Read Konyak Naga 1 KORINTH 5 Bible Online

1 KORINTH 5 - Konyak Naga bible

1 KORINTH 5

¹Numan yo me phwngngampu hanghe yinhulan yo me nehoi yenangpu, hüke numan yo me jawe yoi nyumanyu sheko ne yah, hükihpu phwngngampu ngohnang she ütingpa ngaolan peiteki.

²Tüoyangpoi numan ota! Tüopa jengme numan mongshange shaphah shepu! Hüyange aowe hükihpu toi ling, I numan mepu yanne tamlakyang.

³Tüokhei tao püm omme yenangyapoi yaha me omme, tao omme ngohpuke, tüopa lingpu kahta-a taowe ngao phünne lanteki.

⁴Hüyange teman Youngwanpa Jesu min me, ü-yaha phei numan jamme jem-e, teman Youngwanpa Jesu ünganwong me

⁵Youngwanpa Jesu nyih me I yaha yinlak jingne hüpoi meime mahne tamlak jingne tüokihpu kahta-a Satante phünne phalak yang.

⁶Numan yongelüopu meipu ne yeje. Do üjinghapuwe an ü-oun khongkümpu bunge ngaine tamnang she numan-e yeshing a?

⁷Numan ü-oun üla ne menglak jingne do ülangpa poiwintüoh. Hangjingne numan do yelangpulan ngohnang, hangjingne teman yinlak mo nyee üha, hüke Khrista, toidopu phateki.

⁸Tüokhei do ülange yeje, yejema-a ünu mongphei do ümenge yeje, hüpoi ütingpa hüyange ngaotingpa do yelangpu an ne teman-e mo-a jonhah.

⁹Numan-e yejaoyeshapu lanphei tahpang she taowe numan tangte ü-nyanpu lai me nyan;

¹⁰Hüpoi hatüowa tüopa kahtoknyu yejaoyeshapu yejema-a waupu hüyange ünyei yah-hupu, yejema-a moungte khümpalan phei lanshe tahjem she ipu ne yeje hangjingne hüke lingma-a, numan-e kahtoknyu mepu yanne peikülak.

¹¹Hüpoi jeiheinao she nyikpu kahta ütam yejaoyeshapu, yejema-a waupu, yejema-a moung khümpu, yejema-a phoipu, yejema-a yu pheipu, yejema-a ünyei yah-hupu ngohma-a, hükihpulan phei hah nehoi tah hah she taowe numan tangte nyannang,

¹²Hangjingne yemengpalan ngao phünlak jingne taowe hanghe wongpong ngohpute? Numan-e bumeinok mepu mengpalan ngao phünlakne yeje a?

¹³Hüpoi Kahwange yemengpalan ngao phünnang. Kahta üpaalan-a numan yo mepu wintüoh.