Read Konyak Naga 1 KORINTH 7 Bible Online

1 KORINTH 7 - Konyak Naga bible

1 KORINTH 7

¹Sha-a numan-e nyanpu jengme: Netan ne sheko te yejonpu shemei.

²Hüpoi nuweshak ne tam-e tokpu ngohtepu jingne kahta liliye yoi shekonyu angyah, hüyange sheko liliye yoi netanpa angyah.

³Netanpawe yoi shekonyute hanghe phalak wongpong ngoh tüo phatüoh, hüyange hüke shekonyuwe yoi netanpate phatüoh.

⁴Hangjingne shekonyu yoi püm te nokpu yeje; hüpoi netanpa nokpu; hüyange hüke netanpa yoi püm te nokpu yeje, hüpoi shekonyu nokpu.

⁵Numan-e yoppume mong phünne phawe oklak jingne, teingao yange hipak üjingha yanpu tokte kaiye numan-e jawe jate hanghe teiphalak ngoh hatüo teiyephape tahngoh; hüyange nün ye-okpe ngohwante satanne tokne yetamlak jingne nishe jemme hüowe yetüoh.

⁶Taowe tüopa-a ngaokeng ne yepha, hüpoi shemeilak o-ngao hei inang.

⁷Hüpoi kahta üshei ü-kih hei taowe ngohne tamhu nangki. Hüpoi kahta lili, Kahwang mepu yoijing hünghao ünyei, jawe jakihpu jawe ülao jakihpu ngoh nang.

⁸Nokne manmengpulan hüyange wamnyulante taowe inang, ü-kih-e nok yeyampe ngohlak iman jingne shemeipu.

⁹Hüpoi iman-e yoi iymei tükke ye-ok ma-a, nokne mengtam tüoh, hangjingne ünu mong ngaipu phei-a nokne mengpu shemei.

¹⁰Nokne mengtepulan jingne taowe inang, taowe yeje hüpoi Youngwanpawe, nokne mengtepu sheko yoi netanpa tüohyange yeyanlak;

¹¹hüpoi yha yantaima-a, yha nokne yemengpe ngohtüoh, hüke yejema-a yhawe yoi netanpa phei mongkenhahjieng tüoh; tüophei ma-a netanpawe yoi sheko yanne yetamlak yang.

¹²Ülaolante Youngwanpawe yeje taowe inang, mengpalan ütam-e yemengpu shekonyu ngohma-a, hüyange yhawe I phei ngoh huma-a, Iye yha yanne yetamlak yang.

¹³Hüyange shekonyu ütam yemengpu netanpa phei ngohma-a, hüyange Iye yha phei ngoh huma-a yhawe I yanne yetamlak yang.

¹⁴Hangjingne yemengpu netanpa shekonyuwe jaowe tamnang, hüyange yemengpu shekonyu-a netanpawe jaowe tamnang. Tüone yejema-a numan hayimlan yejaope ngohlak, hüpoi hükih-e sha-a iman jaowe ngohnang.

¹⁵Hüpoi yemengpupawe yanhuma-a, yanne tamtüoh. Tüokihpu me mengpu jeiheinao yejema-a nyanao shayange yenang; hangjingne Kahwange teman chingmei me ngohlak jingne nyik;

¹⁶Shekonyu, nang netanpa nange hangke linge yintampu oklak shingya? Netanpa, nang shekonyu nange hangke yintampu oklak shingya?

¹⁷Tüoyangpoi, Youngwanpawe hanghe yatuhshao kahta lilite tümme pha, hüyange Kahwange kahta lili hangke nyik, hüke I kemtüoh. Hüyange hatüowa bumeinok lilite taowe nyanpu wanglam.

¹⁸Kahta ütam I shokhüpyange ngohwante nyikpu a? I shoyekhüppu kih mengne tahtam. Kahta ütam sho yekhüppe ngohwante nyikpu a? I shoyekhüppe angtüoh.

¹⁹Hangjingne shokhüppu me hango yenang, hüyange shoyekhüppu me hango yenang; hüpoi Kahwang ngaokenglan jonpu me hei ngohnang.

²⁰Kahta lili hanghe yatuhshao me ngohwante nyik, hüke ngohtüoh.

²¹Nang rhapa ne ngohwante nyikpu a? Hango yejeja, hüpoi nang lantampu yatuhshao tüopu ne mengma-a, tüopa tük angne ngangyah.

