheinaolan gho nga phei nyeipu tangte I ngai; iman yo me sheyongpu jing sha-a ngoiye ngohnang, hüpoi ütam shiteki.

⁷Tüokhei I Jeams tangte ngai, hüyange tüophei me lampulan üshei tangte ngai.

⁸Üshei phei ükümpa ne, üshao yengoipu ü-ha kihpu Ü-tangte I ngai.

⁹Hangjingne tao lampulan yo me üjoipa hüyange üte lampu she nyiklak yewang; hangjingne taowe Kahwang bumeinok shange pongne tam.

¹⁰Hüpoi Kahwang shüpshe kaiye tao hangheki-e ngoh tao hüke ngohnang; hüyange Iye üte phapu shüpshe jajang japu ne yemeng. Hüleima-a taowe iman üshei phei sheyong she ling tüoyangpoi taowe yeje, üme ngohpu Kahwang shüpshe kaiye taowe ling:

¹¹Tüokhei taowe jeyah, iman-e jeyah, hüke toman-e konnyüo, hüyange hüke numan-e meng.

¹²Sha-a Khrista lipu mepu yangeye she konnyüoma-a, litepulan yange yepu yenanglak she hangke numan yo me ütamme ipushi?

¹³Hüpoi litepulan yange yepu yenanglak she ima-a, Khrista-o yange yeyepune ngohlak;

¹⁴hüyange Khrista yange yene yetampune mengma-a, toman-e konnyüopu jajang japu, numan ütinglakpu-o ja jang japu.

¹⁵Tüophei shenyei she, toman Kahwang jeng tahleih saki phapalanne menge ngenang; hangjingne Kahwange Khrista yange yenetam she, toman-e saki pha; tüokhei ütingme litepulan yange yene yetampune mengma-a, Iye Khrista yange yene yetam?

¹⁶Hangjingne litepulan yange yene yetamma-a, Khrista-o yange yene yetam.

¹⁷Hüyange Khrista yange yene yetampune mengma-a, numan ütinglakpu jajang ja; numan üne-o yoi ünu me ngohnang.

¹⁸Hümma-a aoyin Khrista me shi, iman-o mahteki.

¹⁹Teman-e tüopa kahtoknyu üyin me hei Khrista te monghümma-a, kahtanyuha üshei phei teman yatuhshao shemengpupa.

²⁰Hüpoi shiye ngohpalan yo me üwangne lickpuke Khrista lipu mepu yange yene tamteki.

²¹Hangjingne hangke kahta ja kaiye lipu pei, hüke muh kahta ja kaiye lipulan yangeyepu-o pei.

²²Hangjingne hangke Adam me üshei li, hükemuh Khrista me üshei üyin ne mengtamlak.

²³Hüpoi kahta lili yoiyoi hipak me, hüke üwangne lickpuwa Khrista, hüwante aope I yulakei, Khrista kahtalan.

²⁴Tüophei me üküm-a peinang, hüyange tüopa hipak me wanglam lampu üshei hüyange wong üshei hüyange ünganwong üshei mahne tamyang phei me, Iye Ipa Kahwangte ahngchinga phünne phalak.

²⁵Hangjingne Iye yoi wepa üshei yoi yaphang me man-ang man-ang Iye wanglam lamlak.

²⁶Ükümpa mahne tamlak wepa-a lipu.

²⁷Hangjingne laingao me inang, “Kahwange khongkümpu yoi yaphang me ang.” Tüoyangpoi tüopa meimeih-e shinge oknang, hüke “khongkümpu” she iwante Kahwang I-a tüome ye-om; aowe khongkümpu Khrista phangme ange tam.

²⁸Hüyange üshei Iha phangme angyang pheime, hüwante Kahwang üshei me üshei menglak jingne, I aowe üshei I phangme angne tam, Iye Iha-ao I phangme angne tamlak.

²⁹Tüone yejema-a aoyin lipulan jingne baptitam, iman-e hanghe linglak? Lipulan yang yeyema-a, hümma-a iman jingne iman hangne baptitam?

³⁰Toman-o hangne ghonda lep iye wengtuh me yongpu shi?

³¹Jeiheinaolan, tao nyihjeih linang, tüopa jeng, taowe Khrista Jesu teman Youngwanpa me numan jeng otapu kaiye taowe ütingme inang.

³²Kahta kih-e ngaopune ima-a taowe Ephesia chingnyu me phao yinmok phei hok, tao hanghe küw? Lipulan yange yeyelakne mengma-a, “Teman-e hahhah hüyange yinghah, hangjingne ngainyih teman lilak.”

