Read Konyak Naga 1 KORINTH 3 Bible Online

1 KORINTH 3 - Konyak Naga bible

1 KORINTH 3

¹Jeiheinao hüyange nya-naolan, taowe numan phei yaha kahta phei ngaopuke ngaone ye-ok, hüpoi mei kahta phei ngaopuke, hüyange Khrista me naotak halanke taowe numan phei ngao.

²Taowe numan hahying üwan phei yeje, düamyeng uh-e paonang, hangjingne numan-e hatüo yahne man-ok; hüyange sha-a ngoiye man-ok;

³hangjingne numan üne-o meime ngohnang. Hangjingne numan yo me aohüng müktakpu hei teelapu ngohtepuwe numan meine yeje a? Hüyange jajangjapu kahta jake numan yekem a?

⁴Hangjingne aope ütam-e, “Tao Paul kahta,” hüyange ütam-e, “Tao Apollos kahta,” she iwante numan mei kahta ne yejelak a?

⁵Hümma-a Apollos hanghe? Hüyange Paul hanghe? Iman-a shaoshanpalan, hanghe kaiye numan-e meng, hüyange iman lilite Youngwanpawe phapu phei shuwe iman-e ling.

⁶Taowe üli dei, Apolloswe üphaote yeng shokke tam; hüpoi Kahwange üphaowa jongne tam.

⁷Tüokhei aowe dei, yejema-a aowe yeng shokke tam, tüopahi hangne-o yeje; hüpoi Kahwange jongne tam.

⁸Aowe dei hüyange aowe yeng shokketam imni ja, hüpoi iman kahta yoi yoiye yoi toishao shange yoi hünghao tüolak.

⁹Hangjingne toman-a Kahwang phei jam-e toi lingpalan, hüyange numan-a Kahwangpa kah, Kahwangpa nok.

¹⁰Kahwange üte phapu shüpshe phei shuwe, kon hei wongnangpu nokwepa ja ke taowe nokjing lingyangki, hüyange ülaowe tüopa tangme we nang. Hüpoi kahta liliye, hangke we-nang tüopa jingne kentingyah.

¹¹Hangjingne hanghe lingyangki, hüke Jesu Khrista, tüopa tüohyange aowe-o ülao wepu ye-oklak.

¹²Tüopa lingyangpu tangme ütam-e hon, khüm, toinyulong, pee, hüng hei tahjant ne lingma-a,

¹³kahta lili toishao ütahte ngailak. Hangjingne nyih-e tüopa hüokülak; hangjingne tüopa-a vün me ütahte ngailak, hüyange kahta lili toi hangheke ngoh hatüo vünne tokke leilak.

¹⁴Tüopa tangme lingpu kahta ütam toi jinlaowe ngohma-a, Iye khintak tüolak.

¹⁵Kahta ütam toishao vünme shuma-a, Iye mah shümpu hüolak, hüpoi Ipa-a vün mepu yinpuke yinyepu tüolak.

¹⁶Numan-a Kahwangpa khümjing hüyange Kahwang Yaha numan me ngohnang she numan-e yeshing a?

¹⁷Kahta ütam-e Kahwangpa khümjing mengma-a, Kahwange I mengtamlak, hangjingne Kahwang khümjinga üjao, hüyange tüopa khümjinga numan ngohnang.

¹⁸Aowe-o yoi nying nyingke lo ne tahtam. Numan yo me ütam-e tüopa jingne kentamong tingpa she teihma-a, I kentamongtingpa ne menglak jingne üngapa ne menglak wongpong.

¹⁹Hangjingne tüopa kahtoknyu konjonga Kahwang shaome üngapa ngohnang; nyanne ngohpuke, “Iye konnangpalan yoi yoitün me phonang.”

²⁰Hüyange üne-o, “Youngwanpawe kentamongtingpa lan-e teih nyüopuwa jajang japu she shingnang.”

²¹Tüokhei aowe-o kahtate yongelüowe tahteih. Hangjingne üshei numan jing:

²²Paul jeyah, Apollos jeyah, Cephas jeyah, kahtoknyu jeyah, lipu jeyah, sha-a ngohpu yejema-a ngoikülak toilanne jeyah, üshei numan jing;

²³hüyange numan-a Khrista jing, hüyange Khrista Kahwang jing.