²²Hangjingne ao Youngwanpa me rhane ngohwante nyik, Youngwanpawe lantampu lingetampu pa-a I, hüyange hüke lantampu kahta, aope I nyik, Khrista rhane mengnang.

²³Numan ümee phayange shak; kahta rha ne tahmeng.

²⁴Tüokhei, jeiheinaolan, kahta lili hanghe yatuhshao me ngohwante nyik, hükemuh Kahwang phei ngohtüoh.

²⁵Sha-a nokne man mengpu jeng taowe Kahwang mepu ngaokeng hango yenang, hüpoi tao monghahlak Youngwanpa mepu yayeng shüpshe tüopuke taowe teihpu iphaning.

²⁶Sha-apu hipak me shaoshi ngohtepuwe, kahta lili I hangke ngoh, hüke ngohküme meilak ne taowe teihnangki.

²⁷Nang nokne mengtekü a? Yanlak tah teih. Nang nok ne manmengpu a? Nokne menglak tahyam.

²⁸Hüpoi nang nokne mengma-a, nange ünu ye-om, hüyange naoyha toitaima-a, yhawe ünu ye-om. Hüpoi aoyin toitai, kahtoknyu wanglam, shangpu ngohlak, hüyange tüomepu taowe numan yinhunangki.

²⁹Jeiheinao hei nya-naolan, hipak shohnang she taowe inang. Tüokhei aowe shekonyu ngoh, shekonyu yenangpukih ngohtüoh;

³⁰hüyange shappalan yeshappulan ke ngohtüoh; hüyange mongmeipalan mong yemeipalanke ngohtüoh; hüyange shakpalanne toi yenangpalan ke ngohtüoh;

³¹hüyange kahtoknyu toinyu nanha jonpalanne tüopa-a jamloiye jonpuke yejepe ngohtüoh. Hangjingne tüopa kahtoknyu sha-a ngohpu kih-e hipak laowe yengohlak.

³²Taowe numan mongshangpu mepu yanne ngohne tamhunangki. Nokne manmengpu kahtawe Youngwanpa toishao jeng hüyange hangke Youngwanpa mongmei tamlak, tüoyin jeng Iye teihnang;

³³hüpoi nokne mengyangpu kahtawe kahtoknyu toishao jeng hüyange hangke yoi shekonyu mongmeine tamlak, tüoyin jeng Iye teihnang;

³⁴hüyange I lahnyikpu mongjang ni lüm ne tampu ngainang. Hüyange toi mantaipu shekowe yejema-a yhashaohawe Youngwanpa jeng, jingne hangke yaha hüyange püm jaowe shawe ngohlak yeonge lahnyikke teihnang; hüpoi toitainyuwe kahtoknyu toishao jeng hüyange hangke yoi netanpa mongmei tamlak, tüoyin jeng yhawe teihnang.

³⁵Taowe hatüowa numante shapuja püowe tamlak jingne tüopa ipu ne yeje, hüpoi khakshuwe ngohne tamlak hüyange yephünpe Youngwanpa shaoshan-e tamlak jingne, numan meilak jingne inang.

³⁶Yahlak jingne khümyange nokne menglak tah ihah she ngohpu jengme: tüopa kahtawe shekonyute meiye yejonshe teihma-a; hüyange I khahkopu jamloi ngohma-a, hüyange nokne mengküme hei meilak she Iye teihma-a, hümma-a Iye lengpuke imni-a nokne menge tamtüoh. Tüome ünu yenang.

³⁷Hüpoi mongyangpu yepopu kahta aowe yoi kenmong me monge sho, hüyange aowe yoi mongpu kaiye yelingpe, yoi naoyhaha hüke tüohlak jingne mongyangki, Iye lingpuwa shupu toine menglak.

³⁸Tüokhei aowe yoi yhala meiye toi taine tamnang, Iye meiye lingnang, hüyangpoi aowe toitaine yetam Iye shemeipupa jonnang.

³⁹Netanpa üyin me ngohpu mongme shekonyuwa shayange ngohnang. Hüpoi netanpa lima-a, yhawe ao tangte taihuyapei, yha mong; hüpoi Youngwanpa te mengpalan yo me hei yha toi taine tamtüoh.

⁴⁰Hüpoi taowe teihpu me yha I hangke ngoh, hüke yha ngohküme mong shemeilak she taowe teihnang; hüyange Kahwang Yaha üphei-o omnang she taowe teihnang.