³³Numan lowelamne tahtam; “Shümpalan ümenge nyoingoh ümei menge tamnang.”

³⁴Üjaone menge lüotüoh, hüyange ünu tahjon, hangjingne kahta ütam-e Kahwang yeshing. Numan wüotüo tamlak jingne taowe tüopa ngao ngaonang.

³⁵Hüpoi ütam-e tonglak; “Lipalan hangkih-e yange yene tamnangki? Hüyange hangkihpu püm phei iman yenangki?”

³⁶Nang üngapa kahta! Nange kahtok me deipu üli yelima-a, üyin ne menge yephaolak.

³⁷Hüyange nange üli deiwante, üpee me jongteiye yedei; hüpoi tahkekne jeyah, ülaone jeyah, üli lick deinang.

³⁸Hüpoi tüopa me Kahwange yoi monghahpuwe püm phanang, hüyange ülilick lilite yoi yoi püm phanang.

³⁹Hangjingne mei üshei ülam ja shaha yeje; hüpoi kahta mei ülam ja ngohnang, hüyange yinmok mei ülam yoi yoi, awhalan mei ülam yoi yoi, nyah ülam yoiyoi.

⁴⁰Üne-o wangdang püm ngohnang, hüyange kahtoknyu püm ngohnang; hüpoi wangdang püm müktishiwa ülam yoiyoi hüyange kahtoknyu püm müktishiwa yoi yoi ngohnang.

⁴¹Wanghe müktishiwa ja ngohnang, hüyange linnyu müktishiwa yoiyoine ngohnang, hüyange shanha müktishiwa yoi yoi ngohnang; hangjingne shanha hei shanha ni müktishiwa me yoi yoi.

⁴²Hüke lipulan yang yepu-o ngohnang. Püm-a mahpu yafün me deinang, yemahpu me yange yelak;

⁴³ye-i-yeshepu me dei, müktishiwa me yang yetamnang; ye-ok yeshangpu phei dei, ünganwong me yange yetamnang;

⁴⁴kahtoknyu püm me dei, yaha pümme yange yene tamnang. Kahtoknyu püm ngohma-a, yaha püm-o ngohnang.

⁴⁵Hangjingne hüke nyanne ngohnang, “Üwangpa kahta Adam, üyin kahta ne meng,” Ükümpa Adam üyin phapupa yaha ne meng.

⁴⁶Tüoyangpoi hanghe yaha, tüopa üwangne yeje, hüpoi hanghe kahtoknyu püm tüopa üwangne; tüophei me yaha.

⁴⁷Üwangpa kahta-a kahtoknyu mepu, kahtokke lingpu, nishepupa kahta-a wangdang mepu.

⁴⁸Kahtoknyu mepu lan-a kahtokke lingpuke ngohnang, hüyange wangdang mepulan-a, wangdang mepu ke ngohnang.

⁴⁹Hüyange teman hangke kahtoknyu me kahtake ngoh, hüke teman üne-o wangdanglan kahtake menglak.

⁵⁰Jeiheinaolan, iy hei meiye Kahwang ahngching moth leilak ye-oklak, yejema-a mahpupawe yemahpupa moth leine ye-ok she taowe inang.

⁵¹Jaiyah, taowe numante kahnyingwüngha ngaoja inang: teman üsheiye yeshilak, hüpoi teman üshei leijeilak.

⁵²Mokhshe mükmüt tüohme, ükümpa nyawong wüngwante, hangjingne nyawong wünglak, hüyange lipulan yemahpu me yange yene tamlak, hüyange teman leijeilak.

⁵³Hangjingne tüopa mahpu püm yemahpu ne jeileilak, hüyange tüopa lipu püm yelipune jeileilak.

⁵⁴Tüokhei aope tüopa mahlakpa-a yemahlakpa ne menge ngohlakei, hüyange tüopa lipu yelipune menge yelakei, hüwante tüopa nyanne ngohpu ngao ngailak: “Lipuwa okpupawe kotling teki!”

⁵⁵“O lipupa, nange okpuwa üpu? O lipupa nange tükpuwa üpu?”

⁵⁶Line tükpuwa ünu, hüyange ünu üngan-a ngaokeng.

⁵⁷Hüpoi Kahwang min yongtüoh! Aowe teman Youngwanpa Jesu Khrista kaiye temante okpupa phanang.

⁵⁸Tüokhei taowe kenpu jeiheinaolan, mongjüonge yepope Youngwanpa toishao me jinte wangmanne yongtüoh; hangjingne Youngwanpa me numan toishao jajang japune yeje she numan-e shingnang.