Read Konyak Naga 1 KORINTH 16 Bible Online

1 KORINTH 16 - Konyak Naga bible

1 KORINTH 16

¹Sha-a üjaolan jingne ngin shaipu jeng, taowe Galatia bumeinok te hanghe lamhüopu pha hüke numane-o jontüoh.

²Tao peiwante ngin yeshailak jingne hat üwangpa nyih (hatnyih) numan-e kahta lili yoi moiman tüopu phei phinne yoi yoine yowe angtüoh.

³Hüyange aope tao ngoilakei, numan-e aoyin wange ngoipu she iye oklakei, taowe imante nyanpulai phawe, numan-e shaipu Jerusalem te yah shonlak.

⁴Hüyange tao taipu meilak she teihma-a iman ü-phei tailak.

⁵Tao Macedonia kaiye taiwante numan tangte peikülak; hangjingne tao Macedonia kaiye tailak ngohnang.

⁶Hüyange tao ümpehete tailakei, numan-e tao lünge tamlak jingne numan phei tao ngoine ok, yejema-a eanyu linne ngohne ok.

⁷Lamlinne shaha yetaipe taowe numan phei hüohu nang. Youngwanpawe mongma-a tao numan phei hipak nangjange winne nyoihuwe teihnang.

⁸Hüpoi denga nyih mo ngoiye tao Ephesia me nyoilak;

⁹hangjingne toi üyong linge oklak jingne taküp ükhao eppe ngohnang, hüyange wepa maanangki.

¹⁰Timothy peima-a, I yenyampe numan yo me ngohne tamtüoh, hangjingne taowe lingpuke Iye Youngwanpa toi lingnang.

¹¹Tüokhei aowe-o Ite tahyao tahle. Hüpoi I ü-tangte peilak jingne chingmei me I lamme lünge tamtüoh; hangjingne I jeiheinaolan phei peikülak taowe tannang.

¹²Sha-a, jeiheinao Apollos jengme, taowe I jeiheinaolan phei numan tangte peilak jingne yeonge kang. Hüpoi I sha-a tailak jingne Kahwange lanshe yemong. Aope Iye hipak ümei tüolakei, I peikülak.

¹³Kenting mongtapu phei ngohyah. Ütinglakpu me mongjüonge yongtüoh. Mongyong yah, wongnang yah.

¹⁴Numan-e lingpu üshei kenpu me lingne tamtüoh.

¹⁵Sha-a jeiheinaolan, Akhaia me Stephanas noksa üwangne mengyangki, hüyange iman-e üjaolan shaoshanlak jingne yoi nying nyingke phünne pha she numan-e shing.

¹⁶Numan-e tüokihpu kahta phangme hüyange Youngwanpa toishaote jamme lingpa üshei phangme ngohlak jingne taowe numante tongnang.

¹⁷Hüyange Stephanas hei Fortunatus hüyange Akhaicas peipu jingne tao mongmei nang; hangjingne iman-e numan nanleitam;

¹⁸hangjingne iman-e ü-yaha hüyange numan yaha-o toloimeine tam. Tüokhei numan-e tüokihpu kahtalan shinge ngohyah.

¹⁹Asia me bumeinoklan ne numan tangte salam shonnang. Aquila hei Priska iman nokme ngohpu bumeinok phei Youngwanpa me numan tangte monghahpu salam shonnang.

²⁰Jeiheinaolan üsheiye numan tangte salam shonnang. Numan-e jeiheinao hei jeiheinao üjao om teihüppu kaiye salam tei phatüoh.

²¹Tao, Paul, üyakke nyanpu salam shonnang.

²²Kahta ütam-e Youngwanpate yekenma-a, I phoiwümpu shahtüoh! Teman Youngwanpa peinang!

²³Young-wanpa Jesu Khrista shüpshe numan phei ngohtüoh.

²⁴Khrista Jesu me mongkenpu numan üshei phei ngohtüoh. Amen.