Read Konyak Naga 1 KORINTH 4 Bible Online

1 KORINTH 4 - Konyak Naga bible

1 KORINTH 4

¹Kahtawe toman Khrista shaoshanpalan ke hüyange Kahwange lowe angpu ngao yakjongpalanke teihne tamtüoh.

²Ünyei ne yakjongpalan-a monghümpu ngohlak wongpong.

³Hüpoi numan-e jeyah, kahta ngao phünpuwe jeyah, ü-ngao phünpu tüowa yeonge üjoi ünao she teihnang. Ütingme taowe ü-nying nyingke ngao yephün.

⁴Hangjingne tao ü-phei tüi-e taowe ü-nying nyingke hango yeshing; hüyangpoi tüowe tao tingpu ne yeje, hüpoi aowe ü-ngaophün nang, I Youngwanpa ngohnang.

⁵Tüokhei Youngwanpa, aowe wangnyak me lowe angpu wangngai yete yahpeilak, hüyange üne-o kahta mongjang me teihyangpu ütahte ngaitamlak, hipak manngoi wante I manyu manyu hango ngao tahphün; hüyange tüophei me kahta liliye Kahwang mepu minyongpu tüolak.

⁶Jeiheinaolan, hanghe nyanne ngoh tüopa tokte kaiye yejonlak toman me shinglak, hüyange konnyüopa jawe ja phei tüi-e otapu yenanglak jingne, numan jingne ü-nying nyingke hüyange Apollos leppu yah-e tüolan ngao üshei ngaoyangki.

⁷Aowe eiha phei nang ütahpa ne lingetampu? Nangme nangpu khongkümpu Kahwange phapu ne yeje a? Hüpoi nange tüopa yahpune mengma-a, hatüowa hünghao ja ne üjepukih hangne yongelüopu?

⁸Shaaji numan maatepu yangno! Shaaji numan hakpane mengtepu yangno! Toman ye-omyapoi numan nying nyingke Ahngne mengman! Ütingme taowe numan-a ahngne mengne tamhu nang; hümme nakshih toman-o numan phei jamme ahngne menglak!

⁹Hangjingne li ne tamyangpu kahtalante Kahwange ükümne toman, hüke lampulan-a ngaitam külak she taowe teihnang; hangjingne kahtoknyu shaome shongmokpalan kahtalan sheshao me toman müktishiwapu ja ne mengteki.

¹⁰Khrista jingne toman üngapalan ngohnang, hüpoi numan-a Khrista me kentamongtingpalan. Toman wongyenang, hüpoi numan wong ngohnang! Numante minyong phapu ngohnang, hüpoi toman-a minmeng me ngohnang.

¹¹Sha-apu hipak te ngoiye toman seanyao nang hüyange yengle nang, pümkengme hüyange shange ngohnang, hüyange nok yenang;

¹²hüyange toman-e yoi yakke lingne shangnang. Phoiwümwante toman-e moiman phanang; shangne tamwante toman-e nünnang;

¹³minmeng tüone tamwante, toman-e yayeng ngao phei jannang; kahtoknyuwe shaaji toman yeyah, sha-ate ngoiye toman-a kahtoknyu mopphüp ne linge tam-e ngohnang.

¹⁴Numan wüotüotamlak jingne taowe tüolan-a yenyan, hüpoi numan ü-mongken halan leye nyüotamlak jingne nyannang.

¹⁵Hangjingne numan Khrista me konnyüopa haja maawe ngohyahpoi, numan Üpa maawe yenang, hangjingne pungao ümei kaiye Khrista Jesu me taowa numan üpa ne meng.

¹⁶Tüokhei numan ü-konyahpalan ne mengtüoh she, taowe numante yoppe tongnang.

¹⁷Tüojingne Youngwanpa me taowe monghümpu hüyange ü-mongken ha, Timothy, numan tangte shonyangki, hüyange taowe üshei yeme bumeinok lili te hangke nyüo, hüke Khrista me taowe nyüopu ülam üshei Iye numante teihne tamphalak.

¹⁸Tao numan tangte yepeikülak she teih-e numan yo me ütam-e otamaohe nang.

¹⁹Hüpoi Youngwanpawe mongma-a, tao numan tangte mamshe peikülak, hüyange hüwante taowe otamaohepalan ngao yeje, hüpoi iman mepu ünganwong shinglak.

²⁰Hangjingne Kahwang ahngchinga ngao me yeje, hüpoi ünganwong me ngohnang.

²¹Numan-e hanghe monglak? Tao numan tangte shetlak shengshaoh phei peilak heiya, yejema-a kenpume hüyange innyaipu yaha phei peilak shi?