Read Konyak Naga 1 KORINTH 2 Bible Online

1 KORINTH 2 - Konyak Naga bible

1 KORINTH 2

¹Aope tao numan tangte pei jeiheinaolan, ngaomei ngaowe okpu yejema-a konjong üyong phei numan tangte Kahwang saki phawe yepei.

²Hangjingne Jesu Khrista hüyange I tangpem me takpu tokte kaiye taowe numan yo me ülao hango yeshingtamlak jingne mong.

³Hüyange tao numan yo me wong yenang, nyampu hüyange yeonge ninpuphei ngoh;

⁴hüyange ü-ngao hei ü-konngaowa yohpu juteih ngaome yeje, hüpoi Yaha saki hei ünganwong me ngoh,

⁵tüokaiye numan ütinglakpu, kahtalan konjong me yeje hüpoi Kahwang ünganwong me yongne tamtüoh.

⁶Tüoyangpoi lwngmeine mengtepu yo me toman-e konjong ngao inang; hüpoi tüopa kahtoknyu konjong yejema-a kahtoknyu wanglam lampalan, aoyin jajang japu ne menglak, iman konjong me yeje.

⁷Hüpoi hanghe lowe angpu konjong Kahwange kahtoknyu manling wantemuh teman müktishiwa tamlak jingne tüm, hatüopa lowe angpu Kahwang ngao me toman-e ngaonang.

⁸Tüopa konjong kahtoknyu wanglamlampa jawe nehoi yeshing, hangjingne iman-e shingshihma-a, müktishiwa Youngwanpa tangpem me iman-e yetak hahshepu!

⁹Hüpoi nyanne ngohpuke, “Hanghe mükke ye-nge, yejema-a nawe yejai, yejema-a hanghe kahta mongjangte ye-ong, hanghe Kahwange Ite kenpalan jingne tüolan-a tüm.”

¹⁰Hüpoi Kahwange Yaha kaiye tüolan-a teman tangte ütahte ngaine tam, hangjingne Yahawe teihpu üshei, hüke Kahwange teihpu shelupu-o shingnang.

¹¹Hangjingne kahta me ngohpu yaha tokte kaiye, kahta yo me aowe kahta juteih shingnangpu shi? Hüke Kahwang Yaha tokte kaiye aowe-o Kahwange teihpu yeshing.

¹²Hüpoi Kahwange temante hanghe jajang jawe pha tüolan shinglak jingne teman-e kahtoknyu yaha yeyah, hüpoi Kahwang mepu peipu Yaha yah.

¹³Tüokhei tüolan-a teman-e ngaonang, hüpoi kahta konjonge nyüopu ngao me yeje, hüpoi Yaha ngaome yaha juteihlan yaha kahtalante khoih nyüonang.

¹⁴Hüpoi yaha yenangpu kahtawe Kahwang Yaha ngaolan yeyah, hangjingne iman-a I jingne üngapa ngohnang. Hüyange Iye iman-a shingne ye-ok, hangjingne iman-a yahawe ngao phünnang.

¹⁵Hüpoi yaha kahtawe üshei ngao phünnang; hüpoi aowe-o Ite ngao phünpu ye-ok.

¹⁶“Hangjingne Youngwanpate nyüotamlakne aowe I kenmong shingpu?” Hüpoi teman me Khrista kenmong ngoh nang.