Read Konyak Naga 1 KORINTH 6 Bible Online

1 KORINTH 6 - Konyak Naga bible

1 KORINTH 6

¹Numan yo me ütam-e jeiheinao phei ngao ngaima-a, üjaolan tüohyange ghote yejaopulan tangte ngao phünne tailak mong yongpu a?

²Üjaolan-e kahtoknyu ngao phünlak she numan-e yeshing a? Hüyange numan-e kahtoknyu ngao phünlakne mengma-a, ngao üjinghapu phünlak numan yewangpu a?

³Teman-e wangdang shongmokpalan ngao phünlak she numan-e yeshingpu a? Hümma-a tüopa kahtoknyu jeng-o hangshin ünyei lingpu oklak?

⁴Tüokhei tüopa kahtoknyu jeng numan-e ngao phünlak ngohma-a, numan-e bumeinok me min yenang pulante numan ngao phünne tampu oklak a?

⁵Taowe numan wüotüotamlak jingne tüopa ngao inang. Jeiheinao pa me ngao phünlakne, numan yo me kentamongtingpu kahta ja-o yenanglak a?

⁶Tüo nanleiye khristan jawe khristan ja phei muh tüi-e ghonyoite tai, hüyange yemengpalan nehi numante ngaophünne tam!

⁷Ütingme numan jawe japhei ngao ngaipu me numan ye-okpu ngenang. Numan-e hüke linglak nanleiye hangne ümengpa hi yenün okpu? Yejema-a hangne lüppelowe yoi ngin pahi yahne yetampu?

⁸Tüo nanleiye, numan-e numan nying nyingke ümeng lingnang, hüyange lüppelowe ngin yahnang, hüyange tüolan-a numan jeiheinaolan phei toktei lingnang.

⁹Yejaoyeshapu lanne Kahwang ahngching moth yeleilak she numan-e yeshingpu a? Numan lo ne tahtam; iymei yejao yeshapu jonpune jeyah, moungte khümpu ne jeyah, phwngngampu jeyah, wanglam yejepu jonpune jeyah, netanne netanphei ümeng jonpu ne jeyah,

¹⁰kuhpa jeyah, waupu jeyah, yuwe jokpulan jeyah, phoiwümpu jeyah, yah-hupu jeyah, tüolanne Kahwang ahngching moth yeleilak.

¹¹Hüyange tüokihpu numan yo me ütam ngoh; hüpoi teman Youngwanpa Jesu Khrista min hüyange teman Kahwang Yaha me numan poiyangki, numan jaowe tamteki, numan tingetamteki.

¹²“Ü jingne üshei heimeilak,” hüpoi üshei meipu shaha ne yeje. “Ü-jingne üshei heimeilak,” hüpoi tao hanghe rha ne-o yemenglak.

¹³“Seanyu jingne hahying, hüyange hahying jingne seanyu ngohnang.” Hüpoi Kahwange moini mahne tamlak. Hüpoi püm-a nushakpu jingne yeje, hüpoi Youngwanpa jingne; hüyange Youngwanpa-a püm jingne.

¹⁴Hüyange Kahwange Youngwanpa yange yene tam, hüyange I ünganwong kaiye teman-o yange yene tamlak.

¹⁵Numan püm Khrista ümük ja she numan-e yeshing a? Hüma-a taowe Khrista ümük ja yahteiye-phwngngamnyu ümük ja mengtamlak a? Hüke aope-o yeje!

¹⁶Ao phwngngamnyu phei büangnang, yha phei meija ne mengnang she numan-e yeshing a? Hangjingne hüke nyanne ngohnang, “Imni meija ne menglak.”

¹⁷Hüpoi aowe Youngwanpa phei shüppe jemlakei, I phei yaha me jashing.

¹⁸Nuweshakpu mepu yantüoh. Kahtawe jonpu ünu üshei yoi püm ü-at me, hüpoi aowe nuweshakpu jonlakei, Iye yoi püm phei tüi-e ünu jonnang.

¹⁹Numan me ngohpu Yaha Üjao, ao numan-e Kahwang mepu yah, numan püm-a tüopa khümjing ngohnang she numan-e yeshing a? Numan-a numan jingne yeje;

²⁰hangjingne numan ümee phayange shak. Tüokhei numan püm me Kahwang müktishiwa ne tamtüoh.